2
Ta keryen tame keryen eme God eteri wule yenbo sete.
1 Neren, ne tatame emne tuma yenbo somoken noub wusoute. 2 Ne emne etep wote. Tame keryen eme ok yaper mane an sisi pete. Eme wule yenbowou abote. Eme emri selpap wusom noub lakerete, eme wule yaper mane nente. Eme kenawaike abobe wule yenbo som sete. Eme kobo labe wule som sete. Be wos yaper emne tete, eme God erne beke kip mesgin.
3 Ta keryen eme gwopkap wule nente. Tatame eme God erne kenawaike abon yenbo nenbekap, eme etepwou nente. Eme kerebe tuma mane wote. Eme ok yaper abe wule eteri kulke mane wurte. Eme wule yenbo peterate. 4 Eme mungu ta emne wule yenbo wusoute, mungu ta eme gwopkap wule nente. Eme emri yenken tameken emne noub abon yenbo nente. 5 Eme emri selpap noub lakerete, eme yaper mane nente. Eme sir mane yite. Eme emri yenken tameken emne noub nente. Eme tame etemri tuma meten yenbo nente. Etep nente, epkap tatame eme God eri wule mapeke yaper wo? Berai.
Taitus ere wule yenbo nente, tame taureyen eme lan kir nente.
6 Tame taureyen emne ne kir wote. Eme gwopkap wule nente. Eme emri wusomken selpapken noub lakeren wos yaper mane nente. 7 Neren kir, be wos be wos ne nente, ne wule yenbowou nente. Etep nente, ne tame taureyen emne wule yenbo peterate. Tuma wusoube yaku ne som kerete, ne tuma sekenwou wote. Sou tuma yaper mane wote. 8 Ne tuma yenbowou wote, neri peiktame eme nene tuma mapeke wote? Eme nene tuma wolawoyin, eme sebera yate nenbe.
Yaku kerebe tame eme yaku lakerebe tame etemri tuma mette.
9 Ne kel yaku kerebe tame emne wote, eme gwopkap wule nente. Eme yaku lakerebe tame etemri kulke temente. Etepkap, lakerebe tame eme emri yaku metekwaste, eke eme yaku yenbowou kerete, eme emri tuma mane naswoite. 10 Eme emri wos sirke mane pette. Eme wos yaper mane nente. Kwokwos kwokwos eme emri yaku yenbowou kerebet. Etep tete, neremne Sene Petbe Tame God eteri tuma ere sig yenbo pette.
Nema God eteri wule yenbo nenen yin Krais eter yate nenbe yabel noub kowun simente.
11 God ere akei tatame emne kobo lan sene pette wule genik tem. 12 Ete wule ere nemne etep wobe. Nema God erne magel sene mane taite, nema nowselri wos mesginte. Nema porere yenbo nente, nema yenbowou nente. Nema God eteri wule noub sete. Nema temente, nema etepwou nente. 13 Nema etep tetan, nema wos yenbosubu metekwasen kouten. Neremri Keryen God eisau, nemne Sene Petbe Tame, Jisas Krais, epri yenbo tetankap, ere kom genik tete nenbe. Nema eteke koute. 14 Kiyi nema yaperwai temenem, Jisas Krais ere nemne kobo lan sam. Ere nerem nenbetem wule yaper peten sepitim, nemne sene petem. Sene petem, nema eteri tatame yenbo tem, nema wule yenbowou nente pap etewouke tebe.
15 Ete tuma ne tatame emne wusoute. Ne emne ete tuma wote, eme ete tuma noub meten tobote. Wule yaper nenbe tatame emne ne emne noub wote, eme wule yaper mesginte. God ere nene ete yaku newom, eke tatame eme nene yaper mane wote, nene mane teitkwunte.