1 Hui' gu' nexa. Chele' daa ndyoodi's huax di'stèe co' ndyoodi's chol mèn no ndyoodizguè'en chol di'stèe co' ndyoodi's angl che'n Diox co' ne'gònte mèn no co' ne'ta'de mèn cuent no làth xtau'a inque'de lezon ñèen chol mèn co' ndxàc huesen no xtàan, nac daa xal thìb tambor co' alithe ndyez. No nac daa xal thìb le' yi'f co' nte's mèn co' alithe ndyez, co' nee di's, anxle' ndyoodizen no yende cón ntac daa loo Diox. 2 Chele' daa nac mèn co' mbli Diox ngo yalbàn cón che'n Crist loo mèn, no chele' Diox mbli par nonen no tan cuent cón che'n ryethe con' co' nzo casloo loo Diox cón che'n co' mblo xnee Diox par li Diox, no chele' Diox mbli pan nonen no tan cuent cón che'n ryethe con', no chele' Diox mbli par ndxàpen yalxla's loo Diox axtaque' lin gan techeen thìb yii co'te' ndub yii no làth xtau'a inque'de lezon ñèen mèn huesen no mèn xtàan, yende cón ntac daa loo Diox. 3 Lomisque' ne, chele' daa li'th ryete xyònen no yalgon' co' ngue non par tana càa mèn co' ndyac yaltìi no chele' daa gath loo quìi no loo bèel por cón che'n di's ndac no làth xtau'a inque'de lezon ñèen huesen no xtàan, yende cón ntac daa loo Diox.

4 Mèn co', lìcque', nque' lezo' ñèe hues xtàa, mèna nxec yèe no ncha'la's mèna loo ryethe con' co' ndxàc loo mèn. Mèn co', lìcque', nque' lezo' ñèe hues xtàa, mèna nac mèn nado' loo rye mèn. Mèn co', lìcque', nque' lezo' ñèe hues xtàa, mèna indxànte lezo' ñèe yalgon' che'n xtàa mèn. Mèn co', lìcque', nque' lezo' ñèe hues xtàa, mèna indye'ste no inxyal'te loo xtàa mèn. Ne' ne' inac mèn co' nque' lezo' ñèe hues xtàa mèn mèn co' ndxoc xab co' ñaa nít nayèe par hui' taamas mèn loo mèna xal ndryec nxyub mèna. 5 Mèn co', lìcque', nque' lezo' ñèe hues xtàa, mèna ndxàp mod ñèe hues xtàa. Incua'nte mèna mod ante gàc con' ndac loo cón che'npe' mèna. Ne' ne' inda' mèna lugar nzyo yéc mèna setilte. Ne' ne' inac mèna mèn co' ngosua' xyàn le'n lezo' cón che'n chol con' ye'rsin' co' ndli taamas mèn loo mèna. 6 Mèn co', lìcque', nque' lezo' ñèe hues xtàa, mèna indyacte lezo' ñèe chol mèn co' ndli con' co' inacte con' nalì no con' nambìi loo xtàa mèn. Ndxe'leque', mèn co' nque' lezo' ñèe hues xtàa, mèna ante ndyac lezo' co'se' nque tee ban mèn ante loo co' nac con' lìcpe'. 7 Mèn co', lìcque', nque' lezo' ñèe hues xtàa, mèna ntau' loo cón che'n xtàa mèn par ne'gònte taamas mèn cón che'n xtàa mèna. Mèna ndxàp yalxla's loo hues xtàa mèna. Mèna, ne, nzi quee lezo' par càb ryethe con' ndac loo mèna. Mèna, ne, nxec yèe loo ryethe con' ndxàc loo mèna.

8 Ne'ryede mèn co' nque' lezo' ñèe hues xtàa. Per zin thìb huiz no zin thìb ze co'se' ne'tolode te'th mèn di's co' ndxab Diox co' gàc. Tac mbyathle' no mbyènle' ryethe con' ndxab Diox. No zin thìb huiz no zin thìb ze ya ne'tolode tyoodi's mèn chol di'stèe co' yende chó mèn gòn. No zin thìb huiz no zin thìb ze co'se' ya inquinte lu' mèn loo hues xtàa mèn cón che'n ryethe con' co' nzo casloo loo Diox no co' mblo xnee Diox par li Diox. 9 Láth naban nu', lìcque', ne'ta'de nu' cuent cón che'n ryethe con'. Lomisque' ne, ante co' ndxácte nu' ngo nu' yalbàn cón che'n Diox. 10 Per ndxe'leque', co'se' ngolo mdyaa ryethe con' co' gàc loo nu', axta syare' tolo ta' nu' cuent no más clarleque' non nu' cón che'n ryethe con'.

11 Co'se' ngòc daa myen' bix, alithe ndyoodizen xal ndyoodi's myen' bix. Alithe mblin xtùuz xal ndli myen' bix xtùuz. Per co'se' ngòcle' daa thìb mbi', mblá'en ryethe con' co' nac mod co' alithe ndli myen' bix. 12 Lomisque' mod ne, láth be' naban na', loo ryethe cón che'n Diox ndxos xtùuz na' no ne'ñee'de na' cón ngue li na'. Ndxàca loo na' xal mèn co' nathath ngüi' loo thìb spej loo con' co' nac cón che'n Diox nalle'. Per co'se' gàc huiz co' tyaa ryethe con' co' gàc loo na', syare' clarleque' hui' na' no ten' na' no li la's na' ryethe con' xal thìb mbi' co' ndxe'sleque' ngüi' con'. Per nalle' axta ne' ne' indan cuent no ne' ne' iñeen co' huenleque' cón che'n ryethe con'. Per huiza, syase tan cuent no ñeen ryethe con' xalque' non Diox no nanee Diox ryethe con' cón chenen nalle'. 13 Por cona, ngue niin loo gu' nalle': Nzo son con' co' ndxàalque' tolo li mèn thidtene. Con'a nac con' ndxè': Thìba: tolo gàp mèn yalxla's loo Diox thidtene. Le' tediba na, nac: toloque' cue quee lezo' mèn loo con' co' gàc loo mèn thidtene. Le' tediba na, nac: tolo que' lezo' mèn Diox, no que' lezo' mèn ñèe mèn hues xtàa mèn thidtene. Per con' co' nac más con' roo con' xèn co' ndxàal li mèn loo yon con' ndxè' nac: que' lezo' mèn Diox, no que' lezo' mèn ñèe mèn hues xtàa mèn thidtene.