1 Kwane, nedbiwendan kuu dembenib, Yesu nendore Pailetiib yaa winiwen. 2 Kwane, yimbed Yesu ye dabab weng kuu Pailet yaa daaniwen, “Karub ke awinenuwen kei, yembed nub nimakarub kuu kiwaan abdon ari ben wanandameen. Kwane, Saesaa yaa tak od kowimban ande yedmene yekareb ye kuu Keresu, king maa andimaan.” andiwen.

3 Kwanandiiwe, Pailetbed Yesu yaa kaamonoon, “Eb kuu Yuudan yi king dee?” andoon.

Andoone, Yesumbed inandoon, “Ebka ku yedmeeb kui.” andoon.

4 Kwane, Pailetbed God dore Yuudan dore wedyiri dobiridan yi korok korokiib nimakarub menebiweniib yaa yedmoon, “Karub keye ambarakmi kuu ne ma wedmindo.” andoon.

5 Kumban yimbed angkon ika ika dakmiwen, “Kuned yembed Yudea ambibkin kumundin aom kuu nimakarub yaa nubka ooni ye weng dakmenaboone ye kedmengkandi yaambed yirinde baande kamiwen. Galeli yaambed andowe mene keyaa kei!” andiwen.

6 Kwane, Pailet kuu wengamberekore kaamondoon, “Ye kuu Galeliman dee?” andoona, 7 “Ee” andiiwe, “Anam, ye kuu Erod ye aromkono dabderem yirimbed dobiri yeman.” ande meenoon. Kuyaron kuu Erod kuu Yerusalem aom doreen kowe, Pailetbed yedmoon, “Yesu kuu ye yaa nenwinime.” andoone, nenwiniwen.

8 Kwane, Erod kuu Yesu wedmenekore, kubi darewoob keroon, amborom kuu aron doboob kuu Yesu wenganande kamembirimaan kowe. Erod kuu Yesu komo kamoon kuu wengamboroon kowe, ye dowaken kuu Yesumbed God yaromkono wedmi yeman ambangkoko wedma ande kamoon. 9 Kwane, Erodbed Yesu yaa kaamobi yemoon kamoon, kumban Yesu kuu wengiib ma inandindo.

10 Kwane, God dore Yuudan dore wedyiri dobiridan yi korok korokiib Yuudan yi amob kedmengkandidaniib kuu kuyaa doberenib, arud darewoowiib anam ambarakmoon kii andi ye weng korok yaa dakmenabiwen.

11 Kwane, Erod yoom ye ana nangmidan yoombed Yesu yaa damangkanenib ambon baaneniwen. Kwanekorib, yimbed ebkad manimanandeb doboob derenenekorib, “Ika Pailet yaa nenwinime.” ande yedmiiwe, nenwiniwen. 12 Anuk kuu Pailet yoom Erod yoom kuu bon kerimaib, kumban kuyaron ari kuu angkodmi keriwen.

13 Kwane, Pailetbed nimakaruwiib God dore Yuudan dore wedyiri dobiridan yi korok korokiib Yuudan yi korok korok yenayiib kuu baandoone mimyamo keriwen. 14 Kwaniiwe, yembed yi yaa yedmoon, “Yiibbed karub kee ne yaa nenmenenib yedmiib kuu ‘Karub kee nimakarub yaa oneki weng dakmene “Gapman yaa nangme nubka oonem.” ande yedmimaan.’ andiib. Kumban anuk kuu yiib kiringkono arimbed kaamonenaan kuu yiibbed dakmiwen ye ambarakmi kuu ne ma wedmindo. 15 Kwane, Erod kangkon ye ambarakmi ma wedmindo kowe, angkon ika yedmoona nub yaa ke nenminiwen kei. Wedmime, ye kuu aye kowi dowad ma ambarakmindo! 16-17 Kowe, ukum maa konekori, domonenaniine wananeen kii.” andoon.* Buk Luk kurin kurin wongkiwen yenamo kuu weng keyiib: Yuudan yi Burudandoon ye orok yaron ari kuu korok kuu Yuudan yi dowaken weng wengamberekore, wii aom doriib ye karub mimo nen bunangka kowimaan.

18 Kumban nimakarub korem ibmo komkiwen, “Ye kuu aye kowi yeman kui! Barabas kuu domonenebko wonok!” andiwen. 19 (Barabas kuu wii aom kamoniwen, amborom kuu yembed Yerusalem aombed gapman yaa bon kere nangmene karub maa aye kowoon kowe.)

20 Pailet ye dowaken kuu Yesu domonenako wonok ande meenoon kowe, yembed yi yaa ika yedmendoon, 21 kumban yimbed ika komkenabiwen, “Ye kuu aye at ming arimbed kinime! Aye at ming arimbed kinime!” ande kamiwen.

22 Kwane, ayoobmim andi Pailetbed yi yaa yedmoon, “Komoyiibkob? Ye ambarakmi kuu komo kamoonkob? Ne kuu aye kowi yeman ye id kuu ma wedmindo. Kowe, nembed ye kuu ukum maa konekori domonenaniine wananeen kii.” andoon.

23 Kumban yimbed kwane ika naawonmo komkiwen, “Yesu kuu aye at ming ari kowi yeman!” ande kamiwen. Kwani kowe, yi wengbed maa ye weng maa ye weng burudande yi komkimo keroon.

24 Kowe, Pailet kuu ye inamen kuu korondene, “Kwane ambangka.” ande yedmoon. 25 Kwanandekore, yi dowaken keriwen ye karub arewa, ye kuu nen bunangka kowoon kumban, ana nangmidan yaa yedmoon, “Yesu kuu yi dowaken yaambed ukum konime.” andoon.

26 Kwanoone, ana nangmidanbed Yesu kuu nenwiniwen. Kuyaron ari kuu siti Sairinman yaningko Saimon kuu Yerusalem aom aomnene meneen. Kwane, ana nangmidanbed awinenekorib, Yesu ye at ming kankarine wonok ande dedmobeniiwe, kankarinene Yesu ye yoman doroone winiwen.

27 Nimakarub yemoon kuu Yesu ye yoman weniib. Nima yena kuu mimyob kowekorib, yuudanenib ameng kamiwen.

28 Kumban Yesumbed amonombe yi yaa yedmoon, “Yerusalem nima, ne dowad ameng kamaib, yiibka yiib dowadiib yiib danaya yi dowadiib yaa ameng kamime, 29 amborom kuu dabab darewoob ye aron mananuune nimakarubbed yedmaniib, ‘Kabeyob aom wanabindo ye nima kuu amun kerundoon! Dana muk anindo ye nima kuu amun kerundoon!’ andaniib kowe. 30 Kwane, nimakarubbed aangko aangko yaa yedmaniib, ‘Nub ari kombere dabundime!’ andaniib. 31 At awoyeeb areb ne yaa kwane kamiib kowe, at kok areb yiib yaa kuu komo kamaniib?” andoon.

32 Kuyaa kuu amob dookbidan ayoob kangkon Yesu yoom be winiwen, yenib nongkobi dowad. 33 Kwane, Yesu yoom amob dookbidan ayoob yoom kuu benwene duknimbon yaningko Nangkarak ari winiwen. Kwarimbed ana nangmidanbed Yesu kuu at ming yaa bakumbed darekorib kankoone maniwen. Kwane, amob dookbidan ayoob kangkon yi at ming yaa dariwen. Mamaa kuu Yesu ye angkara wiwi angka maniib, angkon mamaa kuu an angka maniib keriwen.

34 Kwaniiwe, Yesumbed yedmoon, “Ambe, yimbed kwamiib yaa are nonondandunde, yimbed kwamiib kuu yikaadban kowe.” andoon. Kwane, yebkad kuu ana nangmidanbed nekwenib, bot yaa yi aningkoyiib wongkiwen kuu kirare ebkad mimo karub mimombed kandimo kamiwen.

35 Nimakarub kuyaa doro kerenib, korok korokbed damangkane yedmiwen, “Ye kuu Godbed Kinoona Monoonman Keresu keroka, karub yena kuu bobni yaambed ongmendimaan kowe, dabab keyaa yekareb yemeren awanenokaa!” andiwen.

36 Kwane, ana nangmidan kangkon ye yaa menenib, wain ok kankoone 37 damangkane yedmiwen, “Eb kuu Yuudan yi king keroka, ebkareb ebmeren bobni yaa kuu awanene yoo!” andiwen.

38 Yesu ye at ming ari kuu kerekiib “Kekee Yuudan yi King” ande wongkiwen.

39 Kwane, amob dookbi ye karub maambed Yesu yaa baande damangkanoon, “Eb kuu Keresumbankowoo? Ebkareb ebmeren awaneneyaa! Kwane, nuwiib bobni yaa kuu awandeyaa!” andoon.

40 Kumban amob dookbi ye karub maambed yedmoon, “Kwamaab! Eb kuu God yaa unindokowoo? Ye dabab kandoon areb kwamune eb kangkon kandewen kui. 41 Anam, nub kuu ambarakmuwen kowe, nubbed bobni kuu yimin. Kumban karub kee ye kuu ma ambarakmindo kii!” andoon. 42 Kwanandekore, Yesu yaa yedmoon, “Yesu, eb oonimbon aom menebka ne nonondanduwaab.” andoon.

43 Kwanandoona, Yesumbed ye yaa yedmoon, “Nembed ke anam yedmebdaan kei, kibikee eb kuu ne yoom amunbon aombed dobaranuub kii!” andoon.

44 Kwane aronkob keruune, kumunbed okad korem kuu kebenoon. Kebenoone kwane wene awas ayoobmim dowan kereen. 45 Kwaneen kuu aron yurindo. Kwane, kurikuri boyambib darewoob niindem aom ye ambongko dem yaa kebeniwen ye dabua nomkono kuu biringkane ayoob keroon.

46 Kwanoone, Yesu kuu naawonmo komkoon, “Ambe, ne wadkeri kuu eb yaa kabdaan.” ande inum yeenbon narekore bobnoon.

47 Kwanoone, Romdan yi ana nangmi korok kuu kuyaa doreen kumbed komarewa kamoon kuu wedmekore, God yaningko kankoonene yedmoon, “Anam kuu karub kee yorokmo ye karub kii!” andoon.

48 Kwane, nimakarub yemoon kuu komarewa kamaneen kuu wedmi dowad kuyaa nedbe keenombiriwen. Kwane, komarewa kamoon kuu wedmekorib, mimyob wande abadkono yaa wangkanabe ika ambiwoom winiwen.

49 Kwane, Yesu yangkodmia korem kangkon kuyaa doriib. Yena kuu nima Galeli yaambed ye yoman miniwendan. Yi korem kuu ambab areb dobere komarewa kamoon yaa keenombiriwen.

50-51 Yuudan yi taun Arimateaman maa yaningko Yosef kangkon kuyaa doreen. Ye kuu yorokmo ye karub amun. Ye kuu Godbed korok kere ooni yaron munuk ande meedmeen ye karub. Ye kuu Yuudan yi korok korok wengyundidan Sanidirin aom kuu ye aningkoyiib, kumban ye kuu korok korok yenambed Yesu ayem ande dakmiwen kuu ye ee andindo.

52 Kwane, ye kuu wene Pailet yaa kaamonoone ee andoone, Yesu ye bob id kandande wonoon. 53 Kowe, Yosef kuu Yesu ye bob id at ming arimbed kan kubuderene dabua doboob kawanmombed bedmenoon. Kwanekore, Yesu ye bob id kuu kanwene dumnaddem baangke nidke ongmiwen aom kowoon. Bobkonombon dem kee karub bob maa kuyaom kowindo.

54 Aron kee Sabat ye nekwanabi aron. Aron kubunandamuun kowe, Sabat aron kuu andowandamuun.

55 Kwane, nima Galeli yaambed Yesu yoom miniwendan kuu Yosef ye yoman winiwen. Kwane dem kuu wedmenib, Yesu ye bob id kumaom komarewa kowoone angkimboroon kuu wedmiwen. 56 Kwanekorib, nima kuu ambiyoom winiwen. Wenekorib, baeb amun yemaniib bob id yaa ambeni yeman ye muramurayiib nekwiwen. Kwane, Sabat aron ari kuu Moses ye amob yaa yedme kowoon kwamune dibere yiidkiwen.