1 Lulá bee nucuaꞌ, uya Jesuse lu iliu Galilea. Lá niarquiꞌnu achaanu lu iliu Judea, xne bee bene cuaꞌ rlaꞌna beei liꞌinu para nú úti beei liꞌinu. 2 Pero lunú nzeꞌta axula eliñiꞌ bee bene Israel, chenu rcuaꞌa beella liñi bee ranchu. 3 Che uni bee bichi Jesuse lunu:

―La yaꞌnalu caꞌa, uquia lu iliu Judea, para nú leꞌca lañiꞌ bee beneꞌlu enu nucuaꞌa zeꞌe bee milagro nú rriꞌilu. 4 Xne chenu niarquiꞌ bene nú riꞌi bee bene beyaꞌ lunú rriꞌilla, la yala nú riꞌilla nucuaꞌ aꞌchiꞌ. Nee lunú rriꞌilu bee milagro cuaꞌ, uriꞌi nucuaꞌ ante lu ye bee bene iliulabe.

5 Uni bee bichi Jesuse scua xne niꞌ liꞌibeei la chili arquiꞌbeei liꞌinu. 6 Chequie uni Jesuse lubeei:

―Lascaꞌ riña horaa, pero para liꞌihua xitse hora neca nzeꞌca. 7 Leca modo chana arquiꞌ bee bene iliulabe liꞌihua, pero liꞌisia rana arquiꞌbeei, xne rixiuleꞌa lubeei nú necha neca lunú rriꞌi beei. 8 Uquiahua lu eliñi cuaꞌ, xne la chaꞌscaꞌa, xne lascaꞌ riña hora nú chaꞌa.

9 Chenu ulaxu nú uninu scua lubeei, uyaꞌnanu Galilea.

10 Lulá nú nzue bee bichi Jesuse lu eliñi zeꞌe, cheelá nzanu para nú lecati riꞌi beyaꞌ nú leꞌca nunu nzanu lu eliñi zeꞌe. 11 Nu bee bene Israel rlaꞌna liꞌinu lu eliñi zeꞌe, nu unibeei:

―¿Cáche nzu bene zeꞌe?

12 Leta huaxi bee bene enu uya lu eliñi zeꞌe, yelu nú rnibeei lu cuendaꞌnu. Nuꞌ beei enu rni: “Ñia nzeꞌcanu”; nu nuꞌ beei enu rni: “La riꞌi nzeꞌcanu, sino que sequienunu bee bene.” 13 Pero niꞌ tucu beei né ni beei lu cuendaꞌnu ante luye bee bene, xne xiqui beei bee usticia Israel.

14 Chenu unga arulaꞌla nú reca eliñi zeꞌe, uyuꞌu Jesuse liñi indu llene Jerusalén, nu uquixienu nú uzeteꞌnu bee bene. 15 Che bee bene Israel chiquiꞌ nzenu arquiꞌbeei nú unibeei:

―¿Xa reca nucuaꞌ huaxi beenú reca nucuaꞌ nu lecati uzeteꞌ liꞌi nucuaꞌ?

16 Chequie uni Jesuse lubeei:

―La zetea liꞌihua lunú necatsia elliebacua, sino que nzeꞌta nucuaꞌ lu Diose enu uxeꞌla liꞌá. 17 Tunu nuꞌ enu niarquiꞌ nú riꞌi tucu nú niarquiꞌ Diose, liꞌilla riꞌilla beyaꞌ tunu nú setea liꞌihua nzeꞌtae lu Diose, urre necane nú necatsia elliebacua. 18 Enu seteꞌ lunú necatsia elliebacuꞌ, liꞌilla rriꞌilla scua para nú zucuꞌ aya bee bene liꞌilla. Pero bene enu rlaꞌna nú zucuꞌ aya bee bene Diose enu uxeꞌla liꞌinu, rnilla lunú neli neca, nu la zequienulla bee bene.

19 ’Añinzuca nú utsaꞌna Moisés ley luhua, pero niꞌ tucuhua, la zucuꞌ nú rnibiyaꞌ ley. ¿Nu xinu niarquiꞌhua nú útihua liꞌá?

20 Chequie ucuaqui bee bene zeꞌe lunu nú unibeei:

―¡Benechiquiꞌ nuꞌ arquiꞌlu! ¿Ti niarquiꞌ úti liꞌilu?

21 Nu uni Jesuse lubeei:

―Equie tucu milagro nú uriꞌá bichia nú sulachi bee bene, yehua chiquiꞌ nzenu arquiꞌhua. 22 Pero liꞌihua mase nú neca bichia nú sulachi bee bene rquieꞌehua seña bee enduꞌ meꞌhua para nú riꞌihua tucu nú unibiyaꞌ Moisés nú riꞌihua, añinzuca nú la neca equie cuendaꞌ Moisés nú rquie seña bee enduꞌ meꞌhua sino que bee beneꞌhua enu udetela rriꞌila scua huatu. 23 Neequie, para nú la iꞌchiahua lunú rni leyꞌ Moisés rquieꞌehua seña bee enduꞌ niyu masia nú necane bichia nú sulachi bee bene. Nu, ¿xiquie nú rlehua lua nú uriyeca tucu niyu bichia nú sulachi bee bene? 24 La nihua lu cuendaꞌ bee bene lunú rlañiꞌtsiahua rriꞌi bee bene sino que rlutixu uriꞌinzeꞌcahua beyaꞌ xi rriꞌilla che nihua.

25 Chequie chiucu chuna bee bene Jerusalén unibeei lu saꞌbeei:

―¿Xieꞌ lanu benequieꞌ neca enu rlaꞌna bee bene para nú úti beei la? 26 Nu nee luꞌ nzulla rnilla ante lu ye bee bene, nu lecati riꞌchialla. ¿Xieꞌ uyalílaquie arquiꞌ bee usticia nú necalla Cristo la? 27 Pero liaꞌahua nediyaꞌ nzeꞌcaꞌahua cá enza nzeꞌtalla, nu chenu nzeꞌta Cristo, lecati riꞌibeyaꞌ cá enza nzeꞌtanu.

28 Chenu ubeneꞌ Jesuse lunú rnibeei, diqui nú seteꞌnu bee bene liñi Indu llene Jerusalén, che juerte uninu lubeei:

―Liꞌihua rnihua nú nuꞌluhua liꞌá, nu leꞌca nediyaꞌhua cá enza nzela, pero liꞌá lá yelá equie cuendaꞌ liꞌitsia. Liꞌá uriña equie cuendaꞌ liꞌinu enu rni nú neli neca, nu liꞌihua la chuluhua liꞌinu. 29 Pero liꞌá nuꞌlua liꞌinu, xne nzela enza lunu nu liꞌinu uxeꞌlanu liꞌá.

30 Chenu ubeneꞌbeei nucuaꞌ uniarquiꞌbeei nú naꞌtse beei Jesuse, pero lecati unaꞌtse liꞌinu xne lascaꞌ riña hora nú xi riꞌinu beei liꞌinu. 31 Nulu huaxi añi bee bene enu nucuaꞌa zeꞌe, huaxi beei uchili arquiꞌ liꞌinu nu unibeei:

―Chenu yeꞌta Cristo, ¿xieꞌ riꞌilanu huaxilá bee milagro luquelá nú rriꞌi benequieꞌ la?

32 Ubeneꞌ bee fariseo lunú rni bee bene equie cuendaꞌ Jesuse. Che liꞌibeei cuna bee uleꞌya enu rnibiyaꞌ, uxeꞌla beei bee sundadu enu rriꞌi ucu Indu llene Jerusalén para nú naꞌtse beei Jesuse cha niꞌcuꞌ. 33 Nu uni Jesuse lubeei:

―Lacaxeaꞌ nzula cuna liꞌihua nu chu benchilaꞌ zeca elu nzucu enu uxeꞌla liꞌá. 34 Liꞌihua laꞌnahua liꞌá pero la llelaꞌhua liꞌá, xne leca modo riñahua elu nzaꞌa.

35 Che bee bene Israel zeꞌe unibeei lu saꞌbeei:

―¿Cá nza nucuaꞌ nú la llelaꞌahualla che? ¿Xieꞌ nzalla lubee bene Israel enu uriꞌchialetse leta bee bene enu la neca bee bene Israel para nú zeteꞌlla hasta bee bene enu laca bee bene Israel la? 36 ¿Xa neca nú uni nucuaꞌ: “Nú laꞌnahua liꞌá pero la llelaꞌhua liꞌá, xne leca modo riñahua elu nzaꞌa”?

37 Ultimo bichia eliñi zeꞌe, neca bichia nú másela llene neca nu utsuli Jesuse nu juerte uninu:

―Tunu nuꞌ enu rebichiꞌ yeꞌta nzeꞌe lua para nú hueꞌ nzeꞌe inza. 38 Xne bee bene enu chili arquiꞌ liꞌá, tucu nú rni lu ichiꞌ Stichiaꞌ Diose, liñi arquiꞌ nzeꞌe liñi inza nú rliquiꞌ elunehuañi.

39 Chenu uni Jesuse scua. Nu nú uninu rni, nú yebee bene enu chili arquiꞌ liꞌinu huañi Espíritu Santo cuna bee nzeꞌe, xne bee bichia zeꞌe lá riñascaꞌ Espíritu Santo equie nú lecascaꞌ Jesuse elu rnibiyaꞌnu.

40 Chenu ubeneꞌ bee bene zeꞌe nú uni Jesuse, nuꞌbeei enu uni:

―Neli nú benequieꞌ neca profeta enu nzu nú nzeꞌta.

41 Nu nuꞌlá beei enu uni:

―Benequieꞌ neca Cristo.

Pero texcuaꞌa beei uni:

―Laca liꞌilla Cristo xne necalla bene Galilea. 42 Lu ichiꞌ Stichiaꞌ Diose rni nú lubee familiaꞌ arre David nzeꞌta Cristo, nu eyeche Belén alanu elu leꞌca unga lachi arre David.

43 Nu scua uleꞌesaꞌ bee bene equie cuendaꞌ Jesuse. 44 Nu nuꞌbeei uniarquiꞌ nú chanu niꞌcuꞌ, pero lecati ulaca arquiꞌ anaꞌtse liꞌinu.

45 Chequie bee sundado enu rriucu Indu llene Jerusalén zeꞌe, ubenchilaꞌ zeca beei elu nucuaꞌa bee fariseo cuna bee uleꞌya enu rnibiyaꞌ, nu uni bee bene cuaꞌ lubeei:

―¿Xinu lá yeꞌtayuhualla?

46 Nu ucuaqui bee sundado zeꞌe nú unibeei:

―Leca xunga, uyuꞌu tucu bene enu rni tucu nú rni benecuaꞌ.

47 Che uni bee fariseo zeꞌe lubeei:

―¿Xieꞌ leꞌca nuhua uzelahua nú uzequienu nucuaꞌ liꞌihua la? 48 ¿Xieꞌ nuꞌtátucu bee usticiaꞌahua urre nuꞌ tátucuaꞌahua bee fariseo enu uchilila arquiꞌ liꞌilla la? 49 ¿Xieꞌ la riꞌihua beyaꞌ nú huaxi bee benequieꞌ nenitilula beei ante Diose, equie nú la aca beei ley la?

50 Che fariseo enu lee Nicodemo enu uyabiꞌya Jesuse tucu reché, liꞌilla unilla:

51 ―Leyꞌahua rni nú leca modo niaꞌahua nú xi castiya riala tucu bene ante nú yeneꞌahua stichiaꞌlla para nú riaꞌahua beyaꞌ xi uriꞌilla.

52 Chequie ucuaqui beei lulla nú unibeei:

―¿Xieꞌ leꞌca nuulu nzulu chuꞌ bee bene Galilea la? Uzeꞌteꞌ nzeꞌca lu ichiꞌ Stichiaꞌ Diose, para nú riꞌilu beyaꞌ nú niꞌ tucu bene Galilea lá aca profeta.

53 Che chu nziue beei enza niꞌbeei.