7
Equie cuendaꞌ 144 mil bee bene Israel enu nequie sello
1 Chenu ulaxu nú ulañia bee nucuaꞌ, che ulañia tacu bee ángele bee enu nucuaꞌa tacu squiñia iliulabe para nú la zela beenu nú aca bi enu enta dacu squiñia iliulabe, para nú la aca bi lu iliulabe, niꞌ lu inzatuꞌ, niꞌ lu niꞌ tucu bee aca. 2 Che ulañia stucu ángele enu nzeꞌta enza rliñi bichia, nzenenu selloꞌ Diose enu nehuañi. Nu che fuerte uni ángele quieꞌ lu dacu bee ángele enu ungutiꞌ poder para nú la riꞌi bee ángele cuaꞌ equiya lu iliulabe nu lu inzatuꞌ:
3 ―La riꞌihua equiya lu iliulabe, niꞌ lu inzatuꞌ, niꞌ lubee aca, hasta nú laꞌxuru quieꞌeru selloꞌ Dioseꞌru tequiee bee beneꞌnu.
4 Nu ubenea nú calu neca bee bene Israel enu nequietsia sello tequiee. Nu luye beella, neca ciento cuarenta y cuatro mil bee bene enu nequie sello tequiee. 5 Xne chiꞌchiucu mili bee bene enu nzeꞌta
lu familiaꞌ Judá bee enu uquie sello cuaꞌ.
Nu leꞌca chiꞌchiucu mili bee bene enu nzeꞌta lu familiaꞌ Rubén,
nu leꞌca chiꞌchiucu mili bee bene enu nzeꞌta lu familiaꞌ Gad.
6 Nu leꞌca chiꞌchiucu mili bee enu nzeꞌta lu familiaꞌ Aser,
nu leꞌca chiꞌchiucu mili bee enu nzeꞌta lu familiaꞌ Neftalí,
nu chiꞌchiucu mili bee enu nzeꞌta lu familiaꞌ Manasés,
7 nu leꞌca chiꞌchiucu mili bee enu nzeꞌta lu familiaꞌ Simeón,
nu leꞌca chiꞌchiucu mili bee enu nzeꞌta lu familiaꞌ Leví,
nu chiꞌchiucu mili bee enu nzeꞌta lu familiaꞌ Isacar,
8 nu chiꞌchiucu mili bee enu nzeꞌta lu familiaꞌ Zabulón,
nu chiꞌchiucu mili bee enu nzeꞌta lu familiaꞌ José,
nu chiꞌchiucu mili bee enu nzeꞌta lu familiaꞌ Benjamín ye bee familia quieꞌ uquie sello tequie beella.
Huaxi añi bee bene nutu laquie niquichi
9 Lu zeꞌela ulañia huaxi añi bee bene, enu enta lubee nación nu lubee eyeche, nu bee bene enu enta leta yelu bee familia nu yelu clasiaꞌ dialu rni beella. Nucuaꞌa beella enza lu xletaꞌ bene enu rnibiyaꞌ nu lu Cordero, nu huaxi añi beella hasta nú lecaꞌ ti riꞌi ana lacuꞌ beella, nu nutu beella laquie niquichi, nu nzene beella iñia. 10 Ye beella ubixiali beella nu unibeella:
Paꞌru Diose neca enu utsilaꞌa liꞌiru nu nzucunu lu xleta,
nu chiquiꞌ rnibiyaꞌnu cuna Corderoꞌnu.
11 Nu ye bee ángele enu nucuaꞌa abenchilaꞌ xletaꞌnu cuna ye bee ala chetaꞌcu bee bene uxu nu dacu bee enu nehuañi, nucuaꞌa abenchilaꞌ xletaꞌnu zeꞌe, che utsulliqui bee ángele zeꞌe elu nzucunu hasta nú udiꞌ tiquiee beella lu yuu para nú ni beella bedichiaꞌ nzeꞌca lunu, 12 nu uni beenu:
¡Amén! Liꞌinu enu rluꞌcu ye poder nu juerza
nu elliebacuꞌ nu riala nú luꞌcu bee bene ulaꞌna lunu,
nu zucuꞌ aya bee bene liꞌinu
nu deteꞌ bee bene cheꞌtsa lunu,
nu ni bee bene bedichiaꞌ nzeꞌca lunu,
ye tiembu liꞌinu enu neca Paꞌahua Diose. Amén.
13 Hora zeꞌe tucu lu alachetaꞌcu bee bene uxu zeꞌe unedichiaꞌ lua:
―¿Ti neca bee bene enu nutu laquie niquichi cuaꞌ, nu ca bene beella?
14 ―Nu ucuaquia, la riꞌá beyaꞌ Detá, liꞌilu nediyaꞌlu.
Che uni nzeꞌe:
―Liꞌibeella neca beella bee bene enu chiquiꞌ nehuana ulleꞌca, nu nee nequichiuu xucu beella equie nú utsanaꞌ arquiꞌbeella stula beella, equie cuendaꞌ reneꞌ Corderoꞌ Diose.
15 ’Enzeꞌe nucuaꞌa beella lu xletaꞌ Diose nú neca equie nu bichia si rulaꞌ sibiꞌ beella liñi indu elu nzucunu, nu liꞌinu enu nzucu lu xleta nú neca equie zeꞌe, nzunu cuna liꞌibeella, nu liꞌinu rriucunu liꞌibeella. 16 Nu lecaꞌ bichia nú liaꞌnaꞌ beella, nu bichiꞌ beella, leꞌca la tsiquiaꞌ beꞌbichia liꞌibeella nu niꞌ la aca neleaꞌ zeca beella, 17 xne Cordero enu nzu elu nzucu Diose. Liꞌinu biꞌyanu liꞌibeella tucu nú rriucu tucu bene bee sanchi, nu uyaꞌnu liꞌibeella elu rliñi inza nú rliquiꞌ elunehuañi, che Diose ñieꞌe ye inza nú ungunaꞌ beella lubeella.