ISAIAH.
54.
Jerusalem um par ni bod be’ ni bpin ndariy e bitir rok. Machane chiney e rayag ni ngam tang ma ga be garusnag e felfelan’. Ya chiney e bayi yag e bitir ngom nib pire’ boch ngak be’ ni bpin ni der chuw figirngin u charen! 
Mu ga’nag e tent ni ga be par u langgin! Mu n’uwnag gafan ma ga gelnag richiben u but’! 
Bay mu ga’nag e mathil rom u gubin yang; girdi’ rom e bay ra sulweged fare but’ ni girdi’ nu yug boch e nam e be par riy. Pi binaw ni kann’ag e chiney e bayi sug ko girdi’. 
Dab mu rus, ya dab kun darifan nigem bayay; dab kun tamra’ nigem. Bay mu pag talin e yul’yul’ ni da um tay ngak e pumo’on rom ko ngiyal’ ni kagab rugod, ma ku er i tay e kireban’ rom nib gel ko ngiyal’ ni yim’ figirngim. 
En ni sunumiyem e bayi bod be’ ni figirngim, fithingan e SOMOL ni Gubin ma Rayag Rok! Fare Got nib thothup nu Israel e bayi biyuliyem, ir e be gagiyegnag ga’ngin e fayleng! 
Israel, ga bod ba rugod nike mabgol, ma kari kireban’ ya ke cheal figirngin ke n’ag. Machane SOMOL e ke piningem ni ngam sul ngak ma be ga’ar: 
“Kug pagem u lan ba talab, bay gu fulwegem ngog ya ri gab t’uf rog. 
Gu pi’ keru’ug ngom u fithik’ e damumuw rog u lan ba talab; machane bay mu par ni gab t’uf rog ndariy n’umngin nap’an.” SOMOL nike biyuliyem e ara’ rogon nike yog. 
“Nap’an Noah mu gu micheg ndab kug tharey e fayleng ko ran. Ma chiney e kug micheg ngom ndab kug damumuw ngom bayay; dab kug puwan’ ngom ara ggechig nigem. 
Pi burey nge yungi ted e rayag ni nge puth, machane rogon nri gab t’uf rog e dariy e rofen nra mus; m’ag ko gapas ni kug micheg ngom e bay i par u gil’ ndariy n’umngin nap’an.” Irera’ rogon nike yog SOMOL ni ri gab t’uf rok. 
Be ga’ar SOMOL, “Jerusalem, kam gafgow, gab binaw ndabiyag ni ngam ayuwegnem, ma dariy be’ ni nge fal’eg lanin’um. Bay gu ubung e pi deaf rom bayay ni malang nrib tolang paluwon e bay gu fanay ngay. 
Bay gu ubung epi tafen e damit rom, ni malang ni rubi e nggu fanay ngay, ma pi garog rom e bay gu fanay e malang ngay ni be gal ram’en ni bod e nifiy, ma yoror rom e bay gu fanay e malang ngay nrib t’uf ma ba tolang puluwon! 
“I gag e bay gu machibnag e girdi’ rom, mu gu pi’ e fel’ rogon nge gapas ngorad. 
Ngongol nib yal’uw ma bmat’aw e bayi gel nigem; ma dakuriy e gafgow nge marus ni nge yib ngom. 
Ra cham be’ ngom ma gathigag e gu pi’ nge yib; ma en nra cham ngom e yira thirif u but’! 
“I gag e gu sunumiy e girdi’ nma maruwel ko wasey, ni yad ma k’oreg e nifiy ngar ngongliyed talin e cham. Ku gag e gu sunumiy e salthaw ni yad ma maruwel nga talin e cham ngar thanged e pogofan. 
Machane dariy ba talin e cham nrayag ni nge maad’ad ngom; bay u fulweg rom ngak urngin e pi’in yad ra yog ni gab kireb. Bay gu ayuweg e pi tapigpig rog, mu gu gagiyeg nagrad ngar gelgad.” I SOMOL e keyog e pi thin ney.