1 Ye bee bene enu nzeli arquiꞌ nú neca Jesuse Cristo enu uxeꞌla Diose, neca beella lliꞌñi Diose; nu bee bene enu seca Diose Paꞌahua leꞌca seca beella bee lliꞌñinu. 2 Chenu seꞌcaꞌahua Diose nu rriaꞌahua lunú rnibiyaꞌnu nú riaꞌahua, che rriaꞌahua beyaꞌ nú seꞌcaꞌahua bee lliꞌñinu. 3 Equie nú seca bene Diose neca nú rriꞌi bene tucu nú rnibiyaꞌnu; nu laca neriñaꞌ nu riꞌi bene tucu nú rnibiyaꞌnu. 4 Xne ye bee bene enu neca Lliꞌñi Diose nuꞌ modo nú riꞌi beella ana lu beenú necha neca nuꞌ lu iliulabe quieꞌ. Nu equie nú nzeli arquiaꞌahua Jesuse enu neca Cristo scua rriaꞌahua ana nú la riaꞌahua beenú necha neca nuꞌ lu iliulabe quieꞌ. 5 Xne enu nzelítsia arquiꞌ nú neca Jesuse Lliꞌñi Diose, liꞌilla nuꞌ modo nú rriꞌilla ana lubee nú necha neca nuꞌ lu iliulabe quieꞌ.

6 Nu Jesucristo ubeꞌtanu lu iliulabe nu urinzanu cuna nú uriꞌchia reneꞌnu; lá rinza tsianu leꞌca uriꞌchia reneꞌnu lu cruse. Nu leꞌca liꞌi Espíritu Santo neca testigo lu cuendaꞌ bee nucuaꞌ, nu liꞌinu rninu puro nú neli neca. 7 Xne nuꞌ chuna enu neca testigo liñibe: Diose Paꞌahua, Jesucristo, nu Espíritu Santo; nu lu yuna beenu neca tucutsia Diose. 8 Nu leꞌca nuꞌ chuna testigo lu yuu: Espíritu Santo, cuna nú urinza Jesucristo, cuna nú uriꞌchia reneꞌnu lu cruse; nu lu yunanu neca tucu necatse beenu. 9 Nee tunu nzeli arquiaꞌahua lunú rni bee bene luaꞌahua; máse rquiꞌña nú chili arquiaꞌahua lunú rni Diose equie cuendaꞌ Lliꞌñinu Jesucristo, xne másela seca stichiaꞌnu. 10 Bene enu nzeli arquiꞌ Jesucristo Lliꞌñi Diose, liꞌisilla nzeli arquiꞌlla lunú uni Diose lu cuendaꞌnu, pero bene enu la chili arquiꞌ Diose, rni stichiaꞌ nzeꞌe nú neca Diose enu niquichiaꞌ xne la chili arquiꞌ nzeꞌe lunú uni Diose lu cuendaꞌ Lliꞌñinu Jesucristo. 11 Nu lunú uni Diose neca nú uliquiꞌlanu elunehuañi nú leca xunga laxu, nu elunehuañi cuaꞌ nzeꞌta equie cuendaꞌ Lliꞌñinu Jesucristo. 12 Bene enu neca tucutsia cuna Jesucristo Lliꞌñi Diose, liꞌisilla rluꞌculla elunehuañi nú leca xunga laxu lu Diose; pero bene enu la neca tucutsia cuna liꞌinu, la luꞌcu nzeꞌe elunehuañi cuaꞌ.

13 Rquieꞌa ye bee nucuaꞌ luhua liꞌihua enu nzeli arquiꞌ Jesucristo Lliꞌñi Diose, para nú riꞌihua beyaꞌ nú rluꞌcuhua elunehuañi nú leca xunga laxu lu Diose.

14 Nzu arquiaꞌahua nú rieneꞌ Diose tunu nacuaꞌahua lunu tucu nú riuꞌ arquiꞌnu. 15 Nu lunú nediyaꞌahua nu rriꞌi Diose caso stichiaꞌahua chenu nuꞌ nú rnacuaꞌahua lunu, leꞌca nzutaꞌ arquiaꞌahua nu liꞌinu liquiꞌnu lunú unacuaꞌahua lunu.

16 Tunu nuꞌ tátucuaꞌahua enu nediyaꞌ nú rriꞌi tucuaꞌahua dula nu la yala nú atilla, rquiꞌña nú nacuꞌhua lu Diose equie cuendaꞌlla, nu scua deteꞌ Diose elunehuañi nú leca xunga laxu lulla tunu la riꞌilla dula nú riala nú atilla. Xne nuꞌ dula nú riala nú ati bene, nu la nia luhua nú nacuꞌhua lu Diose equie cundaꞌ bene enu rriꞌi dula cuaꞌ. 17 Ye beenú necha neca, neca dula, pero nuꞌ dula nú la yala nú ati bene.

18 Liaꞌahua nediyaꞌahua nu bee bene enu neca Lliꞌñi Diose, la chequiaꞌ beella nú rriꞌi beella dula; xne Jesucristo lliꞌñi Diose neca enu rriucu liꞌibeella, nu la nibiyaꞌ bezeꞌlu lubeella.

19 Nediyaꞌahua nú necaꞌahua beneꞌ Diose, pero beelá bee bene iliulabe enu la neca bee beneꞌ Diose bezeꞌlu neca enu rnibiyaꞌ lubeei.

20 Nu leꞌca nediyaꞌahua nú Jesucristo neca Lliꞌñi Diose, nu ubeꞌtalanu lu iliulabe nu uxaꞌlanu lunú neca elliebacuaꞌahua para nú chuluaꞌahua enu mero neca Diose. Liaꞌahua nehuañiaꞌahua cuna liꞌinu nu cuna Lliꞌñinu Jesucristo. Nu liꞌinu necanu mero Diose, nu equie cuendaꞌ liꞌinu nuꞌ elunehuañi nú leca xunga laxu. 21 Bee lliꞌñia ubiꞌyahua liꞌihua lu xitse nú nzeli arquiꞌ bee bene nú rnibeei neca diose. Amén.