1 Yanu Itaria orofaro aneta ue bou utate Foroini moana dibura uwaraini mui ami kafiteniba mata. I kafiteninu ifuna Juriasi. Dana Sisa Agasitasi waita danu ami amara. 2 I amaraini boutiro amusi. I boutina Adamitiuma suroma fari. Nono owefite Eisia orofa su suro mubie ani. I boutiro yaini mui amaraini danu ifuna Aritikasi, dana Masadonia orofa Tesoronaika su amara, dawaini i boutiro amusite anisi. 3 Wai uriro anebe Saidoni su fasi. Juriasima danu imueta derawere Forobai odiro Foroma boutiroma itarite suro ani. Danu domayamutubai yadama ani. 4 Ane farite iroma owere ariro nono boutiro anisi. Oyau derawere fariba Saifurasi mutumutu dubenaro anisi. 5 Anebe anebe ane enea abanaro fasi. Iroma anebe Sirisiaini Famufiria su serigari usite amusite Risia orofa Maira su ido fasi. 6 I ami kafitenima mui Itariaro aneta bouti dobere ane atanite ya nesia woure i Arekisana suroma fari boutiro odi.

7 Maira su ekoisite anisi. Oyau derawere fariba moana kowaro kekerama anebe anebe Sinadasi su serigari usi. Oyau derawere farite yanu aneta daba garari uiba Kuriti mutumutu iboro Saramone su baworo fare anisi. 8 Yanu anetana kimuwereba kekerama anisi. Kekerama anebe i kobere Dera Boutinu ibeta orofaro fasi. Rasia suna i orofabai.

9-10 Yanu aneta kowa kekerama anebe sau ane farawa usiba yanu mui aneta dabana aramawere. I Godima Isaraero uwara Ijifiroma woure aneta ogaro me siniba iba bouti kowana me. Kowa serigari uiba Foroma wei, yawe, nanu imuetana eno, anibeisina yanu boutini egoini arama ufitaro moana uwara ofe arama ufiro uifitaita wei. 11 Eno weiro ami kafiteni amarama nautawa uite i bouti yawoeta uwaranu sina naui. 12 Oyauini obi kowa fariba yanu bouti ibeta orofa ba meba mui Kuriti mutumutu bouti ibeta orofa, Finiki su mubete iro ibifene weita.

13 Kiki oyau farite kobererau uiro we imuta, yanu aneta kowa farinu we imutate emanu bouti anika ma youtaro Kuriti magua gigirari anisi. 14 Anebisiro oyabibi derawere farite enea abanaro bouti woure ani. 15 Bouti ma owefitae utana enanari utawa uiba ekoitaro oyabibima bouti ure ma berairo ani. 16 Anebe anebe Kauda mutumutu dubenaro anisite yanu ma yousi dinigi ma youre bouti deiro oisi. 17 Bouti saragari uosoba imusite kimu na musite bouti uwane ma kimu usi. I bouti yawoeta uwarama weita, Afirika maguaro ma berafiro anibene weitate iya uyareda i dei farai mune wo tarata. Eno utaro oyabibima bouti ma berairo anisi.

18 Wai urina ufe derawere uyariba i boutiro uwarama ego mu sataro enearo itari. 19 Etei mui kowaro bouti ibaiabai nesia ane ane mune sataro enearo itari. 20 Oyabibi kowa faiyawere farebe kowaini sakaraini muinaini ba me uiba yana imusina uifeisi eno we imusi.

21-22 Kowa faiyawere ieta itawaba Foroma i uwarabai farite wei, yawe, aneba nanu auboko we sina nautawa uta? Aneba Kuriti orofa ekoitaba ewa ibaiabai nesia abe sanaita weite wei, iya da uyawete neno kimu uawe wei. Yana da uifeisi wei. I bouti torowa arama ufisu wei. 23 Ewa dumuro Godinu aneru nabai farinu wei. I Godi, na imuegou utatane wei. 24 Danu aneruma nabai farinute wenu, Foro iya da uya wenu, Sisabai anibate danu iboro inafasu wenu. Ewa boutiro anaita uwara nesia da uifoita wenu. 25 Eno wenuba enanari ufisu, na imutatane, Foroma weite wei, ibago buna uawe wei. 26 Mui mutumutu maguaro bouti amufisu wei.

27-28 Uiki sadei me siniro Eidiria enearo me anisi. Dumu abanaro bouti gaukara uwarama we imuta, magua baworo we imutate emanu towoeta na sataro enea ubarero itari. Itariro danu yafa etana foti (40) mita eta. Bouti aniro nono sataro enea ubarero itariro etana toti (30) mita eta. 29 Etate we imuta dera gebiro ane amufeisi we imutate anika fo (4) mune jogono afu enearo sataro itari. Itariro bouti kimu ui. Emanu unu kowa amufie iba guriguri uta. 30 Moana bouti gaukara uwarama bouti ekodifitae dinigi nama doitate oitaro itari. Itariro weita, mui anika bouti iboro sabeisi irue weita. 31 Eno weitaro Foroma ami kafitenini ami uwaraba wei, i uwara anibitaitana ya nesia uifoita wei. 32 Weiro ami uwarama na umane tutaro dinigi ani.

33-34 Waibai Foroma wei, uiki sadei ieta itawa ibinitaba ieta iawe weite wei, buri age ofe ubu arama da ufisu. Ieta iawete buna uawe wei. 35 Eno weite i uwarabai buredi munite Godiba we ma kobererau uite buredi ma biraite i. 36 Eno uiro etate ido ieta ita. 37 I boutiro anita uwara nesia tu aderedi seweniti sikisi (276) uwara etate ita. 38 Ieta ie me sitate uiti tai mutate enearo sataro bouti fe ui.

39-40 Wai urina magua etate i orofa iwawa uta. Utate i wanasi etana kobere magua eta. Etate iro anibitae weitate anika umane tutaro ibi. Eno uteda jogono ma owereta jawe nesia na uregari utate ibo farai sataro maguaro anisi. 41 Ane bouti ibo enea ubare gebiro duboro amusiro bouti kimu ui. Ufe derawere boutinu jogonoro urebiro bouti berugari ui. 42 Ami uwarama emanu kafiteniba weita, dibura uwara me sara aine anibitaitana ma uifeisi weita. 43 Weitaro ami kafiteni dawa unutawa Foro uieta iba kodiawe weite wei, ogo iwata uwara itawete aine aniawe wei. 44 Ogo iwata me uwara i boutiro ibinu ibaiabai o ana o ane ane mune sawete deiro aine aniawe wei. Weiro eno utate i uwara nesia maguaro ane amue me sita.