NAHUM.
2.
Nineveh, kan mael ngom! Fare gelngin ni nge biligem e ke yib. Mu fal’eg rogon e talin e cham rom! Mu matanagiy e kanawo’! Mu fal’eg rogom ko mael! ( 
I SOMOL e nge fulweg e fla’ab rok yu Israel nga rogon, ni immoy u m’on ndawor i giliw nagrad e pi to’ogor rorad.) 
Pi salthaw ni to’ogor romed e karfeked yungi shield ni row ma karon’ed madan e salthaw nib row. Kar flaged rograd ni ngar chamgad! Pi chariot rorad e be mat ni gowa nifiy! Ma pi os rorad e der paslag ko bukey. 
Pi chariot rorad e be mil nib mus mirin u daken e yupa’ i kanawo’, ni yad be yan ngu’ur sulod nib math’ marin u lukngun e binaw. Be matmat ra’en e pi chariot nem ni gowa mol’ ni be gachgech u but’ ni gowa uluch. 
Ke yan e pong ko tayugang’ ko salthaw, yad be athamgiliy i dol’dol’nag e yan nga m’on. Pi’in karbad nni cham e ra gur niged yad ko fare yoror ngarbad ra suweged e shield ngalang ni nge yororiyrad ko buthyoror. 
Pi garog u charen e lul’ e go’ pil nge mab; me sug e marus u lan tafen e pilung. 
Ni fek le’engin e pilung ni kalbus; me gowol e pi tapigpig rok ni bod e dove mu’ur pirdi’iyed ngorngorrad u fithik’ e kirban’. 
Gowa bangi ran ni puth e chabog riy e aram rogon e girdi’ nra milgad u Nineveh! Me yan lunguy ngalang ni yibe ga’ar, “Ngan tal! Ngan tal!” ma dariy be’ ni sul nga tomur. 
Ni leag e silber! Ni leag e gol! Fare binaw e ba sug ko machaf! 
Nineveh e ke mogothgoth, dakuriy be’ riy, kann’ag! Ke ranran e pi gum’ircha’ ni marus; ke dada’ e bug u ey, dakriy gelingiy; ke ol owchey. 
Ere bu uw fare binaw e chiney ni fa’an gowa tafen e layon, ni aram e gin un durwi’iy pifak e layon riy, ni ku aram e gin ma yan e layon ni pumo’on nge ppin ngay ngu’ur ayweged pifakrad riy ni dabi buch ban’en rorad? 
Fare layon e li’ k’on nge popof nge yochyang ni fan ngak le’engin nge pifak; me suguy tafen ko ufin nike popof. 
I SOMOL ni Gubin ma Rayag Rok e be ga’ar, “I Gag e to’ogor romed! Bay gu urfiy e pi chariot romed. Ma pi salthaw romed e bay ram’ad u fithik’ e mael, ma bay gu fek u pa’med urngin e tin mu feked rok e girdi’. Ma tin nge yog e pi tamal’og romed ni ngan rin’ e dab kun rung’ag.”