PROVERBS.
8.
Mu telmed! Gonop e be pong. I Tamilangan’ e kan rung’ag laman. 
Yungin’en nib tolang nike yan e kanawo’ riy e bay riy nike sak’iy u marichlen e kanawo’, ma ku bay ko yungin’en ni madardar ko kanawo’. 
U langan e garog ngalan binaw ngu to’oben e pi garog e ke par riy be pong ni be ga’ar, 
“Gu be wenig ngomed e girdi’; gu be non ngak urngin e girdi’ nu fayleng. 
Mogned, kigimed be par ni leam ko bitir e bay romed? Mu filed rogon ni ngam leamgad ni bod e pi’lal. Mogned, kigimed bbalyang? Mu filed rogon ni ngam gonopgad. 
Mu telmed ko thin rog nib th’abi fel’; urngin e tin gu be yog ngomed e mmat’aw. 
Tin gu be yog e bariyul’; malulifith l’ugun e gu ba fanenikay. 
Urngin e tin gu be yog e bariyul’; dariy ban’en riy nde riyul’ ara bannag be’. 
Pi’in nib tamilangan’rad e btamilang gubin ban’en u wan’rad; en ni manang e pin’ey e bgagiyel ni be guy. 
Mu m’oneged u wun’med e fonow rog ko silber; ma llowan’ e nge m’on u wun’med ko gol ni th’abi fel’. 
“I gag Gonop e kabpag fanag fel’ ko churwo nib tolang puluwon; dariy ban’en ni gimed ba’adag nrayag ni ngam puluw niged ngog. 
I gag Gonop e bay e tamilangan’ rog, bay e llowan’ rog nge rogon i duwgiliy ban’en me yan i aw ni bfel’. 
Ra ngan par ni bay madgun SOMOL u wun’uy, ma aram e nga ni fanenikay e tin kireb; dabug e ufanthin nge tolngan’, nge ngongol nib kireb nge thin ni yima yog nde riyul’. 
Gu ma leamnag ban’en ni nggu rin’ mu gu rin’. Bay e tamilangan’ rog, ma gu ba gel. 
Gu ma ayuweg e pi pilung ngu’ur gagiyeggad nge pi’in ma gagiyeg ngu’ur ngongliyed e motochiyel ni bfel’. 
Urngin e pi’in yad be gagiyeg u fayleng e gag e gu be ayuwegrad, ni ta’reb rogon e pi’in ma tay murung’agen e nam nge pi’in tolang. 
Ba t’uf rog e pi’in gu bt’uf rorad; en nra gayeg e ra piri’egeg. 
Pin’en ni bfel’ nge tayfan e bay u pa’ag ni gu ra pi’, nge fel’ rogon nge mon’og. 
Tin nggu pi’ ngom e kabfel’ ko tin th’abi fel’ e gol, ma kabfel’ ko silber. 
Gu be yan u kanawo’en e tin nib mat’aw, ngu daken e wo’ nib yal’uw, 
ma gu be yo’ornag ban’en rok e pi’in gu ba t’uf rorad, ni gu be suguy e pi naun rorad ko pi machaf. 
“I SOMOL e sunimiyeg ni th’abi som’on, ni som’on ko maruwel rok kakrom. 
Gag e ni ngongliyeg aram ko tabolngin, aram ko som’on ndawori sum e fayleng. 
Ni gargel nigeg u m’on ndawori sum e day, ko ngiyal’ ni ba’aram ndariy e pi alublub. 
Ni gargel nigeg ni gu bm’on ko pi burey, ndawor ni tay e yungi ted nga tagil’rad, 
u m’on ndawori sunumiy Got e fayleng nge yungi flang, ara buchu’uw ko som’on ko but’. 
Gu bay me fek lanelang nge tay nga tagil’, nge ngiyal’ ni tay tan e lang nga tagil’ u daken e day, 
nge ngiyal’ ni tay e manileng ngalan e lang, nge fa ngiyal’nem ni bing e pi alublub ni bay u maday, 
me yog ngak e day ndabi ga’ e yilu’ nge pag e gin keyog ni ngi i mus riy. Gu bay ko ngiyal’ ni sunumiy e pi def ko fayleng. 
Ug moy u to’oben ni bod be’ nib salap i muruwliy ban’en, i par ni gubin e rran ni be felfelan’ ngog, ma gubin ngiyal’ ni gu be par rok ni gub felfelan’, 
ni gub felfelan’ ko fayleng ma bfel’ u wun’ug e girdi’ ni bay riy. 
“Gimed e pi’in pagel, mu telmed ngog. Mu rin’ed e tin kugog mu um pired ni gimed ba felfelan’. 
Mu telmed ko tin ku gu fil ngomed. Ngam gonopgad nge dab mu pi’ed keru’med ngay. 
En nra rung’ag e tin gu be yog e ra felfelan’, ni en nra par u langan e mab rog ni gubin e rran, ni be son u langan e mab ko naun rog. 
En nra piri’egeg e ke pir’eg e yafos, ma ra i par ni bfel’ u wan’ SOMOL. 
Ma en ndabi piri’egeg e ra i gafgownag ir; ma en ni be fanenikayeg e ba’adag e yam’.”