19
1 Luzeꞌela chenu ulañia nu ubenea bee nucuaꞌ, che fuerte ubenea huaxi bee chi nú uni enza liñibe:
¡Cheꞌtsa Diose!
Xne equie cuendaꞌnu tsilaꞌa bee bene xne rluꞌcunu poder.
Liꞌinu riala luꞌcu bee bene ulaꞌna lunu nu nii bee bene bedichiaꞌ nzeꞌca lunu.
2 Nu liꞌinu neli neca nú rriꞌinu
nu neli rriꞌinu elu usticiaꞌnu,
nu udeteꞌlanu castiya lu unaꞌa huexe
enu uzequienu arquiꞌ bee bene iliulabe
cuna equie nú necha rriꞌinchu,
nu uriꞌila Diose elu usticiaꞌnu cuna liꞌinchu
para nú ixiunchu nú udiñi bee bene bee beneꞌnu.
3 Nu ubene zecaa nú uni bee chi zeꞌe:
―¡Cheꞌtsala Diose!
Lecaꞌ bichia nú laxu llene nú riqui eyeche cuaꞌ.
4 Nu ye lu alachetaꞌcu bee bene uxu zeꞌe nu dacu bee enu nehuañi zeꞌe, utsulliqui beella ante lu xleta elu nzucu Diose rnibiyaꞌ para nú luꞌcu beella ulaꞌna lunu, nu unibeella:
―¡Cheꞌtsalá Diose! ¡Bee bedichiaꞌ nzeꞌca neca para liꞌinu!
5 Che ubenea tucu chi enza lu xleta enza nzucu Diose nú uni:
Yehua sia bee bene uxu nu sia bee enduꞌ
uniꞌhua bedichiaꞌ nzeꞌca lu Diose,
liꞌihua enu sibiꞌ lunu, nu rluꞌcu ulaꞌna lunu.
Eluchia Corderoꞌ Diose
6 Nu ubenea xi neca chenu rni huaxi chi bee bene, urre xi neca chenu rula huaxi inza, urre xi neca chenu rachu huaxi beziyuꞌ, rni:
¡Cheꞌtsalá Diose! Xne rnibiyaꞌlanu Liꞌinu enu
neca Dioseꞌahua,
nu rluꞌcu ye elurnibiyaꞌ.
7 Ñiatsu arquiaꞌahua,
nu llilaꞌahua nu riala niaꞌahua
bedichiaꞌ nzeꞌca lunu,
xne uriñala bichia nú chia enu neca Corderoꞌ Diose.
Nu enu aca unaꞌnu ñia nzucheꞌla.
8 Nu nutulla laquie fiñio nú necacheꞌ lino nú
lecaxi naa nu rulusiquiꞌ.
Nu laquie cuaꞌ neca beenú neca nzeꞌca uriꞌi bee beneꞌ Diose.
9 Chequie uni ángele lua:
―Uquieꞌe: “Chiquiꞌ ñia neca lu cuendaꞌ bee bene enu nezeneꞌ lu tsaꞌa Corderoꞌ Diose.”
Leꞌca uni ángele zeꞌe lua:
―Ninguieꞌ neca Stichiaꞌ Diose nú neli neca.
10 Che utsulliquia lu ángele zeꞌe para nú luꞌcua ulaꞌna lunu, pero uninu lua:
―La riꞌilu scua xne necatsia tucu nú necalu, xne necatsia enu sibiꞌ lu Diose, tucu nú rriꞌi beelá bee saꞌlu bee enu neli nzenala stichiaꞌ Jesucristo. Uluꞌcu ulaꞌna lu Diose la riꞌilu scua lua.
Xne equie cuendaꞌ Jesucristo nzeꞌta bee bedichiaꞌ nú rni bee profeta.
Bene enu nchiucuꞌ huayu niquichi
11 Che ulañia nú naꞌla liñibe nu ulañia tucu huayu niquichi, nu enu nchiucuꞌ equieí lee enu neli saꞌalu ye nú rni, nu enu neli neca, nu rriꞌinu elu usticiaꞌnu tucu nú necane, nu rriꞌinu xuu tucu nú rialane. 12 Nu bee iꞌculunu rulusiquiꞌ xi rulu quii, nu huaxi corona nzucu equienu, nu tucu parte cuerpoꞌnu nequie tucu nombre nú lecati riꞌi beyaꞌ xi rni, tucutsia liꞌinu nediyaꞌnu xi rni nombre cuaꞌ. 13 Nu laquie nú nutunu chiquiꞌ nuꞌ rene, nu Stichiaꞌ Diose leenu. 14 Nu bee sundadoꞌnu enu nucuaꞌa liñibe nzenala liꞌinu nchiucuꞌ equie bee huayu niquichi, nu nutu bee nzeꞌe laquie fiñio nú niquichi nu leca xinaa. 15 Nu ruꞌunu xiuꞌu tucu espada nú chiquiꞌ nelatsa, para nú deteꞌnu castiya bee bene iliulabe, nu cuna bara nú neca hierro nibiyaꞌnu lubee benecuaꞌ. Xi neca chenu rtaꞌ bee bene equie uva para nú tsiꞌi, scua deteꞌnu castiya liꞌibeella, castiya nú nzeꞌta lu Diose, liꞌinu enu rluꞌcu ye poder. 16 Nu tetsuꞌ copaꞌnu nu tetsuꞌ cuchiuꞌnu nequie bedichiaꞌ nú rni: “Arre enu rnibiyaꞌ luye bee arre, nu rnibiyaꞌnu luye bee enu rnibiyaꞌnu.”
17 Che ulañia tucu ángele enu nzu lu bichia, chiquiꞌ fuerte urixialinu, nu ubixianu bee iñi enu rcuecuꞌ liñibe, nu uni ángele cuaꞌ lubeeí:
―Utehua nu uyetesaꞌhua elu liquiꞌ Diose huaxi nú acuhua, 18 para nú acuhua miꞌ bee arre nu miꞌ bee bene enu rnibiyaꞌ lubee sundado nu miꞌ bee bene enu nelachi, cuna miꞌ bee huayu, cuna miꞌ bee bene enu nchiucuꞌ equie bee huayu, cuna miꞌ ye bee bene, tanto bee bene enu neca esclavo cuna bee bene enu la aca esclavo, cuna miꞌ bee bene uxu cuna miꞌ bee bene enu nereꞌneꞌ.
19 Che ulañia monstruo cuna bee arre lu iliulabe cuna bee sundadoꞌ beei neyeteꞌsaꞌla beei para nú liunubeei liꞌinu enu nchiucuꞌ equie huayu niquichi cuna bee sundadoꞌnu. 20 Pero che unaꞌtse beenu monstruo zeꞌe cuna profeta enu uzequienu arquiꞌ bee bene, enu uriꞌi milagro ante lu monstruo zeꞌe. Nu equie cuendaꞌ milagro zeꞌe uzequienu profeta cuaꞌ arquiꞌ bee bene enu uzela uquie señaꞌ monstruo cuaꞌ, nu uluꞌcu beei ulaꞌna lu imagenꞌ monstruo cuaꞌ. Nu profeta enu uzequienu arquiꞌ bee bene cuna monstruo cuaꞌ rucuaa bee nucuaꞌ utsiꞌqui nehuañi beenu lu eyela elu nuꞌ quii nu azufre. 21 Nu cuna ye beelá bee bene enu uzucuꞌ nú uni monstruo cuaꞌ, unguti beei cuna espada nú uchiuꞌu ruꞌu bene enu nchiucuꞌ equie huayu zeꞌe, nu ye clasiaꞌ bee iñi zeꞌe udacubeeí miꞌ bee nucuaꞌ hasta nú ubelaꞌbeeí.