1 Ubiꞌyacuruhua chiquiꞌ llene neca nú seca Diose Paꞌahua liaꞌahua. Enzeꞌe nuꞌ modo nú chiuꞌuleaꞌahua lliꞌñinu, nu necaꞌahua lliꞌñinu. Pero bee bene enu la chequie inziuꞌ Diose la chulu beei liaꞌahua xi neca Lliꞌñi Diose, xne la chulu beei liꞌinu. 2 Bee saꞌa enu nzeli arquiaꞌahua Jesucristo enu chiquiꞌ seꞌca, liꞌá nia luhua nú necalaꞌahua Lliꞌñi Diose. Añinzuca nú la riaꞌahua beyaꞌ xa acaꞌahua chenu nzeꞌta Jesucristo stucu bese, pero nzutaꞌ arquiaꞌahua nú acaꞌahua tucu nú necanu xne bichia zeꞌe neli lañiaꞌahua liꞌinu tucu nú rnaanu. 3 Nu ye bee bene enu nzeli arquiꞌ nú scua acane, sucuꞌlu beella nú huañi beella nú la luꞌcu beella dula, tucu nú necanu enu la luꞌcu dula.

4 Pero ye bee bene enu la riꞌi tucu nú rnibiyaꞌ Diose liꞌibeei rriꞌibeei dula, xne dula neca tunu la riꞌi bee bene tucu nú rnibiyaꞌ Diose. 5 Liꞌihua nediyaꞌhua nú ubeꞌta Jesucristo lu iliulabe para nú huanu dula arquiꞌ bee bene, nu la luꞌcunu niꞌ tucu dula. 6 Enzeꞌe bee bene enu neca tucutsia cuna Jesucristo, rlaꞌna beella nú la riꞌi beella dula. Pero ye bee bene enu siempre rriꞌi dula, la riꞌibeei beyaꞌ ti necanu nu la chulu beei liꞌinu. 7 Bee lliꞌñia liꞌá nia luhua nú la zelahua nú titse zequienu liꞌihua, xne enu rriꞌi lunú niarquiꞌ Diose la nzu elliebacuꞌlla nú riꞌilla dula, tucu nú neca Jesucristo enu la luꞌcu dula. 8 Pero bene enu siempre rriꞌi dula neca nzeꞌe beneꞌ bezeꞌlu, xne tucutsia bezeꞌlu neca enu rriꞌi dula hasta chenu uquixie iliulabe, nu Jesucristo Lliꞌñi Diose ubeꞌta lu iliulabe para nu uriꞌinu ana lunú rriꞌi bezeꞌlu.

9 Enzeꞌe niꞌ tucu bene enu nzequie inziuꞌ Diose la zucuꞌlulla nú riꞌilla dula, xne nehuañila Espírituꞌ Diose cuna liꞌilla, nu la yalaꞌ nú riꞌilla dula xne necalalla Lliꞌñi Diose. 10 Chee rlubeꞌ nú ti neca bee Lliꞌñi Diose nu ti neca bee lliꞌñi bezeꞌlu, xne tatse enu la riꞌi tucu nú niarquiꞌ Diose urre la zecalla bee saꞌlla la aca nzeꞌe Lliꞌñi Diose.

11 Nu liꞌihua desde chenu uyalí arquiꞌhua Jesucristo, ubeneꞌlaꞌhua nú rquiꞌña nú zecaꞌahua bee saꞌahua. 12 La yala nú riaꞌahua tucu nú uriꞌi Caín, uzelai nú unibiyaꞌ bezeꞌlu lui nú unguuti bichi. Uriꞌi scua xne uriꞌitsiai puro nú necha neca, nu bichii uriꞌi nú neca nzeꞌca.

13 Enzeꞌe bee saꞌa enu nzeli arquiaꞌahua Jesucristo, la chenu arquiꞌhua tunu rana arquiꞌ bee bene iliulabe liꞌihua equie nú nzequieehua inziuꞌ Diose. 14 Liaꞌahua nediyaꞌahua nú la necaꞌahua xi neca bene enu unguti para Diose xne rluculaꞌahua elunehuañi lunu, equie nú seꞌcaꞌahua bee saꞌahua. Pero bene enu la zeca beesaꞌ liꞌilla necascaꞌlla xi neca bene enu unguti lu Diose. 15 Ye bee bene enu rana arquiꞌ bee saꞌ neca nzeꞌe xi neca tucu enu ruuti bene, nu liꞌihua nediyaꞌhua nú enu ruuti bene liꞌilla la luꞌculla elunehuañi nú leca xunga laxu lu Diose. 16 Liaꞌahua nediyaꞌahua nú seca Jesucristo liaꞌahua xne ungutinu equie cuendaꞌahua; nee leꞌca scua equie nú seꞌcaꞌahua bee saꞌahua lecaxi riꞌi mase atiaꞌahua equie cuendaꞌ bee saꞌahua. 17 Pero tunu nuꞌ tatucuhua enu neca xene lu iliulabe quieꞌ nu lañiꞌlla tucu saꞌlla enu seca elitsi, nu la riꞌilla elietsa lu bene zeꞌe, ¿xa modo nilla nú rluꞌculla elusecaꞌ Diose che? 18 Enzeꞌe bee lliꞌñia, liꞌá nia luhua nú la niꞌtsiahua nu rniaꞌahua nú seꞌcaꞌahua bee saꞌahua, rquiꞌña nú lubeaꞌahua nú seꞌcaꞌahua bee saꞌahua cuna lunú rriaꞌahua.

19 Xne tunu seꞌcaꞌahua bee saꞌahua che riaꞌahua beyaꞌ nú sucuaꞌahua nú rni Stichiaꞌ Diose, nu nzutaꞌ arquiaꞌahua nú rriaꞌahua tucu nú rialane lunu. 20 Pero tunu rriꞌilaꞌahua tucu nu rialane scua nu siꞌscaꞌahua nu lascaꞌ riaꞌahua tucu nú neli neca, rquiꞌña nú riaꞌahua beyaꞌ nú llenela neca Diose luaꞌahua, nu liꞌinu nediyaꞌnu yeene. 21 Enzeꞌe tucu nú seꞌca liꞌihua, liꞌá nia luhua tunu siꞌahua nú rriaꞌahua nu neca nzeꞌca, che nzu taꞌ arquiaꞌahua nú rriaꞌahua tucu nú neli neca lu Diose. 22 Scua liquiꞌnu ye nú rnacuaꞌahua lunu, equie nú sucuaꞌahua nu rriaꞌahua lunú rnibiyaꞌnu cuna nú rriaꞌahua lunú riuꞌ arquiꞌnu. 23 Nu lunú rnibiyaꞌ Diose nú riaꞌahua necane nú chili arquiaꞌahua Jesucristo Lliꞌñi Diose, nu zecaꞌahua bee saꞌahua tucu nú unibiyaꞌnu nú riaꞌahua. 24 Bee bene enu sucuꞌ tucu nú rnibiyaꞌ Diose nu rriꞌi beellae, liꞌibeella nehuañi beella cuna Diose nu liꞌinu nehuañinu cuna liꞌibeella. Nu nediyaꞌahua nú nehuañinu cuna liaꞌahua, equie cuendaꞌ Espíritu Santo nú uliquiꞌlanu luaꞌahua.