1 Che cadejd Jesús te lajt, bahuiini sobga' te bejṉ ni che gojlli bejṉga agajc natiä'p balojni. 2 Dxejc gunabdiidx rexpejṉpacni lojni, räjpreni:

―Mastr, ¿chuni'c bejn dojḻ, la bejṉre o la xcuzajnni, ni'c natiä'p balojni che gojlni, ä?

3 Räjp Jesús:

―Nicla laani, niclaza xcuzajnni di niujn dojḻ. Si'c gojlni te xcuent ni sajc bejṉre suhuii bejṉ xho najc xtzuun Dios. 4 Nanab gunä xtzuun nani baxhaḻ narä ṉaj ni najc rdxee, sa'csi cheni guidzujṉ guxhijṉ rut gacdi gun dzuun. 5 Laḻni yu'ä lo rebejṉ guedxliuj, nacä xpianij guedxliuj.

6 Che gulujx guniini si'c, batiobxhejnni lo yuj, bejnni bajṉ con xhejnni, gudääbnini con bicueṉaani lo rebaloj lotiä'pga. 7 Dxejcti räjpni:

―Huij, huitiib lojlu neṉ nis ni laa Siloé. Laj nisga sälojza “baxhaḻni”.

Dxejcti huijni. Huitiibni lojni. Che gubi'ni, aruhuiini. 8 Dxejcti rexpisiṉ lotiä'pga, näj renani galoo bahuiireni natiä'p lojni, räjpreni:

―¿La et laadi dee ni rbej te rutie'ni gojn, ä?

9 Yu'reni räjp:

―Laanini.

Yu'zareni räjp:

―Et laadini, rujnsi lojni si'c.

Laani räjpni:

―Laa naräni.

10 Räjpreni lojni:

―¿Xho mood arieṉ balojlu?

11 Dxejcti räjp dade'ga nani gujc lotiä'p:

―Dade' ni laa Jesús bejn bajṉ, gudääbnini baloä, dxejcti najni: “Huitiib lojlu neṉ te nis ni laa Siloé”, dxejcti che huitibä loä, lagajc dxejc bieṉ loä.

12 Dxejcti räjpreni lojni:

―¿Con dade'ga ṉaj?

Räjpti bejṉga:

―Dina ganä.

13 Huinäreni nani gujc lotiä'pga nez loj refarisee. 14 Luxh sa'csi najcni dxej ni rusilajzreni che bejn Jesús bajṉ ni gudääbni loj lotiä'pga te biajc balojni, 15 gunabdiidxsac refarisee loj dade' nani biajc balojni, xho mood arieṉ balojni ṉaj.

Laani räjpni lojreni:

―Bajṉ gudääbni loä, dxejc gudibä loä, ṉaj aruhuiä.

16 Dxejc yu' refarisee ni räjp:

―Di dade' ni bejn dee gac xpejṉ Dios, sa'csi dini jiu dxej ni rusilajz xpejṉ Israel.

Yu'zareni räjp:

―¿Xho gac gunni sa' remilagwrga paru najcni beṉ dojḻ?

Ni'cni gula' sa'reni, gujcreni tio'p gala'. 17 Dxejcti gunabdidxsacreni lo ni gujc lotiä'p:

―Luj a', ¿xhi rniilu xcuent nani basiajc balojlu?

Dxejc räjp dade'ga:

―Narä rniä najcni te bejṉ nani rnii xtidx Dios.

18 Luxh rexpejṉ Israel naaddireni chalii lajzreni gujcpacni te lotiä'p ni abieṉ balojni, dxejcti gurejdxreni xcuzajn dade' ni gujc lotiä'pga. 19 Dxejcti gunabdiidxreni lojreni, räjpreni:

―¿Laa xi'ntu dee nani najtu cheni gojllini natiä'p lojni? ¿Xhoxh arieṉ lojni ṉaj?

20 Badzu' rexcuzajnni diidxre, räjpreni:

―Nadonnu laa xi'nnuni, luxh che gojlni natiä'p lojni. 21 Niluxh dinu guidon ṉaj xho mood arieṉ lojni, dizanu guidon chu basiajc balojni. Coḻguiniabdiidx lojni, anajcni beṉgool, lagajc laani sajc guiniini xhi gusajcni.

22 Si'c gunii xcuzajnni sa'csi rdxejbreni rexpejṉ Israel, sa'csi agac bia'nreni diidx sibääreni, dirureni gusaan jiu' neṉ guidoo chutis te bejṉ ni naa Jesús najc Crist nani abiääd. 23 Ni'cni räjp rexcuzajnni:

―Anajcni bi'n ni ayu' xcäriejnni. Lojni coḻguiniabdiidx.

24 Dxejcti guredxsacreni nani gujc lotiä'pga, räjpreni lojni:

―Gulä'p xpala'n Gueb Dios. Nuure nadonnu beṉ dojḻ najc dade'ga.

25 Dxejcti badzu' dade'ga diidxre, räjpni:

―Dina ganä la najcni beṉ dojḻ o la dini gac. Tejtis nanä: gucä lotiä'p, luxh ṉaj arieṉ baloä.

26 Stehuält gunabdiidxreni, räjpreni lojni:

―¿Xho bennäjni luj? ¿Xho bejnni basiajcni balojlu?

27 Badzu' dade'ga diidxre, räjpni:

―Ni aguniä guira'ti lojtu, luxh la'tu ditu jiu xtidxä. ¿Xhicuent rlajztu guinisacäni? ¿Xhixh näj la'tu rlajztu gactu xpejṉpacni, ä?

28 Dxejc gudiḻnäjrenini, räjpreni:

―Luj najclu xpejṉni, per nuure najcnu xpejṉ toMoisés. 29 Anadonnu guninäj Dios toMoisés, niluxh dade're dinu guidon casiäädni.

30 Dxejcti räjp dade' lojreni:

―Dee najc te cos ni guidxeloj bejṉ: la'tu ditu gan casiäädni, ¡niluxh laani basiajcni baloä! 31 Nadoncheenu di Dios cuadiajg xtidx rebeṉ dojḻ; palga yu' chu rajṉ Dios, ni rusoobza xtiidxni, rucuadiajg Dios xtidx sa' bejṉga. 32 Che guslojli guedxliuj gajd diajgnu jiejn xcuent te bejṉ nani rusiajc baloj te beṉ lotiä'p nani natiä'p lojni cheni gojllini. 33 Palga xhet lo Diosdi siääd dade're, xhet sajcdi gunni.

34 Badzu'reni diidxre räjpreni lojni:

―Luj, lo dojḻpac gojllu, ¿xho jiädluiilu nuure?

Dxejcti guläärenini neṉ guidoro, barilaagwrenini.

35 Biejn diajg Jesús guläärenini neṉ guidoro, che bidxälnini, räjpni lojni:

―¿La rililajzlu xtidx ni najc Xi'n Dios ni gujc Niguii, ä?

36 Badzu'ni diidxre, räjpni:

―¿Chuni'c najcni, Dad, te chalilazä xtiidxni?

37 Räjp Jesús:

―Abahuiilu lojni, lagajcza laani caninäjlu ṉaj.

38 Dxejcti räjpni:

―Rililazä Dad.

Dxejcti bazuxhijbni te gojṉnini.

39 Räjp Jesús:

―Par yäḻguxhtis biälä lo guedxliujre, te fii renani di lojni jieṉ, niluxh reni rieṉ lojni sajcreni lotiä'p.

40 Refarisee nani suganäjreni, che biejn diajgreni diidxre, räjpreni:

―¿Xhixh najczanu beṉ lotiä'p, ä?

41 Räjp Jesús:

―Paru najctu lotiä'p, rut gucuaquijditu xtojḻtu, ṉaj sa'csi rniitu rieṉ lojtu, sicaquijtu rextojḻtu.