1 Yekob kuu bobnoone, Yosef kuu ameng kame kankankune mandamuk kerunoon. 2 Kwane, yembed ye dokta yaa yedmendoonkob, yimbed mangki ye dowad Yekob ye bob id yaa andowe nekwiwen. 3 Baeb amuniib, bob id deendindeban ye muramurayiib nekwiiwe wene aron 40yiib dowan kereen. Kuye Idyipdan yi bob id nekwi yaron areb. Bobnoone, Idyipdan kwangkon ye yaa mimyob keeniwen. Yi kuu mimyob darewoowiib kowe, ameng kamiwen kuu wene aron 70yiib dowan kereen.

4 Kwane, mimyob keeni yaron dowan keruune, Yosefbed wene king Fero ye korok korok yaa yedmoon “Yiib kuu ne yaa dowakeniib keribka, Fero yaa ne dowad yedmime 5 ‘Nambembed yedmoona, amob ongmaan kuu nambe bobnaneen kuu kanwene ye bobkonombon Keenan ambibkin aom nidkoon kwaom kumbed mangkaniin andaan. Amob kee kowaan kowe, ebbed ee yimin andebka, ne kuu kwari wene nambe ye id mangkekori igakman mananiin.’ andime.” ande Yosefbed yedmoon. 6 Kwane, yedmiiwe Ferombed man yedmoon “Eb ambembed yedmoonkob, amob ongmewen kowe, kwane kan kwari wene eb ambe kuu mangke.” andoon.

7 Kwanandoone, Yosefbed yambe mangkok wonoon kuu ye yoom Fero ye korok korokdan yoom 8 Yosef awene yoom yambe awene yoom yi korem kwamune winiwen, kumban Yekob aweene yi kewed koyuyiib danayiib kuu winindo. Yi kuu yi dingkan kab oone dobiriwen, okad Gosen aom. 9 Yosef yoom winiwendan kuu karuwiib yi hosiib, hos yoman ari dobiriwed kirodmo yarebi yeman aningko seriot kuyiib yi karuwiib hosiib kowe, yemoon winiwen.

10 Weneniiwa, ok Yorden dia wene Atad ye flawa ye yob kad bangkanabimbon yaa yinmonekoriwa, Yosefbed bob yuudi ameng kame diboroone, mimyowiib ameng darewoob kamiwen, aron ediib dowan kereen. 11 Kuyaron kuu Keenandan yi yaa wedmekorib yedmiwen “Idyipdan kuu bob yuudi ye dowad dibiib.” ande yedmekorib, keyaa kee aningko yeeb Abelmisraim* Abelmisraim yaningko ye id kuu “Idyipdan yi bob yuudimbon”. ande kowiwen.

12 Kwane Yekobbed ye karub dana yaa amob weng daande kowoon kuu kwaniwen. 13 Yimbed ye bob kande Keenan ambibkin aom wene okad Makpela ye botdem aombed mangkiwen. Botdem kee Abrahambed Hitman Efron yaambed botdemiib mongkoboniib Mamre dia bob mangkimbon ye dowad berengkoon. 14 Mangke dowan kerekorib, yi korem igakman Idyip yiri winiwen.

15 Kwane, Yosef ye aagoroka wedmeniwen kuu yi awodki bobnoon kowe, Yosef yaa ika unekorib yikareb yedmiwen “Nubbed Yosef yaa ambarakmuwen ye kakman awine inandaneen dee?” ande uniwen 16 kowe, Yosef yaa weng keeniwen kuu “Eb ambembed bobnindo aron anuk kuu yedmoon 17 Yosef yaa yedmime. ‘Eb aagorokambed eb yaa ambarakmiwen ye kakman kuu are nonondande. Yi kuu eb ambe ye God ye deme karub kowe, angkon yimbed komo arewa eb yaa kamiwen ye dabab kuu are nonondande.’ andoon kii!” ande weng keeniwen. Yosef kuu wengambere mimyob keende inok woon.

18 Kwane ye aagorokambed ye yaa mene bumangke okad yiri kirobekorib yedmiwen “Nub kuu eb deme no kakmaniibban awinembiri ye karub keruub kii.” andiwen. 19 Kumban Yosefbed yi yaa weng amuniib yedmoon “Unaiwaa! Ne kuu God ye yumbon kandaan dee? Dowan oo! 20 Yiib dowakenbed kuu ne yaa arewa kamiwen kumban, Godbed amonombe nub yaa amun kerundoon kowe, karub yemoon duknindo, wad doburuub kii! 21 Kwana kowe, yiib ne yaa unaib. Nembed yiib yoom yiib dana yoom yaa korobe oonaniin.” andoon. Kwanandoone, yi uni kuu dowan keroona dobiriwen.

22 Yosef awene yoom ye aagoroka awene yoom yi kuu Idyip ambibkin aom dobiriwen. Yosef ye weeb korem kuu 110iib. Wat doreen yaron kuu 23 ye dana Efraim ye awoya ari kuu wedmendoon. Angkon ye dana Menase ye dana Makir ye meed kwangkon wanabekorib, Yosef yaa kiriboon.

24 Kwane, Yosefbed ye aagoroka yedmendoon “Ne bobni aron dia meneen. Kumban, anam kuu Godbed yiib yaa awandene be okad kee koronde okad Abraham yoom Aisek yoom Yekob yoom yaa amob ongme kowoon kuyaa kuu be wananeen.” andekore, 25 yambe Israel ye karub dana yaa daandekore, ika amob weng yedmoon “Anam, Godbed yiib yaa awandaneen kowe, ne bob id kuu keyambed mangkaib, be winime.” ande amob weng ongme kowoone, wiim aangkiwen. 26 Kwane, Yosef kuu ye weeb 110iib dobere bobnoon. Kwane ye bob kuu baeb amuniib bob id muramurayiib nekwiiwe, Idyip ambibkin aombed babang aom kambiriwen, kuned mangkindo.