5
Ichiꞌ nu Cordero
1 Chenu ulañia liꞌinu nú nzucunu lu xletaꞌnu, nzenenu tucu ichiꞌ yanu chube. Nu neyuꞌchine nu lu diꞌchii nequie letra, nu neyelaꞌe cuna achi sello. 2 Nu hora zeꞌe ulañia tucu ángele enu naaqui, enu fuerte rni:
―¿Ti riala axi bee sello cuaꞌ nu xaꞌla lu ichiꞌ cuaꞌ?
3 Pero niꞌ liñibe, nu niꞌ luyuu iliulabe, niꞌ liñi yuu né llela enu riala xaꞌla lu ichiꞌ cuaꞌ, niꞌ para nú lañiꞌ lunú niquie lue. 4 Nu Liꞌá chiquiꞌ runaa xne lecati ullela axeꞌche ichiꞌ zeꞌe niꞌ nú alañiꞌlla nú xi nequie lue. 5 Chequie tucu bee bene uxu zeꞌe uni lua:
―La unaꞌlu. Ubiꞌyacuru nee lañiꞌlu nú ullelala bene enu riala xaꞌla lu ichiꞌ cuaꞌ nu axilla achi sello zeꞌe xne uriꞌilalla ana lu yeene, enu neca xi neca bichie lu familiaꞌ Judá, equie elurnibiyaꞌ nú rluꞌculla nu liꞌilla nzeꞌtalla lu familiaꞌ arre David.
6 Nu chenu riꞌya ulañia, nú labe elu nzu xleta nú ñia rnaa nú rnaa xi rnaa xletaꞌ arre, zeꞌe nucuaꞌa tacu bee nañi, nu leꞌca zeꞌe nucuaꞌa bee bene uxu, nu elu nucuaꞌa bee bene uxu zeꞌe nzu tucu Cordero, nu huaxi seña nequie cuerpoꞌí chenu unguuti bee bene liꞌí, nu rluꞌcuí achi arta equieí nu achi iꞌculuí. Nu lu achi iꞌculuí nucuaꞌ neca lu achi Espírituꞌ Diose nú xeꞌlanu diqui lu iliulabe. 7 Che bene enu neca xi neca Cordero uyabicanu nu unaꞌtsenu ichiꞌ zeꞌe ya bene enu nzucu lu xleta zeꞌe. 8 Chenu unaꞌtsenu ichiꞌ nú neyuꞌchi zeꞌe, che dacu bee nañi enu nucuaꞌa axu cueꞌtse xletaꞌnu zeꞌe cuna ye ala chetaꞌcu bee bene uxu zeꞌe utsulliqui beella lunu. Ye beella nzene beella arpa, nu leꞌca nzene beella copa de oro nu liñii xiuꞌu llene nú ñia rlia, nu llenecuaꞌ neca bedichiaꞌ nú rnacuꞌ bee beneꞌ Jesucristo lu Diose. 9 Bee bene uxu cuaꞌ rula beella tucu canto cuqui nú rni:
Liꞌilu riala naꞌtselu ichiꞌ cuaꞌ nu axilu sello nú neyelaꞌe,
xne liꞌilu ungutilu lu cuendaꞌru nu cuna rene nú utiꞌchialu udixiulu para nú tsilaꞌa ye bee bene para nú aca beella bee beneꞌ Diose,
nu lecaxi riꞌi tunu xi dialu rni beella o xi familia beella nu xi eyeche nucuaꞌa beella, nu xi nación neca beella.
10 Liꞌilu uriꞌilu nú unga tucunecatse bee bene lu elurnibiyaꞌ nú rluꞌculu nu uriꞌilu nú unga beella
uleꞌya enu sibiꞌ lu Paꞌahua Diose,
nu nibiyaꞌ beella lu iliulabe.
11 Che chu ulañia nu ubenea chi huaxi bee ángele abenchilaꞌ xleta elu nzucu liꞌinu enu rnibiyaꞌ cuna bee enu nehuañi cuna bee bene uxu. Nu huaxi añi millón neca beella. 12 Nu chiquiꞌ fuerte rni beenu:
Benecuaꞌ enu neca xi neca Cordero liꞌinu enu unguti
riala nú luꞌcunu elurnibiyaꞌ, nu eluxene;
nu luꞌcunu elliebacuꞌ nu elunaaqui, nu ulaꞌna,
nu zucuꞌ aya bee bene liꞌinu nu nii bee bene bedichiaꞌ nzeꞌca lunu.
13 Chequie ubenea chii ye beenú urecheꞌ Diose, beenú nuꞌ liñibe, beenú nuꞌ lu iliulabe, beenú nuꞌ liñi yuu, beenú nuꞌ lu inzatuꞌ, rnibee:
¡Liꞌinu enu rnibiyaꞌ nzucu lu xleta, nu beneꞌnu
enu neca xi neca Cordero,
liꞌibeenu riala beenu elurnibiyaꞌ,
nu riala nibee bene bedichiaꞌ nzeꞌca lubeenu,
nu ni nzeꞌca bee bene lu cuendaꞌ beenu diqui tiembu,
nu leca xunga laxu nú riꞌi bee bene scua!
14 Nu uni dacu bee enu nehuañi zeꞌe:
―¡Amén!
Nu ye alachetaꞌcu bee bene uxu zeꞌe utsulliqui beella para nú luꞌcu beella ulaꞌna lunu, Liꞌinu enu leca xunga laxu nú nehuañi.