TANG KO PITANG.
2.
I gag e kemus ni gu ba floras u ma’pan u Sharon, ni floras ni giyab nu loway. 
Ni bod ba floras ni giyab u fithik’ e rchangal e aram rogon e en gamow u fithik’ e pi’in ni ppin. 
Bod rogon bake arfath u fithik’ e gek’iy u loway, aram rogon e an gamow ni yira ta’rebnag ko pi pumo’on. Adagen an’ug ni ngu par nga taglul’en, ma wom’ngin e ba athibthib u langag. 
I fekeg ko senggil ni tagil e madnom rok me tining e flak ko adag nga dakennag. 
Mu pi’ e raisin ngog nge sul gelngig nge arfath ni nge pasig nigeg! Ke m’aynag e darngal gelngig. 
Ku gu teyay’ ko ba ni gil’ay i pa’, ma ba’ ni mat’aw i pa’ e ke longobiyeg. 
Mmicheged ngog, gimed e ppin nu Jerusalem, mmicheged u daken e deer nib machreg nge gazelle ni dab mmagawon niged e adag romow. 
Kug rung’ag laman e en ni gamareg. Nike yib ni be mil u daken e pi burey, ni kemus macharngin ni be th’ab e pi ted i yib ngog. 
Adag rog e bod e gazelle, fa deer ni kabbitir. Ba’aram nib sak’iy u charen e rungrung. Ni be changar u winda nga naun me damit u thilin e sagel. 
Gamareg mu non ngog. Fare Mo’on Adag rog, ere moy; mu’un ngog to’. 
Ke m’ay ngil’an e garbeb; ma ke tal e nuw’; 
ma go’ ke puf e flores u ba’nem e binaw. Iraray ngil’an e tang; tang ko dove e ka ni rung’ag u lan e yungi flang. 
Ke tabab e maloel ko fig; ma mak’uf ko grape e ke fal’eg bon e nifeng. Adag rog, ere moy; mu’un ngog to’. 
Ga bod ba dove ni be mith u thilin e war. Mu pageg nguguy fel’ngin owchem mu gu rung’ag lingum ni rib simunguy. 
Mu kol e pi fox, nochi fox ni pa’chichig, u m’on ni ngar gathayed e woldug rodow ni grape nike k’uf. 
Adag rog e ba milfan ngog, ma bmilfag ngak. Ma durwi’iy e gamanman rok u fithik’ e floras ni giyab, 
nge taw ko ngiyal’ nike yib nifngen e kadbul ma ke chuw e lumor. Mu sul to’, ni bod ba gazelle, ma bod rogon ba fak e deer u daken e burey nu Bether.