1 Yuq hkangmó gi, up é ahkáng ayá wó bâng é a-ô má nyì ra râ nghut lhê; hkâsu mù gâ le, Garai Gasâng chyáng mai za a nghut le gi, up é ahkáng ayá joq é a nghut. Joq tô é ahkáng ayá pé gi, Garai Gasâng èq byî tô é chyat nghut lhê. 2 Hau é yanmai, up é ahkáng ayá lé gumlau toq é sû gi, Garai Gasang byî tô é up é ahkáng ayá lé gumlau toq é sû nghut ri; haû su kut é bang gi, tarâ jéyáng é hui zo râ hkyô lé ho yù nyi é bang nghut akô. 3 Hkâsu mù gâ le, uphkang é bang gi, ge é hkyô kut bâng é matú gyuq nán hpo a dut é za, shut shaî hkyô kut bâng é matú sheq dut é ru nghut lhê. Up é ahkáng wó sû lé gyuq é mai lut nau lhê a nghut lhí? Haû jáng, ge é hkyô kut aq, haú hkûn, yhang, nang lé hkya-on râ nghut lhê. 4 Hkâsu mù gâ le, yhang gi, náng é matú ge é akyû kut byi râ nghut é, Garai Gasâng é dui-nhâng zoshâng nghut lhê. Nghut kôlhang, nàng, shut shaî hkyô kut é nghut le gi, gyuq nán nyî aq; haî mù gâ le, yhang gi, shâm lé ajè wun tô é a nghut. Yhang gi, Garai Gasâng é dui-nhâng zoshâng nghut mù, shut shaî hkyô kut sû lé dam byi râ matú nhikmo-yo Su é gunglik nghut lhê. 5 Haû mù luî, dam byi râ lé chiq é yanmai za a nghut, yhumsîng nhik bô râ é yanmai le, haû up é ahkáng ayá wó bâng é a-ô má nyì râ dut lhê.

6 Nungmoq hkansê kat râ é gi, hau é yanmai le nghut lhê; hkâsu mù gâ le, haû up é ahkáng ayá wó bang gi, Garai Gasâng é dui-nhâng zoshâng wuì nghut lhê mù, uphkang é mû lé, ahkyíng byíng shoq wùn waq nyi akô nghut ri. 7 Yuq hkangmó lé byi âng é eq rajung za byi keq: hkansê kat byi ang sû lé gi, hkansê kat byi keq; kang kat byi ang sû lé gi, kang kat byi keq; gyuq kyum ang sû lé gi, gyuq kyum keq; hkungga ang sû lé gi, hkungga keq.

8 Rayuq eq rayuq chyitdap lhûm é chyîn mai lai luî, hai chyîn le hkâdap lhum kó; hkâsu mù gâ le, góyuq lé chyitdap é sû gi, haû jep é tarâ lé lhoq dik bê sû nghut ri. 9 "Su-myi sulàng lú hkyô hkâkut," "Byù hkâsat," "Hkâhkau," "Hkâ-myoqnoq,"✡ Htoq Ló 20:13-15 gâ tô é hkunmó pé eq gotû hkunmó haî nghut nghut, "Náng gûng lé nàng chyitdap é su, náng é chyangnâm mâ é bang lé le chyitdap aq."✡ Nhong 19:18 gâ é tarâ má lo jup to bê nghut lhê. 10 Chyitdap myit gi, chyangnâm mâ é byù lé a ge é haî le a kut é nghut lhê. Haû mù luî, chyitdap myit gi, haû jep é tarâ lé lhoq dik é hkyô nghut ri.

11 Haû mù, ahkuî lhê é ahkyíng yàm-yoq lé sê gyo luî, haú hkyô lé kut keq. Nungmoq yhup mui é mai bûn gying râ ahkyíng jé bê; haî mù gâ le, nga-nhûng é hkyi yù hkyô gi, lumjíng hi é hkun lhê htoq má ahkuî je chyáng bê nghut ri. 12 Haû myín ahkyíng gi, lai byuq ló râ za nghut bê; nyí ahkyíng gi, jé lô berâ nghut lhê. Haû mù luî, mauchut é muzó lé tô pyám mù, maubó é gyehking lé wut to sháng. 13 Ye lhaî é eq shuq wut é, ashop é dông gungsho zùm yap é eq shut é dông nyì zô lhúm nau é myit bo é, mabyoq jishûm htoq é eq manon é pé a kut é za, nyí-káng lhê su, ge é a‑kyang dông nyì yap sháng. 14 Hau htoq agó, Yhumsîng Yesuq Hkrisduq lé, mebu su wut to keq; yubak gungsho ô nau é dông lhoq dik râ matú hkâ-myit kó.