ISAIAH.
45.
Cyrus e fare pilung ni SOMOL e duwgiliy! I SOMOL e turguy ni nge gel ngak e pi nam ko mael; SOMOL e l’oeg nge gel ngak e pi pilung; SOMOL e bayi bing e mab ko pi binaw ngak. I SOMOL e ke ga’ar ngak Cyrus, 
“I gag e bay gu fal’eg rogon e kanawo’ rom, bay gu pacheg e pi burey nge yochi burey. Mab ko pi garog ni wasey ni bronze e bay gu t’ar, mu gu th’ab e yu ley i wasey ni bay riy. 
Bay gu pi’ ngom e pin’en ni bfel’ nib mith u senggil ndariy e tamilang riy; ma aram e bay mu nang ni Gag e SOMOL, mi Gag fare Got nu Israel e ku gu mel’egem. 
Ku gu duwgilyem ni ngam ayuweg e tapigpig rog i Israel, ni girdi’en fare nam ni gag e ku gu mel’egrad. Kug gagiyeg nigem yibe tay fam. ni yugu aray rogon nda mu nangeg. 
“I Gag e SOMOL; dakuriy yugu reb e got ngabang. Gelngim ndabisiy ni nge yag ngom e bay gu pi’ ngom, ni yugu aray rogon nda mu nangeg. 
Nggu rin’ ni fan e nge urngin e girdi’ u baraba’ e fayleng nge yan i mada’ nga baraba’ e ngar nanged ni Gag e SOMOL, ma dakuriy yugu reb e got ngabang. 
I gag e gu sunumiy e tamilang nge lumor; gu ma fek e fel’ rogon nge gafgow i yib. I Gag SOMOL e gu be rin’ urngin e pin’ey. 
Bay gu pi’ e gel nge mat’aw nge map’ u lang nga but’ ni bod e n’uw; bayi mab e but’ nge fek, me yib wom’ngin ni puf rogon nge mat’aw. I Gag SOMOL e bay gu gagiyeg nge yodoro’.” 
Rayag rok ba th’ib ni but’ ni nge tugthin ngak e cha’ ni ir e ngongliy, ni ba th’ib ni ta’reb rogon nga urngin e th’ib ni bay? Rayag rok e but’ ni th’ib ni nge fith ngak e en ni be ngongliy ko mang e be rin’ fa’anem? Rayag rok ba th’ib ni nge thibthibnag salapen pa’ e en ni ngongliy? 
Gur ra leamnag be’ ni nge ga’ar ngak e gallibthir rok, “Mang ni mu ngongliyew gag ni aray rogog?” 
I SOMOL ni fare Got nib thothup nu Israel, ni en ni be gagiyegnag e tin ni bayib nga m’on e be ga’ar: “Dariy mat’awmed ni ngam fithedgag u murung’agen pifakag, ara mogned ngog e n’en nggu rin’! 
I gag e gu sunumeg e fayleng, mu gu sunumeg e girdi’ ni nge par riy. Gelngig e gu filath lanelang ngay; gu be gagiyegnag e yal’ nge pul nge pi t’uf. 
I gag e kug gagiyegnag Cyrus ke ngongol ni nge rin’ e tin kem’ay i leamnag rog nge yan i aw nrogon. Bay gu yal’uweg urngin pa’ e kanawo’ ni nge yan riy. Bayi fulweg e binaw rog ni Jerusalem nga rogon, me gagiyegnag e girdi’ rog ni yad be par u reb e nam ni kar kalbusgad nga ni pagrad. Dariy be’ nike pi’ puluwon ara ke pi’ ban’en ngak ni fan e nge rin’ e ren’ey.” I SOMOL ni Gubin ma Rayag Rok e keyog e pi thin ney. 
I SOMOL e be ga’ar ngak yu Israel, “Gubin e falel’ nge machaf nu Egypt ngu Ethiopia e bayi mil suwon ngom, ma pumo’on ni n’un’uw nu Seba e bay ra manged sib rom; bay ra leked gur ni kanin’ e chen ngorad. Bay ra siro’gad ngom me lungurad, ‘Got e bay rom, kemus ni ir e Got. 
Fare Got nu Israel ni ir e be ayuweg e girdi’ rok u pa’ e to’ogor rorad e ba Got ndabiyag ni ngan guy. 
Pi’in yad ma ngongliy e liyos e yad gubin ni bay ra tamra’gad; yad gubin ni bay ni darifan nagrad. 
Machane SOMOL e ke chuweg yu Israel u pa’ e to’ogor rok, ma felfelan’ rok yu Israel nike gel e bayi par ni dariy n’umngin nap’an; ma girdi’ rok e dab kun darifan nagrad.’” 
I SOMOL e sunumiy lanelang, i ir e en ir e Got! I ir e sunumeg e fayleng, ke ngongliy rogon ke par. De ngongliy nge tay ni bangi ted ndariy ban’en riy ma der tugul ban’en riy, ya tay ni ngi i par e girdi’ riy. Ir e ga’ar, “I Gag e SOMOL, ma dariy yugu reb e got ngabang. 
Dagur mith’ag e thin rog, ara tin gu be rin’. Da gu leamnag ni nge gayeg yu Israel u bang nib wagagey urngin ban’en riy. I Gag e SOMOL, ma tin riyul’ e gu be yog; tin nib mat’aw e gu ma gagiyegnag ngan nang.” 
Be ga’ar SOMOL, “Mmu’ulung gad e girdi’ ko pi nam, ni urngin e girdi’ ni fos nnap’an ni waer e pilung romed ko mael, mired nga ni pufthin nagmed! Pi’in yad ma fek e liyos rorad ni ren ngu’ur thelepgad u kanawo’ ma yad be meybil ngak bogi got ndabiyag ni nge ayuwegrad, e yad bod e girdi’ ni dariy ban’en ni yad manang! 
Mu feked e oloboch romed i yib nga tafen e puf oloboch, me puruy’ e pi’in ta ayuw u tafen e puf oloboch. I mini’ kakrom e i yi’iynag e n’en ni nge taw ngay? Gathi Gag fare SOMOL, ni fare Got ni ayuweg e girdi’ rok? Dakuriy yugu reb e got ngabang. 
“Gimed e girdi’ nu fayleng ni ga’ngin, mu sulod ngog mu gu ayuwegmed! Ya kemus ni gag e ta’are Got ni bay. 
Tin gu be yog e ba riyul’, ma dabi thil. Ri gu be micheg nga rarogog: Gubin e girdi’ ni bay rabad ngar ragbuggad u p’eowcheg miyad micheg ni bay ur yul’yul’gad ngog. 
“Bay rogned ni kemus nu dakenag e rayag ni nga ni mat’aw riy me yib gelngiy riy; machane urngin e girdi’ ni yad ra fanenikayeg e yad ra gafgow ko tamra’. 
I Gag SOMOL e bay gu chuweg urngin e pi’in owchen Jakob u pa’ e to’ogor rorad, ma bay ra pininged e magaer nge sorok ngog.