18
Babilon kwom yaper tem.
(Aisaia 21; 47; 48:20; Jeremaia 50; 51)
1 Sene an lam, God reri kwomri agerbo tame wuri re Heven mesegenen yerem. God re rene saberawiy newom, reri wesom yabelkap pasemke, nowsel eikap beran yabel buwbokap tem. 2 Re tuma yaye op wem.
Kwom sag bukre Babilon,
te yaper teye.
Te yapersubuwai teye.
Gwopte arkwu gambokene
omugambokene rem
etek tetane.
Metkereke yaper saper ap
rem etek kirkir tetane.
(Aisaia 21:9; 13:21)
3 Aboyei nowselri tatame rem
Babilon kwom etetri
ok yaper an sebera ya
wule nenbem.
Nowselri keryen yen rem
tekene muye bisi yibem.
Teri wos hogiye potbo wulekap,
nowselri kel yaku nenbo
tame rem kel nugwape
etopkap wulek potbem.
(Aisaia 23:17; Jeremaia 51:7)
4 Sene an metem, agerbo tuma wuskiy Hevenke op webem.
Ari tatame. Kem Babilon
kwom mesegen. Kem
tene mesegen.
Kem teri nenbo wule yaper
mane nente.
An tene yaper sein nente
tetane. Kem tekene
kirkir yaper kap tete.
(Aisaia 48:20; Jeremaia 50:8; 51:6)
5 Teri wule yaper te putuwen yawun Hevenke tem. Teri nenbo wule yaper God re som habobo. Re be serte.
6 Teri kemne nenbemkap,
kem tene sein etop
nente.
Te kemne yaper nenbemkap,
kem sein tene tewo pes
yaper nente.
Te ok yaper warek tin
kemne newon abemkap,
kem tene sein ok yaper
tewo pes newon ate.
7 Te teri sig kworer gabon
op habom.
An keryen ta bukre.
An keryen yenri wolbayek sitene.
An wane ta bo.
An mokwo mapurke site.
Te teri sig kworer
nenuwbemkap,
te wosbas nugwape
potbemkap,
kem tene yaper etopkap
sein nente.
Te mus tewok tewok
meten kirate.
(Aisaia 47:7-9)
8 Kitimena Sikabewaikene
Keryen Yen God,
re tene tuma nenen yaper
sein nente tetane.
Yabel wuriwouke te
sikanuma bukre potte,
te kirate, te akwoi site,
tene kerke eite tetane.
9 Nowselri keryen yen rem tekene muye bisi yibem. Metkereke wule yaper rem tekene kirkir nenbem. Tene eibo ker bow late, rem er kwom sag lan pap yaperwai ten kirate. (Esekiel 26:16-17) 10 Rem teri kira taye mette, rem me aken tekene yaper kap ten kaike teten leklek tete. Rem lan op wete. Pap metbo. Babilon kwom sag bukre, kitimenakene kwom sag. Yabel wuriwouke God re nene yaper sein nenye.
11 Nowselri natokwo kerebo tame rem tene kirkir kira mokwote. Tatame rem remri wosbas sene be tupate. 12 Remri wosbas gwor. Gol, silva, malebo pa, gaituk yenbo, agerbo agerbo sepatebiy yenbo, wulkap, kupkap, kilapunen kwoi weskap sepatebiy, hekna habona boskene me, por rerke nenbem wos, tokwo bukrek tupabo mek nenbem wos, braske nenbem wos, ainke nenbem wos, pak nenbem mikkene wos, 13 awos nenen abo me wes, sikiy, aseneka, boskene me ner, kwar yenbo, wain ok, teya kwar, wit sibuw, wit supa, bulmakau, sipsip, hos, hoske liten yibo pere, yaku bop nenbo tatame, kwom lelen keikerem tatame etem mere. Er wos nugwape rem sene be tupate. 14 Kel yaku nenbo tame rem Babilon tene op wete. Neri potte pap tetebo wos, rem yaper tekeipye. Nugwape hekna habona wosbas yenbo kanbo rem ab yaper teye. Sene ne er wos soplaweite tetane.
15 Babilon kwom kel yaku nenen kel nugwape potbem tame, rem akte, rem teri metbo mus kirkir kap mette. Eker rem kaike teten pap yaper ten kiraterte.
16 Rem op wete. Pap metbo. Kwom sag bukre tene pap metbo. Kiyi te wulkap tame oub yenbo wun sowurbem. Te agerbo agerbo kupkap sepatebiy, kilapunen kwoi weskap sepatebiy wolebem. Kiyi te gol, me malebo pa, gaituk yenbokene kerap wolebem. 17 Yabel wuriwouke teri nugwape kelkene wosbaskene rem yaper teye.
Aboyei sip berai kerebo tamekene sip tupan yibo tatamekene sip yaku nenbo tamekene agerbo agerbo kersepkap okke kel yaku nenbo tamekene rem kirkir Babilon kwom kaike tetemenem. 18 Rem Babilon kwom eibem ker bow lan yaye kirgwowon op wem. Babilon et kwom sag bukrewai. Agerbo kwom opkap bo. 19 Rem pap yaperwai ten rem til waren kirawe basewe tuma op wem. Pap metbo. Kwom sag bukre te yaperwai teye. Aboyei kersepkap okke yibo sip mutame rem teri kel poten wosbas nugwape tame tem. Sene bo. Pap metbo. Yabel wuriwouke et kwom te yaperwai teye. (Aisaia 23:14; 24:8; Esekiel 27:26-36)
20 God reri kwomke tetane tatame kem okbop te. God reri tatame, Jisas reri werasen yi tame, reri tuma wesowbo tame, kem metekwasen okbop te. Babilon kwom te kemne yaper nenbemkap, God re tene tuma nenen yaper sein nenbo. Eker, kem metekwasen okbopwai te.
(Lo 32:43; Jeremaia 51:48)
21 Sene God reri kwomri kitimenakene tame wuri, re pa sapekene, wit supa besbo pakap, nenewaye poten kersepkap okke sokwunen op wem. An er pa sokwunbokap, Babilon kwom bukre etopkap yaye sokwunte tetane. Tatame rem er kwom sene be late. 22 Gitakap wos taye, tatame tuma wuskiy, ame puw taye, puw bukre taye, sene be mette. Er kwomri metkereke yaku nenbo tame remne sene be late. A yaku om yaku nenbo kukwon er kwomke sene be mette. 23 Er kwom kerkene tuwkene sene be late. Agerke narpanetene tatame remri tuma wuskiy sene be mette. Babilon kwomri natokwo kerebo tame kiyi remri sig bukre temenem, sene bo. O Babilon. Ne aboyei nowselri tatame remne yikokon piyaruw yaper nenbem, sene bo.
24 Babilon kwom te God Reri Tuma wesow tamekene rene omuteke habobem tatamekene remne pen sabem. God re remri nep eter Babilon kwomke lam. Nowselke temenem pen sam tatame remri nep kirkir, re etekwou lam. (Jeremaia 51:48-64)