1 Lulá bee nucuaꞌ, ucañi Jesuse setenta bee beneꞌnu, nu uxeꞌlanu chiucua chiucua beella nú riculu beella lunu, nú chue beella lubee eyeche cuna lubee ranchu elu chanu. 2 Nu uninu lubeella:

―Neli nú nucuaꞌa huaxi bee bene enu niarquiꞌ yeneꞌ Stichiaꞌ Diose, pero leca huaxi bee bene enu zeteꞌ liꞌibeei. Enzeꞌe unaꞌcuꞌhua lu Diose para nú xeꞌlalánu bee bene enu zeteꞌ liꞌibeei. 3 Uquiahua, liꞌá xeꞌla liꞌihua xi neca chenu nza bee sanchi leta bee bichiu. 4 La uyaꞌhua biti, nú nuꞌ steneꞌhua niꞌ dimi, niꞌ steinza lucuhua nu la cuaꞌa xehua lubee bene lu inziu. 5 Chenu riñahua niꞌi tucu bene, rluti uriꞌihua saludar bene zeꞌe nú nihua lulla: “Diose liquiꞌ nú nzuxe arquiꞌhua.” 6 Nu tunu niꞌi zeꞌe nucuaꞌa bee bene enu riala nú nzuxe arquiꞌ riaꞌna nú nzuxecuaꞌ cuna bee bene zeꞌe che, pero tunu la yala bee bene niꞌi zeꞌe nucuaꞌ, benchilaꞌ zeca nucuaꞌ cuna liꞌihua. 7 Uyaꞌnatsiahua niꞌi zeꞌe, nu la yaꞌnahua niꞌi por niꞌi bee bene, udacuhua nu hueꞌhua lunú liquiꞌ beella luhua, xne bee bene enu rriꞌi riñaꞌ rquiꞌña nú aculla. 8 Chenu riñahua tucu eyeche elu zela bee bene nú riaꞌnahua, udacuhua nú liquiꞌ beei luhua, 9 uriyecahua bee bene enu riti nucuaꞌa zeꞌe, nu uniꞌhua lubeei: “Nzeꞌta riñala lunú rnibiyaꞌ Diose luhua.” 10 Pero tunu riñahua tucu eyeche elu la zela bee bene nú riaꞌnahua, uchiuꞌhua lu inziu nu nihua lubeei: 11 “¡Hasta yuu beꞌcha lachihua nú uquie cuchiuꞌru uriꞌquiru xi neca tucu seña nú né yucu arquiꞌhua Stichiaꞌ Diose! Pero uriꞌihua beyaꞌ nú nzeꞌta axula lunú rnibiyaꞌ Diose luhua.” 12 Nia luhua nú bichia nú laxu iliulabe, bee eyeche elu lá zela bee bene, nú ayaꞌnahua, zeca beei castiya nú mase juerte, lunú zeca bee bene enu ucuaꞌa eyeche Sodoma.

13 ’¡Cueꞌhua bee bene eyeche Corazín! ¡Nu cueꞌhua bee bene eyeche Betsaida! Xne tunu eyeche Tiro cuna eyeche Sidón aca bee milagro nú unga lachihua, xi tiembu achili arquiꞌ bee bene zeꞌe Stichiaꞌ Diose, nu leꞌca autu beei laquie natsa para nú lubeꞌ nú nehuana nzu arquiꞌbeei nu aricuꞌ beei tí equie beei xi neca seña nú ucheꞌe arquiꞌbeei lu stula beei. 14 Pero bichia chenu laxu iliulabe, másela juerte castiya nú zecahua lunú zeca bee bene eyeche Tiro cuna eyeche Sidón. 15 Leꞌca esquie liꞌihua bee bene Capernaum, la riꞌihua elliebacuꞌ nú riala chuꞌuhua liñibe xne liꞌihua rialahua hasta elu mase aquié rquiꞌ ebila.

16 ’Nu chu ubiꞌyanu lubee beneꞌnu nu uninu:

―Bene enu rriꞌi caso lunú rnihua, rriꞌi bee nzeꞌe caso liꞌá, nu bene enu rluachu liꞌihua liꞌá rluachu nzeꞌe, nu bene enu rluachu liꞌá rluachu nzeꞌe Diose enu uxeꞌla liꞌá.

17 Chenu ubenchilaꞌ zeca setenta bee beneꞌ Jesuse enu uxeꞌlanu lubee eyeche, chiquiꞌ ñia nzu arquiꞌbeella nu necachi uni beella lunu:

―¡Detá, hasta bee benechiquiꞌ sucuꞌ stichiaꞌru chenu rniru lunú leelu!

18 Nu uni Jesuse lubeella:

―Nelíꞌhua nucuaꞌ, liꞌá ulañia nú xi neca chenu riaꞌla lee esquie uniti lunú rnibiyaꞌ bezeꞌlu. 19 Liꞌá uliquia lunú rnibiyaꞌa luhua, para nú mase nú taꞌhua equie bee beꞌla cuna equie bee nañi lliqui, nu leꞌca para nú riꞌihua ana lunú rnibiyaꞌ bezeꞌlu, nu lecaxi zecahua. 20 Pero la llilaꞌ arquiꞌhua nú sucuꞌ bee benechiquiꞌ stichiaꞌhua, mejora ullilaꞌhua nú nzucu ichila nú leehua lu ichiꞌ liñibe.

21 Hora zeꞌe chiquiꞌ ñia utsu arquiꞌ Jesuse equie cuendaꞌ Espíritu Santo, nu uninu:

―Paa liꞌilu enu rnibiyaꞌ liñibe cuna lu iliulabe, zucu ayáa liꞌilu xne uzeteꞌlu bee bene enu lecaxi reca lunú ucachiꞌlu lubee bene enu reca cuna lubee bene enu rriꞌi beyaꞌ. Paa scua ungae, xne scua riuꞌ arquiꞌlu nú acane.

22 ’Uliquiꞌla Diose Pa liñibe ye nú nibiyaꞌa lu ye beenú nuꞌ. Lecati nediyaꞌ ti neca Jesucristo Lliꞌñi Diose, Diose tsia nediyaꞌ nucuaꞌ, leꞌca tucutsia Jesucristo cuna bee bene enu nzeli arquiꞌ liꞌinu nuꞌlu Diose.

23 Chequie ubiꞌyanu lubee beneꞌnu, nu uninu lu liꞌitsia beella:

―Ñia nza lu cuendaꞌ bee bene enu rlañiꞌ lunú rlañiꞌhua, 24 xne nia luhua nú huaxi bee profeta cuna bee arre uniarquiꞌ beella nú lañiꞌ beella lunú rlañiꞌhua, pero né lañiꞌ beella nucuaꞌ. Nu uniarquiꞌ beella nú yeneꞌ beella nú rieneꞌhua pero né yeneꞌ beella nucuaꞌ.

25 Che utsuli tucu ulaxcuela enu reca leyꞌ Moisés nu unilla lu Jesuse para nú riꞌilla preo liꞌinu:

―Maestro, xi riala riꞌá para nú lucua elunehuañi nú leca xunga laxu liñibe.

26 Nu ucuaqui Jesuse lulla:

―¿Xi rni leyꞌ Moisés? ¿Nu xa rriꞌilu beyaꞌ nú rnii?

27 Chequie uni ulaxcuela zeꞌe, rni ley:

―“Uzeca liꞌinu enu neca Dioseꞌlu diquinuꞌ arquiꞌlu, cuna diquinuꞌ lunú necalu, cuna diquinuꞌ juerzalu, cuna diquinuꞌ elliebacuꞌlu, nu uzeca bee bene tucu nú secalu liꞌilu.”

28 Che uni Jesuse lulla:

―Ucuaqui nzeꞌcalu, tunu riꞌilu scua, luꞌculu eluhuañilílu liñibe.

29 Pero ulaxcuela zeꞌe niarquiꞌlla nú yaꞌna nzeꞌcalla lunú unidichiaꞌlla lu Jesuse, che unilla lunu:

―¿Ta bene zecaa tucu nú seꞌca liꞌá che?

30 Chequie uni Jesuse tucu ejemplu lulla:

―Tucu bene Israel uchiuꞌulla eyeche Jerusalén nu nzalla eyeche Jericó, che unaꞌtse bee huanaꞌ liꞌilla inziu nu udiñi beei liꞌilla, nu ucachiꞌ beei ye bee steneꞌlla hasta xuculla. Nu utsaꞌna beei liꞌilla xi neca tucu bene enu unguti. 31 Che udete tucu uleꞌya inziu zeꞌe, pero chenu ulañiꞌ uleꞌya zeꞌe nú nuxu bene zeꞌe, udete chechulla nu chu nzalla. 32 Leꞌca enza zeꞌe udete tucu levita enu rriꞌi elietsa lubee uleꞌya, nu chenu ulañiꞌ levita cuaꞌ nú nuxu bene zeꞌe, udete chechulla nu chu nzalla. 33 Chequie udete tucu bene Samaria inziu zeꞌe, chenu ulañiꞌlla bene enu nuxu lu inziu zeꞌe, uhuaꞌa arquiꞌlla bene zeꞌe. 34 Nu chu uyabicalla elu nuxu bene zeꞌe nu uriꞌilla remedio elu nediꞌqui bene zeꞌe cuna aceite cuna biñu, nu ullicaꞌcuulla elu nediꞌqui bene zeꞌe cuna laquie. Nu chu uricuꞌlla bene zeꞌe equie burruꞌlla nu unguyaꞌlla bene zeꞌe elu neca posada, zeꞌe ubiꞌyalla bene zeꞌe. 35 Chenu uyeꞌe lu yuu stucu bichia nú rquiene bene Samaria nú nzialla, che udixiulla lu bene enu neca stene posada lunú seca chiucu bichia riñaꞌ bene nu unilla lu bene zeꞌe: “Ubiꞌya benequieꞌ, tunu riꞌilu huaxilá gasto lu cuendaꞌlla, liꞌá ixiua nucuaꞌ chenu benchilaꞌ zecaa.” 36 Che uni Jesuse lu ulaxcuela enu reca leyꞌ Moisés: ¿Taa lu chuna bee bene enu udete lu inziu zeꞌe uzeca bene enu udiñi bee huanaꞌ?

37 Nu ucuaqui ulaxcuela zeꞌe nú unilla:

―Bene enu uhuaꞌa arquiꞌ bene zeꞌe.

Che uni Jesuse lulla:

―Uquia nu scua uriꞌi lu stucu bee bene.

38 Diqui nú nze riꞌi Jesuse seidu inziuꞌnu uriñanu tucu eyeche, zeꞌe uyanu niꞌi tucu unaꞌa enu lee Marta. 39 Marta quieꞌ rluꞌcunchu tucu belanchu enu lee María, nu uzucu María lu Jesuse para nú yeneꞌnchu lunú rninu. 40 Pero Marta chiquiꞌ rlialaꞌnchu rriꞌinchu beenú rriꞌinchu, nu uyabicanchu lu Jesuse nu uninchu lunu:

―Detá, ¿Xieꞌ la chenu arquiꞌlu nú tucutsia liꞌá utsaꞌna belaa ye bee riñaꞌ nú riꞌá la? Alaꞌ uniꞌi lunchu nú riꞌinchu elietsaa.

41 Nu ucuaqui Jesuse lunchu nú uninu:

―Marta, Marta, chiquiꞌ nzenu arquiꞌlu lu huaxi bee riñaꞌlu, 42 pero nuꞌ tucu nú máse neca equie. Maria ucañi nú máse neca equie, nu lecati caa nucuaꞌ lunchu.