1 Cona, ngue niin loo gu': Bli gu' cuent nac nu' loo gu' xal thìb mèn co' nxo'f zin' cón che'n Crist tac por con'a mblec Diox nu'. No mxo'f zin' Diox loo nu' par lu' nu' no ngo xo'f nu' ryethe con' co' nac cón che'n Diox co' yub Diox mbli ngo casloo loo mèn póla par ta' gu' cuent cón che'n Crist co' huenleque'. 2 Más de cona, gu' nda'que' cuent le' mèn co' nxo'f zin' zin', naquin tyoo mèna altant loo zin'a. Tataa ndxàca loon loo zin' ndxè'. 3 Cona, ngue niin loo gu': Part cón chenen, yende chó mport nzo lezon chele' gu' lya's tub rez cón che'n xá mod ndyubdizen loo Diox. Ne' ne' indyóon chele' chol mèn nac zin' lya's tub rez cón chenen, ne. Ne' ne' indub rezen cón chenen loo mèn. 4 Part cón chenen, mastale' ndyaquen le' ryethe con' co' nden'en le'n lezon ingue zib quìide loon nec thìb con', inacte por conade indxàpten dol. Ndxe'leque', Tad Crist nac xa' co' ngue tub rez cón chenen. 5 Por cona, ne'tub rezte gu' cón che'n chol mèn ndoore' co'se' gàc huiz co' yi'th tub rez Tad Crist cón che'n mèn. Huiza, co xo'f Tad Crist ryethe con' ye'rsin' co' mbli thìb thìb mèn loo xnaa co' nzo casloo le'n tiemp ndxè'. No lu' Tad Crist loo xnaa ryete con' co' ndoo lezo' mèn li mèn. Axta syare', li Diox par tyu' gu' loo mèn.

6 Di's co' ntetaquen cón che'n ryop nu' Apol loo gu', mèn huesen por cón che'n Crist, nac di's co' ndlu' cón che'n mod co' ndxàp nu' par càba thìb con' ndac loo gu'. Tataa mblina loo gu' par gàca le' gu' té'th no non gu' xal ndxàal que tee ban gu', no par ne'té'thte gu' no ne'ta'de gu' lugar tyub nza gu' loo di's co' ndlu' tedib mèn co' inacte xal di's co' ndub loo libr co' nac xti's Diox co' mbez: Ne'tye'ste thìb thìb gu' par ya thìb thìb gu' favor che'n thìb xtàa gu' no tedib xtàa gu' par gàc ndxep gu' thìb ned mèn no gàc taandxep gu' tedib ned mèn par gàca loo gu' tè'b gu' thìb xtàa gu' no tedib xtàa gu' làth gu'. 7 Ne'tyóode gu'. Nde niin thìb con' loo gu': ¿Chó mbli nac gu' más mèn ndac no mèn co' más ndyu' loo taamas hues xtàa gu' xal ndli gu' cuent nalle', à'? Thìba con' ndxè'.

Le' tediba na, ¿xá ñaa thìb con' ndxàp gu' liz gu' co' nac con' co' ne'nglide Diox ndxàp gu' con'a, à'? No chele' Diox mbli ndxàp gu' con' liz gu', ¿chonon susque' ndye's gu' no ndli gu' cuent ale leque gu' ngue xèn' con'a par ndxàp gu'i liz gu', à'?

8 Nase yixo. Ale ndyac gu' nacle' gu' mèn co' mté'th axta plóthe cón che'n Diox. No ndyac gu' ya inquinte tolo té'th gu' no gòn gu' más con' cón che'n Tad Crist, ¿lé'? No ale ndyac gu' mcàaya'le' gu' ryethe con' cón che'n Crist. No ale, ndyac gu' axta ngue ñibe' gu' loo cón che'n Diox xal ngue ñibe' Crist loo cón che'n Diox, ne, ¿lé'? Mastale' ne'nglu'de nu'i loo gu', ale ndxe'leque', ndyac gu' nac gu' xal chol rey co' yende chó mèn ñibe' loo. No por ngro xà' gu' loo nu' no por mtè'f gu' nu' thìb lad, ndli gu' con'a. Oj ché' co', lìcque', ngue ñibe' nole' gu' Crist, huen. Le' sya, thidte ñibe' no gu' nu' loo cón che'n Crist, ne. 9 Con' co' ngue lin xtùuz no con' co' ndyaquen nac: Le' Diox mblec nu' co' ndxe' di's che'n Crist xal mèn co' nac más be'the co' yende cón ntac loo chol taamas mèn co' mxo'f zin' zin' che'n Diox. Nac nu' mèn co' naba'leque' gathxù' xalque' mèn co' nac mèn ye'rsin'túb. Tac, lìcpe' ba'i, loo mèna nac nu' mèn co' ndli sirv loo mèn xal thìb con' co' nda' xquith lezo' mèn. Tataa ndxàca loo nu' par hui' ryete mèn che'n izlyo' ndxè' loo nu', que naca loo angl co' nzo loo bé', que naca loo chol mèn co' nziri' loo izlyo' par xìis no mèna no xìis no angl nu', ndyaquen. 10 Mèn izlyo' ndli cuent le' nu' nquée mbii yéc tac ngo nu' yalbàn cón che'n Crist. Le' part cón che'n gu' na, leque gu' mbez le' gu' angndxác loo cón che'n Crist, ¿lé'? Naneeque' nu' le' nu' nac xal mèn co' mbuu'sle'. Per por part cón che'n gu', ale ndyac gu' axta arid mbi' tín' gu'. Rye mèn gulàaz gu' nxo'f lèe nxo'f xti's gu'. No ndli mèn gulàaz gu' con' guryath no con' guryèn loo gu'. Per por part cón che'n nu', ale ndxe'leque', nxìis no mèn prob nu' no ntè'b mèn nu', ne. 11 Axta huiz co'se' mtlo mxo'f zin' nu' zin' ndxè' no axta huiz nalze nzi tee lan' nu' no nzi tee yath huin nu'. Nzi tee yec lezo' nu', ne. Ale mbiiz mbuu's ro nu'. Nde teele' nzi tee che nu'. Yende xab nu'. Ale ngox mdyal nu' nzi tee nu'. Nde nxon', ndli mèn ngòc nguàal con' loo nu'. Nde'b bit nde'b mingue lad nu'. ¡Prob nu' izlyo'! Axta ne' ne' yen liz nu' par yòo ban nu'. Nzi tee nu' làaz mèn tith xal mbin bé'. Yende liz nu' ned ngue tee nu'. 12 Ndli nu' zin' con ya'pe' nu' axta ndxezan nu' axta plóthe. Nde nxon', nde mèn. Nda' mèn xyàn lezo' nu'. Por part cón che'n nu', nado' di's nado' cuent ncàb nu' loo mèn no mbez nu' loo mèna: Diox quix gu', ndee. Ale ndub ngu's mèn nu', ne. Per nxec yèe nu'i. 13 Ale ñii yèe ñii tìi mèn nu'. Per mastale', nado' di's nado' cuent ncàb nu' loo mèna. Ndli mèn cuent nac nu' xal yix co' ndxe' mbii loo mèna no yende cón ntac nu' loo mèna. No nac nu' xal mbe'th co' ndoo lad mèn loo mèna axta huiza no axta huiz nalze.

14 Ingue que'den ye's loo gu' par tethonen gu', ey. Ndxe'leque', ngue que'en ye's loo gu' co' nac xal xin'en par co'xen loo gu'. 15 Tac mastale' ngòca loo gu' ngue no gu' si' mil mèn co' ngòc xal maistr co' ndlu' gu', yende chó mèna ngòc xal xud gu'. Ndxe'leque', loo cón che'n Crist Jesús nac daa xal xud gu' tac daa mblo yalbàn loo gu' co' ndlu' xá mod lyá' mèn loo con' ryes. No por cón chenen ngola's gu' loo Crist. 16 Por cona, ña'ben loo gu', ey, fque tee ban gu' xalque' nque tee banen.

17 No por cona, mtel'en Timote loo gu'. Timote nac xal xgan' daa co' anze'f nque' lezon ñèen. Anze'f altant ndoo Timote loo cón che'n Tad Crist. Timote ta' cuent loo gu' xá mod ngue tee banen loo cón che'n Crist. Timote lu' loo gu' xá mod nque tee lu'en mèn rye lugar co'te' nqueltàa mèn liz Diox, ne. 18 Nzo ndxep mèn làth gu' co' ndye's no naxal' ndyoodi's mèna tac nden' mèna peser ne'gal needen máa gu' par nedrè' thidtene. 19 Per chele' Tad nee lezo', chàa, gal neen máa gu' par nedrè' par ñee nu' ñeene' ché', lìcque', anze'f ndxác mèna, mèn co' ndye's làth gu' xal nac mod co' ndyoodi's mèna con di's co' nxyal' mèna. 20 Tac co'te' ñibe' Diox inacte di's co' angndyoodi's mèn. Ndxe'leque', co'te' ñibe' Diox, ñibe' Diox con ryethe con' co' nzo la's nii Diox no con' co' nzo la's ya' Diox loo mèn co' ngòole' loo cón che'n Diox. 21 ¿Xá nee gu'? ¿Ché' más huen yo lezo' gu' le' daa gal loo gu' par gàc nayi'en no yoon gu' con gáp di's con gáp cuent, cà', o ché' más huen yo lezo' gu' gal neen máa gu' no nado' di's nado' cuent tyoodi's non gu' xalque' mèn co' anze'f nque' lezo' ñèe gu', cà'?