15
Kwaan nle zee nzo nawent myet lo Dios
(Mr. 7:1-23)
1 Tub mbizh mroo lak xaa fariseo nu lak maestr xaa nlu xtizh Dios naz Jerusalén, mnabdizh lo Jesús, nu nzhé xaa:
2 —¿Chozhiin nanlet re xaa nseed lo lu re kwaan nzhé re xey be, xaa yilo? ¿Chozhiin nayanagt xaa gorna nzhaw xaa modxa nzhé re xey be yilo?
3 Jesús mnabdizh lo re xaa:
—¿Chozhiin nanlet re gu kwaan mxaal Dios le gu, leel re cheen xey be nle gu? 4 Nel Dios nzhé: “Kela lu xuz lu nu xnaa lu, nu xaa nge lo xuz o lo xnaa, bit gu xaa”. [Ex. 20:12] 5 Per gu mbezh nzho mod nii gu lo xuz gu nu lo xnaa gu: “Nagarlot mod le na yudar rop gu, nel rese kwaan mlake lo na mzala naya lo Dios”. 6 Nu loka xaa mbezh snee, nanzhaalt le xaa yudar xuz xaa nu xnaa xaa. Nu sbaaka nak re gu, re gu nlux re kwaan mxaal Dios le gu, nel nzhake gu tich re kwaan nzhé re xey be. 7 ¡Gu nak xaa nkade nu nanlet gu kwaan wen! Wen ngunii Chay, xaa mzaa kwent kwaan nzhé Dios lo lee xaa yilo. Mzaa xaa kwent cheen gu leezha nzhé xaa:
8 Lee re xaa ne nebse kwaan roo xaa mbezh na,
per lee lextoo xaa zit doo nzo lo na.
9 Kanxlee nzholl re xaa lo na,
nel rese kwaan seed re xaa nak kwaan mroo yek re myet. [Is. 29:13]
10 Zee lee Jesús mrezh re myet nu nzhé xaa lo re xaa:
—Kenzha gu kwaane nu bin guya. 11 Nalet kwaan nzhaw myet nle nzo nawent myet lo Dios, sinka kwaan nroo naz leen lextoo myet nak kwaan nle nawent nzo xaa lo Dios.
12 Zee lee re nu, xaa mseed lo xaa, mbii gax lo xaa nu nzhé nu:
—¿Che nanet lu lee re fariseo nayii mbin kwaan nzhé lu?
13 Jesús mkeb né:
—Lee rese yag kwaan namxent Xuz na, xaa nzob naz yiba, dub loxa yiib. 14 Laa xaa ba nel syeg xaa, nel chelee tub syeg wee leeka sasyeg syeg ropse xaa la leen yeer.
15 Pér nzhé lo Jesús:
—Né lo nu nal, ¿xomod nak wdizh nabix kwaan nguné lu lo nu?
16 Jesús mkeb né:
—¿Che nixa yek gu nanlata? 17 ¿Che nanlat yek gu, lee rese kwaan nzhaw xaa nla leen xpaans xaa, nu nrooya stuba? 18 Per lee kwaan nroo roo xaa, nzhal mer lextoo xaa, kwaan ba nle nawent nzo xaa lo Dios. 19 Nel leen lextoo xaa nzhal re xgab nawent ne:
gut xaa sa myet xaa,
zoblazh xaa chaal xaa stub ngwnaa,
lewann xaa,
gaazh xaa kwaan nawlit tich stub xaa,
gawyix xaa wechxinn xaa.
20 Kwaane nak kwaan nle zee nawent nzo myet lo Dios. Per leezha nanyanagt xaa gaw xaa, nanlet kwaan ba nle zee nzo nawent xaa lo Dios.
Tub me nanakt me Israel ngunaab jabor lo Jesús
(Mr. 7:24-30)
21 Jesús mroo baa nu nzha naz yizhyo cheen Tiro nu Sidón. 22 Nu lee tub ngwnaa Canaán, me nzho yizhyo ba, mbii gax lo Jesús nu dublegan nzhé me lo Jesús:
—Me Nabeyy, lu nak xaa dii cheen rey David, bles lextoo lu ne lu na. Lee xchap na nded doo bid nel nzho mbi mal lextoo mad.
23 Namkebt Jesús nik tub lan wdizh lo me. Nu lee nu, xaa mseed lo Jesús, mbii gax lo xaa nu nzhé nu lo xaa:
—Guzh lo ngwnaa ba zee nya me, nel nkee doo me rezh nzeke me tich be.
24 Jesús né:
—¿Che nanebt lo re sawlazh be mxaal Dios na, re xaa nak mod mbakxiil ma mzowen?
25 Per lee ngwnaa ne mbii gax lo xaa nu mkichxub lo xaa, nu nzhé:
—Me Nabeyy, le jabor lo na.
26 Jesús mkeb nzhé:
—Nawent kiib xaa pan lo xinn xaa nu zaa xaaya lo mbak.
27 Lee me nzhé:
—See naka, Me Nabeyy. Per noka nzhaw mbak re kwaan byog kwaan nzhab lo mes cheen xbixwann ma.
28 Zee nzhé Jesús:
—Ngwnaa, gro doo nak mod ngwii lu lo Dios. Gaka mod nle lu xgab.
Nu leeka gorzee ngokwen xchap me.
Jesús msekwen zyen doo xaa ne nzak
29 Jesús mroo baa nu mzhin xaa roo nistoo cheen Galilea. Zee ngwa xaa yi nu mzob xaa. 30 Zyen doo myet nkasa lo xaa pa nzob xaa. Nu nzheno re xaa xaa reenk, syeg, xaa nzhak net nii, xaa muud, nu re xaa nzak stub naz yalyizh. Ngwano re xaa xaa lo Jesús zee msekwen Jesús re xaa. 31 Nu lee re xaa nzhi ngwii mdedyall doo nu nzhé xaa:
—Lee muud nzho mod nzhadizh, nu lee xaa reenk nzho mod nze, nu lee xaa nzhak net nii nzho mod nze wen, nu lee syeg ngwii.
Zee mzelo re xaa mbill lo Xdios be.
Jesús mzaa kwaan ndaw tap mil xaa
(Mr. 8:1-10)
32 Jesús mrezh re nu, xaa mseed lo xaa, nu né xaa lo re nu:
—Nles doo lextoo na ne na re myet ne, nel nzhala chon mbizh nzo re xaa kwaan be nu nyent kwaan gaw re xaa. Nanzheklat na xaal na re xaa garli xaa nu nazaat na kwaan gaw xaa, nel napaka kayaguuzh xaa naz.
33 Lee nu nzhé lo xaa:
—¿Per pa yixii nu tub lanee kwaan gaw tub lanee myet, pa nik tub xaa nyent?
34 Jesús mnabdizh né:
—¿Lak pan nzeno gu?
Zee nzhé nu:
—Gazh pan nu lak mbal dik.
35 Zee ngunii Jesús lo re myet zee zob xaa lo yo. 36 Nu mzen xaa gazh pan nu lak mbal dik nu mzaa xaa dixkix lo Dios. Nu mlerol xaaya nu mzaa xaaya lo re nu, xaa mseed lo xaa. Re nu mdiiza lo re myet xaa nzhi baa. 37 Rese xaa ndaw axta nguzhe lextoo xaa. Nu gazh chekwid re kwaan byog mlake. 38 Nu tap mil xaabyi nak re xaa ndawa zee nu namloot nu kwent re ngwnaa nu re madwin. 39 Gwluzh zeera mxaal Jesús re xaa nya nu lee Jesús nguxoob lo tub kano nu nzha xaa naz yezh cheen Magdala.