PSALMS.
141.
SOMOL, gu be piningem; mu ayuwegneg e chiney! mu telim ngog nnap’an ni gu be piningem. 
Nge fel’ u wun’um e meybil rog ni bod e incense, nge pa’ag ni kug tining ngalang ni bod ba maligach ni blayal’. 
SOMOL, mu tay ba pos nga langag, ni ba matnag ko mab u dap’ilangag. 
Mu talegneg ni dab kug adag ni nggu rin’ e kireb ara nggu’un ko pi’in kireb e leam rorad ko ngongol rorad ni kireb. Mang e yigi dab gu un nga ban’en ko modnam rorad. 
Be’ nib manigil e mang e ra gechig nigeg me puwan’ ngog u fithik’ e t’ufeg, machane gag e dariy liben me fel’ u wun’ug e tayfan rok e girdi’ ni kireb, ni bochan e gubin ngiyal’ ni gu ma meybil nib togopluw ko tin yad be rin’ nib kireb. 
Nap’an yira yon’ e pi tayugang’ rorad nga but’ u pebugul e yungi rech, ma aram e bayi nang e girdi’ ni thin rog e rib riyul’. 
Bod e ren ni kan sey ngan th’eth’ab nge yuchiyang, aram rogon yilrad nra wearwear u mirichlen e low. 
Machane, ka be pagan’ug ngom, i gur e SOMOL rog nib Th’abi Tolang. Gu be gay e ayuw rom; dab mu pageg nggum’! 
Mu ayuwegneg ko fapi tafich ni kar ted ni nggu aw ngay, fapi wup rok e pi ta ngongol kireb. 
Go mang e yigi aw e pi’in kireb ko wup ni kar ted mug wan ndariy ban’en nra buch rog.