PSALMS.
122.
Gu felfelan’ nnap’an ni lungurad ngog, “Ngdarod ko naun rok SOMOL!” 
Ere chiney e kugbad ngay, ni gamad ba sak’iy u lan e pi garog u Jerusalem! 
Jerusalem e ba binaw ni ka ni fulweg nga rogon, ma ka ni yaramiy ke yan i aw ni bfel’ ya’an ma ba gamog! 
Ireray e gin i par e pi pilung nu Israel riy, ngu ur pufthin niged e girdi’ rorad riy. ni ngar pininged e magaer ngak SOMOL, ni bod rogon ni yog ni ngan rin’. 
Irera’ e gin bay tagil’ e puf oloboch riy, ni en ni pilung e ma pufthinnag e girdi’ rok riy. 
Mu meybilgad ni nge aw e gapas u Jerusalem ni lungumed, “Manga yigi fel’ rogon e pi’in ga ba t’uf rorad! 
Manga yigi aw e gapas u lan e yoror rom, me par e pi tafen e pilung rom ndabi buch ban’en rok e pi’in yad be par riy.” 
Bochan e girdi’ rog nge pi tafager rog me lungug ngak Jerusalem, “Nge yib e gapas ngom!” 
Ma bochan e naun rok Got ni SOMOL rodad mu gu meybil ni nge fel’ rogom.