EZEKIEL.
35.
I SOMOL e non ngog. 
I ga’ar, “Fak e girdi’, mup nga owchen e nam nu Edom e kireb rorad. 
Ngam weliy ko girdi’ e pin’en ni Gag, SOMOL ni Th’abi Tolang e gu be yog: “I gag e to’ogor romed, e pi burey nu Edom! Bay gu gagiyegnag e but’ rom nge par ni dakriy ban’en ni bfel’ ngay. 
Bay gu pag e pi binaw rom nike mogothgoth nge but’ rom ni dakriy ban’en u daken; Ma aram e bay mu nang ni Gag SOMOL. 
“Umpared ni gimed ba to’ogor yu Israel bay ni pag girdi’en ngan nli’rad fa ngiyal’ nike aw e gafgow ngak, ni aram e ngiyal’ nni gechignag ko denen rok e yay ni tomur. 
Ere bod feni riyul’ ni Gag SOMOL ni Th’abi Tolang, ni fare Got ni be par nib fos, e er feni bmich ni yam’ e bayi aw ngom ma dabiyag ni mmil riy. Ya ba kireb e rom ko pogofan ni um thang, ma mathang pogofan e bayi lekem. 
Bay gu gagiyegnag fare nam ni go’ burey nu Edom nge par ni dakriy ban’en riy mug li’ ngem’ urngin e girdi’ ni yad ra milekag u daken. 
Bay gu upunguy daken e pi burey ko ldow’, ma downgin e pi’in nli’rad ko mael e bayi tharay e burey nge loway. 
Bay gu gagiyegnag ngam par ni dakriy ban’en ni bfel’ rom bingyal’. Ma dariy be’ ni ku ra par u lan fapi binaw rom bayay. Ma aram e bay mu nang ni Gag fare SOMOL. 
“Kamog ni fagal nam, nu Judah ngu Israel nge binaw riy, e bmil fan ngom ni ngam tafnay, ni yug aram rogon ni Gag SOMOL e Got rorad. 
Ere bod feni rriyul’ ni Gag SOMOL ni Th’abi Tolang, ni fare Got ni be par nib fos, e aram feni bmich ni bay gu fulweg ngom puluwon e damumuw rom, awan’ rom, nge fanenikan rom nib sor ko girdi’ rog. Bay ra nanged ni kug gechig nigem ni bochan e tin um rin’ ngorad. 
Ma aram e bay mu nang ni Gag SOMOL e gu rung’ag fiti lungum, ni mog ni burey nu Israel e darkiy ban’en riy ma bmil fan ngom ni ngam ful’. 
Kug rung’ag fiti lungun nib togopluw ngog.” 
I SOMOL ni Th’abi Tolang e ga’ar, “Bay gu tem ni dariy e fel’ rom ya nge ga’ngin e fayleng me falan’ ni kam nguchthul nga but’, 
nri bod rogon ni u mu felfelan’ ko mogoth ni tay yu Israel ni gag e suwog. Burey nu Seir, nge ga’ngin e nam nu Edom, e bayi mogothgoth. Ma aram e bayi nang gubin e girdi’ ni Gag fare SOMOL.”