1 Naꞌra inabaꞌ leꞌe: ¿Apsanlaꞌadyiꞌ Diuzi yaca benꞌ Israel? Pues bipsanlaꞌadyiꞌ Diuzi leyaquëꞌ. Hasta nëꞌëdiꞌ ulio Diuzi nacaꞌ benꞌ Israel. Nacaꞌ z̃icoꞌ z̃iꞌ isuba Abraham. Nacaꞌ familia quie Benjamín, benꞌ uzu tiempote. 2 Desde dza naꞌte beyuebëꞌ Diuzi benꞌ Israel ulionëꞌ lëjëꞌ gacajëꞌ benꞌ quienëꞌ. Biusanlaꞌadyiꞌ Diuzi leyaquëꞌ. ¿Binezile con cabëꞌ rnan lëꞌë guichi laꞌiya quie Diuzi ga rguixogueꞌn quie profeta Elías? Bigalaꞌadyiꞌle cabëꞌ bë profeta Elías, zuëꞌ rulidzëꞌ Diuzi udaohuëꞌ yaca benꞌ Israel xquia. 3 Unëꞌ rëbinëꞌ Diuzi: “Xuzaꞌ Diuzi, abëti benꞌ Israel yugulu benꞌ rguixogueꞌ diꞌidzaꞌ quioꞌ. Apquinuyaquëꞌ labecugo ta nueyaquëꞌ guixiꞌdaoꞌ ga rionlaꞌadyiꞌyaquëꞌ luëꞌ. Tuzaꞌ nëꞌëdiꞌ babegaꞌnaꞌ. Lëzi bareꞌenjëꞌ gutijëꞌ nëꞌëdiꞌ.” 4 Pero naꞌ una Diuzi gudyinëꞌ lëbëꞌ: “Cala tuzoꞌ luëꞌ begaꞌnloꞌ. Nenitaꞌ igadyi mila benꞌ naca benꞌ quiaꞌ, benꞌ birionlaꞌadyiꞌ ta pchaꞌa benëꞌ najëꞌ Diuzi quiejëꞌ.” 5 Cabëꞌ guca dza naꞌte, canaꞌ racan naꞌa. Nenitaꞌ tu chopa benꞌ Israel, benꞌ du guichi du dulaꞌadyiꞌ rue quie xtiꞌidzaꞌ Diuzi. Gusto quie Diuzi baolionëꞌ leyaquëꞌ gacajëꞌbenꞌ quienëꞌ. 6 Porque cala ulio Diuzi lëjëꞌ tanun quie danꞌ bi cosa bëyaquëꞌ. Chi tali rbio Diuzi raꞌo tanun quie bi cosa ruero, lenaꞌ huero obligado Diuzi cuionëꞌ raꞌo gacaro benꞌ quiëꞌ. Pero bisaqueꞌ huero obligado Diuzi, gusto quienëꞌ rbionëꞌ nu benꞌ reꞌen cuionëꞌ gaca benꞌ quienëꞌ.

7 ¿Ca biz̃i inaro quie benꞌ Israel? Bibëjëꞌ gan yugulujëꞌ gataꞌ yelaꞌ neban quiejëꞌ tuzioli. Yaca benꞌ ulio Diuzi, lëjëꞌ sí, bëjëꞌ gan. Psanlaꞌadyiꞌ Diuzi yaca los demás benꞌ Israel, benꞌ yaladyiꞌ. 8 Canaꞌ rguixogueꞌn lëꞌë guichi laꞌiya quie Diuzi cani: “Yelaꞌ yeladyiꞌ quiejëꞌ apchula Diuzi pensari quiejëꞌ ta bitzioñeꞌejëꞌ con cabëꞌ rna diꞌidzaꞌ laꞌiya quienëꞌ. Laꞌacazi rlëꞌëjëꞌ dyëꞌëdi, ruejëꞌ ca benꞌ birlëꞌë. Laꞌacazi reyaquëꞌ dyëꞌëdi, ruejëꞌ ca benꞌ bire. Canaꞌ raca quiejëꞌ hasta naꞌadza.” 9 Lëscanꞌ quie benꞌ Israel una rey David dza naꞌ con cabëꞌ rnën cani:

11 Naꞌra inabaꞌ leꞌe: ¿Yelaꞌ yeladyiꞌ quie benꞌ Israel apsanlaꞌadyiꞌ Diuzi leyaquëꞌ tuzioli? Cala tuzioli apsanlaꞌadyiꞌ Diuzi leyaquëꞌ. Pero racalë Diuzi benꞌ binaca benꞌ Israel ta hue quieyaquëꞌ xtiꞌidzëꞌ, naꞌ gataꞌ yelaꞌ neban quiejëꞌ tuzioli cuenda ilëꞌë benꞌ Israel cabëꞌ tahuen naꞌ raca quie benꞌ binaca benꞌ Israel. Canaꞌ huenan quie benꞌ Israel ínaojëꞌ xneza Cristo gataꞌrë yelaꞌ neban quiejëꞌ tuzioli. 12 Tahuen guca quie benꞌ binaca benꞌ Israel caora uquixi benꞌ Israel bibë quiejëꞌ xtiꞌidzaꞌ Diuzi. Pero huacara huen gula quie benꞌ binaca benꞌ Israel caora idyin dza inao yaca benꞌ Israel xneza Cristo, naꞌ gataꞌ yelaꞌ neban quiejëꞌ tuzioli.

13 Pero reꞌendaꞌ iniaꞌ leꞌe itu diꞌidzaꞌ, leꞌe benꞌ binaca benꞌ Israel. Pues tanun quie danꞌ useꞌelaꞌ Diuzi nëꞌëdiꞌ ta quixoguiꞌa leꞌe xtiꞌidzaꞌ Diuzi, lenaꞌ nacan belao ca dyin quie Diuzi ruaꞌ. 14 Canaꞌ rëpaꞌ benꞌ Israel, benꞌ yedyi quiaꞌ, cuenda huenan quieyaquëꞌ inaoyaquëꞌ xneza Cristo cabëꞌ rnaole leꞌe, naꞌ gataꞌrë yelaꞌ neban quiejëꞌ tuzioli. 15 Caora blëꞌë Diuzi bireꞌen benꞌ Israel inaoyaquëꞌ xneza Cristo, naꞌra udiloguëꞌ yaca benꞌ zaꞌ yedyi tula, yaca benꞌ reꞌen inao xneza Cristo. Pero cala bireꞌen Diuzi inao benꞌ Israel xneza Cristo. Lega reꞌen Diuzi inaojëꞌ xneza quienëꞌ. Lega yedaohue Diuzi caora idyin dza inao yaca benꞌ Israel xneza Cristo. Lëdza naꞌ gaca quiejëꞌ ca quie benꞌ baguti beban tatula. 16 Chi banuelaꞌiya Diuzi yëzo yëta xtila ta gaca pan, lëscanꞌ naca laꞌiya pan ta bro luꞌu horno. Lëscanꞌ canaꞌ nacan quie nu yaga. Chi banuelaꞌiya Diuzi lue yaga, lëscanꞌ naca laꞌiya tacaꞌ yaga. Lëscanꞌ nacarë quie benꞌ Israel. Chi bë xuzixtaꞌojëꞌ quie Diuzi, lëscanꞌ idyin dza hue z̃icoꞌ z̃iꞌisubajëꞌ quie Cristo.

17 Naca yaca benꞌ Israel ca quie tu yaga olivo. Naca bala benꞌ Israel ca quie tacaꞌ yaga olivo. Yelaꞌ yeladyiꞌ quiejëꞌ baochugu apsanlaꞌadyiꞌ Diuzi lëjëꞌ, pero baoz̃iꞌ Diuzi leꞌe, benꞌzaꞌ yedyi tula. Banaca quiele ca quie tacaꞌ yaga guixiꞌ nadilaten yaga olivo. Canaꞌ gaca huen quiele, naꞌ huaca yeziꞌle fuerza quie Diuzi cabëꞌ reziꞌ tacaꞌ yaga fuerza quie luena. 18 Pero bihuele cuinle benꞌ z̃e danꞌ baochugu Diuzi tacaꞌ yaga olivo, bë Diuzi quiele ca quie yaga nadilaten yaga olivo. Bigalaꞌadyiꞌle cala por nun quie leꞌe neziꞌ lue yaga fuerza, dechanꞌ por nun quie lue yaga neziꞌle leꞌe fuerza.

19 Durpende yëbile nëꞌëdiꞌ: “Hueꞌencazi, pero baochugu Diuzi tacaꞌ yaga olivo tacuenda gaca nëtoꞌ benꞌ quienëꞌ lao laza benꞌ Israel.” 20 Pero rëpaꞌleꞌe: “Baochugu Diuzi tacaꞌ yaga olivo, inaro benꞌ Israel, como danꞌ psebiꞌjëꞌ Cristo. Pero leꞌe, benꞌ binaca benꞌ Israel, por nun quie danꞌ barnaole xneza Cristo nacalële Diuzi tuz̃e. Quie lenaꞌ gapale cuidado bihuele cuinle benꞌ z̃e. 21 Canaꞌ nacan porque bibez̃iꞌz̃e Diuzi nu benꞌ Israel, danꞌ psebiꞌjëꞌ Cristo. Naꞌra lëcanaꞌzi huaca bisiꞌz̃e Diuzi nu benꞌ zaꞌ yedyi tula chi biinaojëꞌ xneza Cristo. 22 Naꞌ ulehuecara pensari ca naca yelaꞌ benꞌ huen quie Diuzi. Pero lëscanꞌ naca Diuzi benꞌ de pensari. Dyëꞌëdi rnaꞌnëꞌ huenëꞌ castigo nu benꞌ bireꞌen hue quie diꞌidzaꞌ quiëꞌ. Pero leꞌe, taz̃e bagucalë Diuzi leꞌe. Pero ruen zi inaole xneza Diuzi gapalenëꞌ balaꞌana, porque chi bihue quiele diꞌidzaꞌ quiëꞌ, lëscanꞌ leꞌe, hue Diuzi leꞌe castigo. 23 Porque chi ye utzaꞌ benꞌ Israel pensari quiejëꞌ inaojëꞌ xneza Cristo, naꞌra yeziꞌ Diuzi lëjëꞌ utilanëꞌ lëjëꞌ yaga olivo tatula. Decazi yelaꞌ huaca quie Diuzi huenëꞌ cabëꞌ reꞌennëꞌ huenëꞌ. 24 Pues ulio Diuzi leꞌe gacale benꞌ quienëꞌ, laꞌacazi nacale ca quie tu yaga guixiꞌ, laꞌacazi binacale benꞌ Israel, pero mazara gueꞌen Diuzi benꞌ Israel gacajëꞌ benꞌ quienëꞌ utilanëꞌ lëjëꞌ yaga olivo tatula.

25 Reꞌendaꞌ iniaꞌ leꞌe tu diꞌidzaꞌ con cabëꞌ baodixogueꞌ Diuzi nëꞌëdiꞌ cuenda inezile cabëꞌ gaca, naꞌ bihuele cuinle benꞌ z̃e. Tali naꞌ apsanlaꞌadyiꞌ Diuzi bala benꞌ Israel tanun quie yelaꞌ yeladyiꞌ quiejëꞌ. Pero caora abeya benꞌ reꞌen inao xneza Cristo, benꞌ zaꞌ yedyi tula, naꞌtera yezulao Diuzi yeyuenëꞌ benꞌ Israel tuz̃e tatula. 26 Lëdza naꞌ sulao inao yugulu benꞌ Israel xneza Cristo. Canaꞌ rguixogueꞌn lëꞌë guichi laꞌiya quie Diuzi cani:

28 Pero naꞌa barue benꞌ Israel condre Diuzi. Biralejëꞌ guti Cristo lëꞌë yaga cruzo cuenda gataꞌ yelaꞌ neban quiejëꞌ tuzioli. Pero como biralejëꞌ, lenaꞌ rguilo Diuzi leꞌe, benꞌ zaꞌ yedyi tula, nu leꞌe reꞌen inao xneza Cristo. Pero nadyëꞌëcazi Diuzi benꞌ Israel. Lenaꞌ ulionëꞌ xuzixtaꞌojëꞌ gacajëꞌ benꞌ quienëꞌ. 29 Uzu Diuzi diꞌidzaꞌ quienëꞌ cabëꞌ unanëꞌ huenëꞌ. Como ulio Diuzi benꞌ Israel gacajëꞌ benꞌ quienëꞌ, lenaꞌ biusanlaꞌadyiꞌnëꞌ leyaquëꞌ tuzioli. 30 Lëleꞌe, benꞌ binaca benꞌ Israel, bibë quiele quie Diuzi dza naꞌte, pero caora uruꞌun benꞌ Israel Cristo tzalaꞌla, naꞌra bezulao Diuzi yeyuenëꞌ leꞌe tuz̃e beyëchiꞌlaꞌadyiꞌnëꞌ leꞌe. 31 Naꞌra cala leꞌe, nechanꞌ yaca benꞌ Israel, lëleyaquëꞌ birue quiejëꞌ quie Diuzi. Pero huadyin dza yeyëchiꞌlaꞌadyiꞌ Diuzi benꞌ Israel tatula cabëꞌbeyëchiꞌlaꞌadyiꞌnëꞌ leꞌe. 32 Porque tuzi ca bë Diuzi, baochugulinëꞌ de dulaꞌ xquia quie yuguluro. Naꞌra quie lenaꞌ tuzi ca huenëꞌ, yeyëchiꞌlaꞌadyiꞌnëꞌ yuguluro.

33 Biyeyudyi yedu yelaꞌ rioñeꞌe, yelaꞌ nezi quie Diuzi. Bisaqueꞌ huebëꞌro duz̃ete ca naca pensari quienëꞌ, ca naca xnezëꞌ. 34 ¿Nuz̃i saqueꞌ tzioñeꞌe duz̃ete pensari quie Diuzi? ¿Nuz̃i saqueꞌ usëdi lëbëꞌ? 35 Nunu saqueꞌ yëbi Diuzi: “Tu cani reyaꞌaloꞌ quiaꞌ.” 36 Porque bzalo Diuzi yugulu ta de, yelaꞌ naꞌ yugulu ta de nacan quienëꞌ. Benꞌ z̃e, benꞌ balaꞌana naca Diuzi tuzioli. Amén.