1 Mroo Jesús naz ba, zee nya xaa naz lazh xaa, kwaan re xaa mseed lo xaa. 2 Leezha ngok zhe sab, zhe kwaan nzholl re nu lo Dios, zee mzelo Jesús mseed re myet, pa nkasa nu nseed nu xtizh Dios. Mdedyall re xaa gorna mbin xaa kwaan nzhé Jesús. Zee nzhé re xaa lo wechxinn xaa:

—¿Pa mseed xaa ne re kwaan nzhak xaa? ¿Che Dios mzaa rese kwaan nzho yek xaa, zee nzho mod nle xaa re kwaan gro doo ne? 3 ¡Xaa ne nak karpinter xgann Mari! ¡Re wech xaa nak Chag, Che, Judas nu Simón nu re bzan xaa nzho leeka nee!

Kwaanzee nanont Jesús lo re xaa, nu nixa nanzhont xaa xtizh xaa.

4 Jesús nzhé lo re xaa:

—Nik tub xaa nzaa kwent kwaan nzhé Dios lo lee xaa yilo, namkayaawent re sawlazh xaa xaa nu re sawlizh xaa nu re xaa nzho li xaa.

5 Namlet Jesús zyen kwaan gro lazh xaa, lakse xaa mzhib xaa yaa xaa cho nu ngokwen. 6 Nu ndedyall Jesús ngune xaa lee re sawlazh xaa nangwiit lo xaa. Nu zee mroo Jesús lazh xaa, nu ngwa xaa re yezh kwaan nzhi gax nu mseed xaa re xaa nzho re yezh ba.

7 Jesús mrezh chiibchop xaa kwaan mseed lo xaa, zee xaal xaa chopga xaa, nu nzhé xaa lo xaa:

—Za na yalnabeyy lo gu zee nzho mod koo gu rese mbi mal lextoo re myet.

8 Noka nzhé Jesús lo re xaa:

—Be gu tub garrot per naweet gu mas kwaan, nixa yex kwaan yo re xcheen gu leen, nixa kwaan gaw gu, nixa demi. 9 Nzhaal ke yelyed nii gu, per nanzhaalt wee gu stub naz ler.

10 Nu nzhé xaa:

—Loka xana yoo zhin gu, kwaz gu zee axta gorna yilo roo gu yezh ba. 11 Nu chelee tub yezh nanzheklat kayaa gu, broo gu leen yezh ba nu brib gu yide kwaan nkee tich xkyelyed gu, zee ne re xaa yezh ba lee re sawlazh xaa mle kwaan nawent.

12 Zee mroo re xaa ngwa, nu nzhé xaa lo re xaa zee laa xaa naletra xaa kwaan nawent nu wii xaa lo Dios. 13 Zyen doo mbi mal mloo xaa lextoo re myet, nu mteeb xaa anseyt cho re xaa ne nzak nu ngokwen re xaa.

14 Nu rese yezh mxonn wdizh cheen Jesús, zee mbin rey Herod re kwent cheen Jesús, nu nzhé xaa:

—Xaa ne nak Juan Xaa Nchubnis mroban, kwaanzee nzho mod nle xaa re kwaan gro doo.

15 Lee stub naz xaa nzhé:

—Lee Jesús nak Li, xaa mzaa kwent kwaan nzhé Dios lo lee xaa yilo.

Nu lee stub naz xaa nzhé:

—Lee Jesús nak stub re xaa mzaa kwent kwaan nzhé Dios lo lee xaa yilo, mroban.

16 Per leezha mbin Herod re kwaane, nzhé xaa:

—¡Lee Juan xaa mxaal na nguchoog xaa yek, mroban!

17 Yilo mxaal Herod zen xaa Juan nu mlo xaa Juan lozhyib, nel nayii Herodías ne Juan, nel lee Herodías nak sa Lip, wech Herod, per mka Herod me. 18 Nel Juan nzhé lo Herod:

—Nawent nkano lu sa wech lu.

19 Kwaanzee nayii doo Herodías ne Juan, nu nzhekla me gut me Juan, per nyent mod gut me Juan, 20 nel nzheb doo Herod ne Juan. Kwaanzee nkanap Herod xaa, nel ne xaa lee Juan nak tub xaabyi nambey nu nali nzo lo Dios. Nu nzaa Herod yek Herod nzhon xtizh Juan, nu gorna nzhon xaa xtizh Juan, nle doo xaa xgab.

21 Per tub mbizh mle Herod tub yalni gro doo, zhe kwaan nguxoob xaa liin. Nu mrezh xaa rese xaa nabeyy, nu rese xaa nabeyy lo re soldad nu rese xaa non re yezh cheen Galilea, zee mbid re xaa lo yalni cheen Herod. 22 Zee lee xchap Herodías mrep mkanii paro mzob Herod kwaan re xaa mrezh xaa. Nu lee Herod nyula doo mod mkanii me, nu noka re xaa mrezh xaa nyula mod mkanii me, zee nzhé Herod lo me:

—Naab kwaan nzhekla lu, na zaya.

23 Nu nzhé Herod lo me:

—Wlipa naya, loka kwaan naab lu lo na, za naya, axta nzho mod za na rol pa nabeey na lo lu.

24 Nu gorzee mroo mad nu ngwanabdizh mad lo xnaa mad nu nzhé mad:

—¿Cho kwaan naab na?

Lee me nzhé:

—Na nzhekla yek Juan Xaa Nchubnis.

25 Nu leeka gorzee ngwa mad lo Herod nu nzhé mad:

—¡Nal gorne nzhekla na zaa lu yek Juan Xaa Nchubnis, we na leen tub yann!

26 Nales doo ngok lextoo Herod, nel ngulola nzhé xaaya lo mad. Kwaanzee mton xaa chee xaa xtizh xaa, nel zyen doo xaa nzhi garli xaa mbin kwaan nzhé xaa gorna mcheroo lo mad. 27 Gorzee mxaal xaa tub soldad cheen xaa, nu nzhé xaa lo xaa:

—Gwachoog yek Juan Xaa Nchubnis.

Nu gorzee ngwa soldad leen lozhyib, nu mchoog xaa yek Juan. 28 Nu mlo xaa yek Juan leen tub yann nu mzaa xaaya lo mad, zee lee mad mzaaya lo xnaa mad.

29 Gorna mbin re xaa mseed lo Juan lee Juan ngut, ngwa re xaa ngunaab xaa kwerp cheen Juan zee kaach re xaa kwerp cheen Juan.

30 Gorna mbare re xaa mkayaa yalnabeyy lo Jesús, zee nzhé re xaa rese kwaan mle xaa nu rese kwaan mlu xaa lo Jesús. 31 Zyen doo xaa nzhi lo Jesús, nu nixa nanlat re xaa gaw xaa, kwaanzee nzhé Jesús lo re xaa mseed lo xaa:

—Laa be re xaa nee. Chaa gu ya be tub pa nyent xaa, zee nzho mod le gu deskans chep.

32 Zee ngu re xaa leen tub kano nu nzha xaa tub pa zit, pa nyent myet. 33 Per ngune re myet lee xaa nzha, nu mlebeyy re xaa xaa, zee mrexonn rese xaa yezh nzha. Nu mas yilo re xaa yezh mzhin baa zeera mzhin Jesús kwaan re xaa mseed lo Jesús. 34 Per gorna mla Jesús leen kano, mwii xaa zyen doo xaa nzhi baa. Zee mles lextoo xaa ne xaa re xaa ba, nel kwenta mbakxiil, ma nakanot xaa kanap ma nzhak re xaa. Nu mzelo xaa mlu xaa zyen kwaan lo re xaa. 35 Leezha nzhazhela yizhyo, re xaa mseed lo xaa mbii gax lo xaa, nu nzhé xaa:

—Mzhela yizhyo nu nyent xaa nee to kwaan gaw xaa. 36 Chech re xaa, zee yizi xaa kwaan gaw xaa re yezh nzhi gax nee, nu re rench.

37 Per lee Jesús mkeb lo re xaa nzhé:

—Zaa gu kwaan gaw xaa.

Zee lee re xaa nzhé:

—Lee re kwaan gaw tub lanee xaa non doo. Mas nona ke tub lal kwaan le xaa gan kee xaa zhiin tub gayoo mbizh. ¿Che nzhekla lu yazii nu tub lanee pan, zee zaa nuya gaw re xaa ne?

38 Jesús nzhé:

—¿Lak pan nkano gu? Gwasewii gu ne lak pan nkano gu.

Zee lee re xaa ngwasewii, nu nzhé xaa:

—Gaayka pan nu chopaka mbal.

39 Nu mxaal Jesús re xaa zee zob lakga xaa lakga xaa lo yix wen. 40 Nu mzob lakga xaa. Rol pa mri gayooga xaa, nu zrol pa mri choobchiiga xaa. 41 Zee mzen Jesús gaay pan nu rop mbal nu mwii xaa naz yiba, nu mzaa xaa dixkix lo Dios. Nu mlerol xaa pan nu mzaa xaaya lo re xaa mseed lo xaa, zee kiiz xaaya lo re xaa nzhi baa. Nu seeka mlerol xaa mbal, nu mzaa xaa ma lo re xaa. 42 Rese xaa ndaw axta paro nguzhe lextoo xaa. 43 Nu mtop xaa zchiibchop chekwid pan nu mbal kwaan mlake ndaw re xaa. 44 Kan tub gaay mil xaabyi ndaw.

45 Gwluzh ngulo mded kwaane, Jesús mxaal re xaa mseed lo xaa zee yixoob xaa leen kano nu ded xaa stub ta roo nistoo lo yezh Betsaida. Zee lee Jesús mlake lo re myet axta gorna chech xaa re xaa. 46 Leezha ngulo mchech Jesús re xaa, zee lee Jesús nzha naz yi zee wdizhno xaa Dios. 47 Leezha ngulo mzhel yizhyo, lee kano nzha xsaww nistoo nu lee Jesús techosa mlake naz roo nistoo. 48 Zee leezha merla kaxni yizhyo, ngune Jesús lee re xaa mseed lo xaa nded doo bid kazeno kano nel nroo doo mbi. Nu nanlat mbi nzeno xaa kano, nzobya mbi xkano xaa naz tras. Nzhakaxnila yizhyo lee Jesús nzhaze lo nistoo, nu mle xaa mod tub xaa tira dedyo lo re xaa. 49 Leezha ngune re xaa lee Jesús nzhaze lo nistoo, nzhé re xaa:

—¡Besa!

Nu mbazhe re xaa, 50 nel rese xaa mluya lo, nu mzheb doo re xaa. Per gorzee lee Jesús nzhé lo re xaa:

—Blo gu balor lextoo gu, nazhebt gu, nel naya.

51 Nu mzeeb xaa leen kano pa nzho re xaa, nu lee mbi mlaz. Ndedyall re xaa leezha ngune re xaa kwaane. 52 Nel namlat kwaan mle Jesús yek re xaa leezha mdiiz xaa pan kwaan ndaw re myet, nel mkaw yek re xaa.

53 Zee mded xaa stub ta roo nistoo, mzhin xaa tub yezh kwaan le Genesaret, pa mkado xaa kano roo nistoo. 54 Gorna mla Jesús leen kano, rese xaa mlabeyy xaa. 55 Nu lee re xaa yezh mrexonn mzhib re xaa ne nzak lo da nu nzheno re xaa xaa lo Jesús, pa nzo Jesús. 56 Palpa nzeeb Jesús, nya xaa re yezh gro nu re yezh win nu re rench, zee nyilaa re xaa re xaa ne nzak lo xbi nu roo naz. Nu naab xaa lo Jesús, zee zaa Jesús diizh gal re xaa ne cho xab Jesús, nu re xaa mgal cho xab Jesús nzhakwen.