1 Cayabi dxichi Espíritu Santu laanu, dxi mayaca gueeda Cristu ziuu tu iree chu de ni runi cre nu, zinanda enda rusiguii ne irá ni rusiidi binidxaba'. 2 Zuna diaga cabe ni de ruaa cani nabé rusiguii dede ma qué racaná ladxidó'. 3 Zabee ca de ichaganá binni ne laca zabee ca de go binni xiixa endaró, neca Dios bizá' ca endaró ca para go ca xpinni ne udii ca diuxquixe laa. 4 Nazaaca irá ni bizá' Dios. Qué gapa nu xi pur udxí' nu nin tobi de laani, sínuque icaa nu ni, ne udí' nu diuxquixe laa. 5 Zanda idó' no ni, purti ra udí' nu diuxquixe laabe riguu be ndaaya ni.

6 Pa gusiidu ca hermanu casi cayabe lii ri la? zu'nu xhiiña Jesucristu jneza, ne laga cayu'nu ni la? zidxá ladxidó' lo de stiidxa Dios ni runi cre nu, ca diidxa galán ni maca zinanda lu de ma xadxí. 7 Cadi quitu stiempu lu luguiá ca cuentu yooxho ni ricaa yu né binni, sínuque bicaa ique sa lu gaxha de Dios. 8 Caadxi si racané ejerciciu cuerpu stinu para gapa stipa, peru ni zacané pe laanu la? nga uyubi nu sa nu gaxha de Dios, purti nga zaquiiñe laanu lu enda nabani ni napa nu yanna ri' ne ni gueeda ru'. 9 Dxandí ni, ne irá binni nicaa ni de idubi ladxidó'. 10 Nga runi laanu runi nu dxiiña', ne rudxí' lú nu ni nagana, purti ma cá lú nu Dios ni nabani, ni cayapa irá binni, jma rusi cani runi cre laa.

11 Gudxi ca hermanu guni irá nga, ne bisiidi chaahui ni laaca'. 12 Biyubi modo iníu', bi'ni jneza, gunaxhii ca xcaadxi, bini cre de idubi ladxidó' lo', ne bibani nayá para uluí' lu cani ma runi cre ximodo sa ca', ti cadi udxii deche ca lii tisi nahuiini lu'. 13 Laga cabeza lu guenda', bichiña irá ca hermanu, biinda né laaca stiidxa Dios, bisiidi chaahui ca hermanu ne ucané laaca udxii lú ca lu xhiiña Dios. 14 Biquiiñe gracia ni uní' Dios icoou dxi gudixhe ná ca hermanu gola luguiá lu'.

15 Bicaala'dxi gu'nu irá ni cayabe lii ri', de idubi ladxidó' lo', ti gu'ya cabe ze dxi ziyene lu jma. 16 Biiya ibani lu jneza ne zaqueca biiya usiidi lu ni jneza ne cadi iree chu lu de laani. Pa chi nanda lu irá ni cayabe lii ri la? zalá lu' ne laca zulá lu cani cusiidi lu'.