PSALMS.
112.
Ke sorok SOMOL! Nge felan’ e en ni bay madgun SOMOL u wan’, ma rib felfelan’ ngay nma folwok ko tin keyog ni ngan rin’. 
Pifak be’ ni pumo’on ni bfel’ e yad ra gel u lan fare nam; mra fel’ wa’athan e pi’in owchen. 
Tabnaw rok e bayi fel’ rogon me yo’or ban’en riy, ma bayi fla’ab ni dariy n’umngin nap’an. 
Ke yib e tamilang nga fithik’ lumor ni fan ko girdi’ ni bfel’, ni fan ko pi’in nib marnguy, ma ba gol, ma ba yol’uw. 
Ba felfelan’ e en nib gol ko tin ma pi’ ni ku yira fulweg ngak, en nib yul’yul’ u rogon nma siyobay. 
Be’ ni bfel’ e dariy bi’id nra magawon; ma dab ni pag tilin bingyal’. 
Der marus nra rung’ag e tin ke buch ban’en; ba gel e michan’ rok, mma pagan’ ngak SOMOL. 
Der ma magfan ma der ma rus; ya ri manang ni bayi guy e pi to’ogor rok ni kar waergad. 
Ba gol ngak e pi’in ke t’uf e ayuw rorad, ma feni gol e der ma thil; bayi gel gelngin ngu’un tayfan. 
Pi’in kireb e ra guy ni aray rogon miyad damumuw; yad ra gat’fiy owcharad u fithik’ e fanenikan miyad chuw; tin ur athpeged e ke ma’ ngabang ni manemus.