PSALMS.
111.
Ngan pining e Sorok ngak SOMOL! U polo’ i gumircha’eg e nggu pining e magaer riy ngak SOMOL u lan e mu’ulung ko girdi’ rok. 
Rib th’ab feni fel’ e tin ma rin’ SOMOL! Gubin e pi’in kar felfelan’gad ngay e yad ba’ adag ni ngar nanged fan. 
Gubin e tin ma rin’ ma ba gil ma rib rir; ma feni mat’aw e dariy n’umngin nap’an. 
I SOMOL e der ma pagdad ngad pagged tilin epi maang’ang nma rin’; ir e ba gol ma ba marnguy. 
Ma pi’ e ggan ni fan ngak e pi’in yad ma liyor ngak; der ma pagtilin fare m’ag rok. 
Ke dag gelngin ko girdi’ rok ko pi binaw ni tafen piyu bang nike pi’ ngorad. 
Ba yul’yul’ mab mat’aw u fithik’ urngin e tin ma rin’; urngin e motochiyel rok ma ba pagan’uy ngay. 
Ya ma par ni kargon ni gubin ngiyal’; nni pi’ u fithik’ e riyul’ nge mat’aw. 
Got e ke pithig e girdi’ rok, ma ke ngongliy ba m’ag u thilrad ni manemus. Ir e ba thothup ma ba gel gelngin. 
Dogwen SOMOL e ireram tabolngin e gonop; gubin e pi’in ma folwok rok e ra pi’ e tamilangan’ ngorad. Ir e ngan pining e sorok ngak ni dariy n’umngin nap’an.