1 Domingu ca'ru guiaba chaahui biaani', biree María Magdalena uyé ra ba' que. Ne ora yendá be biiya be ma biree guie ye'gu ruaa ba' que. 2 Para biree uxooñe be uyé be ra nuu Simón ne sti discípulu ni nadxii Jesús que, ne na be rabi be laaca':

―Ma ulee cabe Señor de ndaani ba', ne qué ganna du paraa gula'qui cabe laa.

3 Oraque biree Pedru ne sti discípulu que, ze ca ra ba'. 4 Iropa ca bixooñe ca', peru sti discípulu que yendá primeru. 5 Para guta gudaa, biiya ca lari nexhe raqué peru qué ñuu ndaani ba' que. 6 Bidxiña guxooñe Simón Pedru, beda nanda laabe, ne biuu ndaani ba' que, biiya nexhe ca lari que raqué. 7 Peru adxé ladu nexhe bayu ni birenda ique be que, cá bieque. 8 Oraque ru' biuu sti discípulu ni yendá primeru que, biiya ne bini cre. 9 Ca'ru guiene cabe ni cá lu Xqui'chi Dios ra na napa xidé guiasa be de lade gue'tu'. 10 Oraque ru bigueta ca discípulu que ralidxi ca'.

11 Peru María biaana fuera ra ba' que, cayuuna'. Idubi cayuuna guta gudaa, biyubi lú ndaani ba' que. 12 Biiya chupa ángel nacu lari quichi' zuba ra uyuu xcuerpu Jesús, tobi neza ra guta ique be ne stobi neza ra guta ñee be. 13 Oraque na ca ángel que rabi laa:

―Gunaa, xiñee cayuuna lu'.

Para rabi be laaca':

―Purti ziné cabe Señor stinne', ne qué ganna dia' paraa gula'qui cabe laa.

14 Casi uní' be ngue, bidxigueta lú be atrá, biiya be zuhuaa Jesús, peru qué ganna be pa Jesús ngue. 15 Para na Jesús rabi laabe:

―Gunaa, xiñee cayuuna lu'. Tu ruyubu'.

Laabe zácaxa be ni rapa raqué caní' né laabe, ne rabi be laa:

―Señor, pa lii yenéu laabe la? gudxi naa paraa gula'qui lu laabe, ti chi caa laabe.

16 Para na Jesús:

―¡María!

Ne óraque ru' bidxii lú be Jesús, ne na be:

―¡Maistru!

17 Oraque na Jesús rabi laabe:

―Cadi ucueeza lu naa purti ca'ru quiba ra nuu Bixhoze'. Peru uyé ra nuu ca biche', ne gudxi laaca ma chi chiba ra nuu Bixhoze ne Bixhoze tu, ra nuu Dios stinne ne Dios stitu.

18 Para biree María de Magdala, yetidxi ca discípulu ma biiya Señor, ne byuí' né laacabe cani gudxi Señor laa que.

19 Domingu huadxí que da'gu ca puerta ra nuu ca discípulu purti cadxibi ca ca judíu. Ne beeda Jesús, bizuhuaa lade ca' ne na:

―Gata dxí ladxidó' to.

20 Uní' si be ngue, biluí' be laaca bataná be ne xcustiá be. Oraque bieche ca ma biiya ca Señor. 21 Bigueta na be rabi be laaca':

―Gata dxí ladxidó' to. Cásica biseenda Bixhoze naa la? zacaca cuseenda laatu.

22 Biluxe si uní' be zaqué, bindubi be luguiá ca', ne na be:

―Laicaa Espíritu Santu. 23 Ni guni perdonar tu la? zaca perdonar, peru ni qué guni perdonar tu la? ziaana stonda luguiá'.

24 Peru qué guinni di Tomás ni rabi cabe Cuachi, tobi de lade doce discípulu que, ra nuu cabe ora uyé Jesús. 25 Para na ca xcaadxi discípulu que rabi laa:

―Ma bidu'ya du Señor.

Peru na:

―Pa qué guuya ndaani bataná be ra ucuá ca clavu que, ne qué cuaa bicuini naya ra ucuá ni, ne qué cuaa bata naya ti'xhi be la? qué zune cre dia'.

26 Gudi'di si xhono gubidxa de ngue, nuu ca discípulu sti Jesús sti tiru ndaani yoo que. Ma ne Tomás nuu né laacabe. Da'gu ra puerta que, peru beeda Jesús ne bizuhuaa lade cabe, ne na:

―Gata dxí ladxidó' to.

27 Ne óraque rabi be Tomás:

―Bichiña bicuini nou' rarí', ne biiya bata naya'. Bisigaa nou' ne guluu ni cue' tixhe ri', ne cadi guiaana neu duda sínuque guni cre lu'.

28 Para na Tomás rabi laabe:

―¡Señor stinne' ne Dios stinne'!

29 Para rabi be laa:

―Purti si biiya lu naa, nga runi bini cre lu'. Dichoso cani guni cre naa, neca sin gu'ya'.

30 Stale ru milagru bi'ni Jesús nezalú ca discípulu para ihuinni tu laa. Cadi cá irá ni lu gui'chi ri', 31 peru ca ndi ucuá ti guni cre tu dxandí Jesús nga ni ulí Dios, ne Xiiñi laabe, ne para gapa tu enda nabani ra guni cre tu laabe.