PROVERBS.
10.
Pin’ey e yu bugithin rok Solomon ni bay e gonop riy: Re pagel nib gonop e ma uf e chitamngin ngak, ma cha’ nib balyang e ma fek e gafgowan’ i yib ko chitiningin. 
Fla’ab nrayag ngom u fithik’ e sasaliyab e dabi fel’ rogom riy, machane yul’yul’ e ra ayweg e yafos rom. 
I SOMOL e dabi pag e girdi’ nib manigil ngarm’ad ko bilig, machane ma taleg e pi’in kireb ni dabyag ngorad i pin’en ni karmad ni bochan. 
Gamead e ra fekem i yan ko gafow, machane maruwel nib gel e ra fel’rogom riy. 
Be’ nib tamilngan’ e ma t’ar wom’ngin e woldug u ngal’an; ma ri ba tamra’ ni ngu’un mol ko ngiyal’ ni ngan t’ar wom’ngin e woldug. 
Be’ nib manigil e ra i fel’ wa’athan. Ma welthin rok be’ nib kireb laniyan’ e ma upnguy e kireb rok. 
Pi’in manigil e yad ra par ni bod ba tow’ath uwun’uy, machane pi’in kireb e dabi n’uw nap’an mi ni pagtilrad. 
Girdi’ nib sul laniyan’ ngak e ma motoyil ko fonow ni bfel’. Ma pi’in yad ma yog e thin ko balyang e ra yib e kireb riy ngorad. 
Girdi’ nib yul’yul’ e yad mmudugil ni dabi buch ban’en rorad, ma pi’in ndar yul’yul’gad e ran kolrad riy. 
Be’ nma mithag e tin riyul’ e ma k’ar oloboch, ma cha’ nma yog thibngin ban’en nib tamilang e be marwuliy e gapas. 
Thin u l’ugun e en nib mat’aw e ba thang’el ko yafos, machane welthin rok be’ nib kireb e ma upnguy e kireb rok. 
Fananikan e ma k’aring e kireb, machane t’ufeg e ma n’agfan urngin e kireb. 
Girdi’ nib tamilngan’ e bfel’ e tin ma yog, machane pi’in nib minan’rad e bfel’ ni yira gechig nagrad. 
Pi’in gonop e rayag ngorad urngin e llowan’, machane welthin ko girdi’ ni balyang e ra fek e oloboch i yib. 
Machaf e ma yororiy e pi’in yo’or ban’en rorad; ma gafgow e ma kirebnag e pi’in dariy ban’en rorad. 
Pulwon e ngongol ni bfel’ e yafos, ma denen e kemus nma soregey i yan nga boch e denen. 
Girdi’ nma motoyil ko fonow ni nge yal’uwegrad e yad ra fos, machane pi’in yad ra almit ni de kireb e rorad e yad bay u thatharen e riya’. 
Cha’ nma mithag e fananikan rok e ba fel’fel’ l’ugun. Ma en ni be fekthin ngi i yog i yan e bbalyang. 
Feni yo’or e welthin ni ga be tay, ma aram fini mom ni ngam denen. Ma fa’anra ga ba gonop, ma ga ra th’ab gulngam. 
Thin u l’ugun e en nib mat’aw e bod e silber nib machalbog; ma pin’en nma tafinaynag be’ nib kireb e dariy gam’ingin. 
Thin u l’ugun e en nib mat’aw e ra yib fal’ngin ngak e girdi’ nib yo’or, machane gur e rayag ni mu li’em nga mum’ ko aliliy rom. 
I SOMOL e ke fel’eg wa’tham kam fla’ab. Math’kenyil’ e dabi yon’ daken e fla’ab rom. 
Ba balyang e an ma felfelan’ ko kireb ni be rin. Girdi’ nib tamilangan’ e ma felfelan’ ko gonop. 
Pi’in mat’aw e ma yag ngorad e n’en ni yad be finey, ma pi’in kireb e ra yib ngorad e n’en th’abi riyad mmarus ngay. 
Ra yib e yiko’, ma pi’in kireb laniyan’ e yira tharbog rad, ma pi’in yul’yul’ e gubin ngiyal’ ni dariy banen nra buch rorad. 
Ri dab mu fek be’ nib gamead nge marwuliy ban’en ni fanam; ya ra k’aring e ngochngochan’ ngom ni bod e mugnin ni mur’mur’nag nguwelem ara ath ni yip’ owchem. 
Ra um liyor ngak SOMOL, ma ra n’uw nap’am. Pi’in kireb e yad ma yim’ ni dawori taw nga naprad. 
L’agan’ ko pi’in mat’aw e ra fekrad i yan ko felfelan’. Ma pi’in kireb e yad be nameg e dariy. 
I SOMOL e ma yororiy e pi’in yul’yul’, machane ma kirebnag e pi’in yad ma ngongliy e kireb. 
Pi’in yad mat’aw e yad be par ni yad bmuduwgil, ma pi’in kireb e dab ra magachgad u daken e binaw. 
Girdi’ nib mat’aw e ma non nib gonop, ma balwoth ni be yog e thin ni kireb e yira taleg. 
Girdi’ ni mat’aw e yad manang ko mang e ngroged ni bfel’, ma pi’in kireb e urngin ngiyal’ ma welthin rorad e ma amithnag lanin’uy.