1 Bets, bzian, nu laa naa gbire gzet lo to gaṉle zha nac Xtiidz Dios. Zigne biaḻseed naa tow, scataque naca; led yeda rdzëë. Lëëw ga pcaania to, ni haxta niinagaa rliladz tow. 2 Lëëw rlu zha grieelo ycaania Dios to, totsaque nli dib zdoo to bliladz tow, ni bii lëëgaaw rnalo to.

3 Zeeṉe biaḻ naa lo to i, pseed naa tow zigne pcaaniase naaw. Gocnaṉ to cho nac Jesús, gocnaṉ to por xtoḻ ne gut me lo cruz, zigne zhobneesew lo Xtiidz Dios. 4 Gocnaṉ to gaṉle zeeṉe goc tsoṉ ngbidz pqueets zho me laa me brieeban, zigne raquietaquew lo Xtiidz Dios. 5 Leṉ dze ne brieebanle me ga, goṉlo Pedr me, niicle grëragaa zha ne nacgza Pedr bzënie zho me, goṉlo zho me sac güeyted me lo zho. 6 Güey me güeyted me zaatne ndxie ndziibsraa gaay gayoo zha ne nole xnëz me, grëse zho goṉ me; ndal zha co bii mban niina. 7 Bded ga goṉaque Santiagw me, ni biire güey me lo zha ne bzënie me ga stib; 8 goc palal tiempa, lega naclew haxta lo naa brieequia me. Teḻ naa goṉ, rrieequia nac naa zig tib mëëd ne rzamëëd, 9 lo grëraa zha ne nac poxtl, ni lalnu peet nond naa, per ni rdzieeld gnee zho naa poxtl; sac goṉ pa lotaa ptsidiḻ naa grë zha ne glopaa bzëëb xnëz Dios. 10 Per xquizh Dios tibaque noxco me naa, bzooblo me naa gane laa naa nac miṉe nac naa niina. Ni led zhlëdgaa bzooblo me naa, sac goṉ nroobraa xtsiiṉ me noyuṉ naa lo miṉe noyuṉ grëraa poxtl; per rned naa togo naase quiayuṉa, sinque me noyacnie naa rrieelo noyuṉ naaw.

11 Laa naa rzet miṉ rii, per nacda par glu dieṉ cho nroobraa noyuṉ xtsiiṉ me, sac miṉe mazdraa non nac ne noseed no miech Xtiidz me; lëëw biadseed no to, ni bliladzdgaa tow.

12 Nana sca, racladz naa gnë to dieṉ zha nacne no bla to i rnee nlid grieeban meṉgut; led wen wen name gocnaṉ to brieeban Jesús. 13 Teḻne rnee to nlid grieelo grieeban meṉgut, rrieequia goṉ rnee to ga nlid brieeban Jesús. 14 Nana teḻne brieeband me, paat rquiind miṉe dzigo noseed no miech nu, zhlëse znu noteed-xtse ne rnalo ne Dios. 15-16 Rrieequia noquidiee no miech, sac goṉ tibaque rnee no lo zho bleeban Dios Jesús; ni teḻne nli rrieeband meṉgut, ye Jesús dzigo bii noliu me niina. 17 Stiba, teḻne nlid brieeban me, zhlëse dzigo rnalo to me ycaania me to; teḻne nlid brieeban me, scase bii zëëb to grë xtoḻ to. 18 Grë zha ne bliladz me, zha ne nacle meṉgut niina, lëë bnitlole zho ga dzigo. 19 Nana teḻne loxaque lo guieḻmban riise nona gnalo ne Jesús, ne dzigo nac miech ne mazdraa nxen.

20 Per gacnaṉ to sca gaṉle, ¡brieeban Jesús! Me nac meṉ ne glopaa brieeban lo grëraa miech guizhiu ne grieeban. 21 Grëse ne ne nac ne miech, ible laa ne none guet; sac laa guieḻgut biaaṉ por miṉe beeṉ Adán; per niina ne laa Jesús biaad, por miṉe beeṉ me grëse meṉgut laa zho none grieeban. 22 Zigne grëse miech ret porne ziaad zho lo xtii Adán, scaquegaa grëse zha ne gbig lo Jesús, zgaa zho tib guieḻmban ndzon. 23 Ible sca none gaca, ndioṉ ne gaṉle laa Jesús brieebanle, ni zeeṉe laa me guiaad, grë zha ne no xnëz me laa zho grieeban. 24 Gaḻ dze co laa me lozh gnitlo meṉdox ni grëraa ma ne nacnie ma, dzigo laa me csaṉ grëse miech ne no xnëz me ladznia Dios meṉ ne nac Pxoz me; dze cotaa nagoṉ laa Dios guṉ guieḻwxtis. 25-26 Sac ible Jesús nonabey haxta gdziṉ dze co, zeeṉe laa me gnitlo grëse meyozh ne rlëë lo me; zig nac guieḻgut, lëëw nac miṉe lultm gnitlo me. 27 Zigne zhobneeque lo Xtiidz Dios, ladznia me biaaṉ grëtaa ncuaaṉe no; per guiabd ne togo ye Dios no ladznia me, sac goṉ Dios nac meṉ ne bdeeda lo me. 28 Gacxe waa, zeeṉe gaḻ dze ne laa me sca lozh gnitlo grë zha ne rlëë lo me, Pxoz me nac meṉ ne gnabey lo me; sac goṉ meṉ co gocnie me beeṉ me gan, ni meṉ co nac meṉ ne rnabey.

29 Nana, ne rnee to i nlid rrieeban meṉgut, ¿pe nac dzigo no zha ne rrobnis xcuent zha ne gutle? 30 Teḻne niaca miṉe nlid grieeban meṉgut, ¿pe nac nadieṉ znu gzataa dze quiabeeladz no no lo grë guieḻxtseeb? 31 Bets, bzian, nligaaw teḻ naa goṉ gzataa dze noxtseeb naa lo guieḻgut; naṉle to gaṉle zeeṉe rne naa rleynie naa to, diidzli rnee naa; scaquegaa niina, miṉe rnee naa nu diidzliw. 32 Ne nligaa zeeṉe glo biaḻ naa guiedz Efés nu, ntseeb goc miech rii lo naa, pale grë ma ntseeb. Teḻne nlid grieeban meṉgut, zhlëse dzigo nodeed naa grë miṉ co; mazd teḻ zhataa dzigo gban ne, zigne rëbaque diidz ne rëb: “¡Goḻgotsaa dioow ne, goḻgotsaa dio ne, beṉque guieḻgutse quiambiaaz ne!”

33 Per lëda ga goṉ. Zha ne zienaḻ miṉ co, ib yquiaadiagde to xtiidz zho, zeeṉa gacde to zigne nac zho; zigne zëëbaque diidz: “Teḻne ndzinlid miech ne ctsieelsa luu, zdziṉ dze ne gac luu zigne nac zho.” 34 Goḻquix biini sca, guṉctaldraa to xtoḻ to; pe rtoladzde to, goḻwi gaṉle no bla to i gard sëëb xnëz Jesús, haxta ni rieṉd zho zhapaa nac Dios.

35 Nana, no to gnë: “¿Per zha grieeban meṉgut? ¿Zhazhe nac cuerp ne grieebannie zho?” 36 ¡Aque nxen wnabdiidz co! ¿Pe raṉde to zig nac grë midz ne rio liu rac bni, rlozhse rnitlo midz co dzigo laa guizh ne naca ga rlan? 37 Teḻ rnee to zha nac cuerp ne grieebannie zho, goḻwi gaṉle zig nac zhobxtil, zig nac grëragaa midz, ¿pe niacxe zigne nacsew riow liu, scasaque naca rlana? Led zeeṉe laaw rlan, guizhle naca. 38 Tib midzse naca riow liu, Diosle nac meṉ ne rdeed zhiblaga zigne racladz me. Tib tib midz, psaṉle me dieṉ zha gluw zeeṉe laaw glan. 39 Zigne zhaase zhaase nac tib tib midz, tib tib guizh, scaque nzian lo cuerp no.

Zig nac miech, zhaa nac xcuerp zho lo xcuerp ma, niicle magaaw, zhaa nac xcuerp ma ne no lo liu, zhaa nac xcuerp ma ne no lo nis, ni zhaaque nac xcuerp ma ne rsiibe. 40 Grë anjl ne no gbaa, zhaa nac xcuerp zho lo xcuerp ne nac ne miech guidzliu; zhaa nac xquieḻniow cuerp co lo xquieḻniow cuerp ne no lo guidzliu. 41 Gotsaa gwi ne gaṉle, zig nac xbiini ngbidz zhaa naca lo xbiini mëë, lo xbiinigaa mel. Niicle melgaaw, zhaase zhaase nac xbiini ma tib tib ma, no ma palalse rlu, nogaa ma roḻ rna. 42 Scadaa nagoṉ, zhaa rlu cuerp ne rap miech niina, ni zhaagaa glu miṉe ygaa zho zeeṉe laa zho grieeban. Cuerp ne rdziaap ne niina, ncuaaṉe tib rded naca, saṉgue cuerp ne grieebannie ne gaḻ dze co, led yedraa miṉ co nitlo. 43 Mban nac cuerp rii, sac rzacnëw, reta; saṉgue cuerp ne grieebannie ne, tib cuerp ne gdziṉd dze nitlo gaca. Lega zozhidz cuerp rii, saṉgue cuerp co tib cuerp ndip ndaan gaca. 44 Cuerp ne rdziaap ne niina, tib cuerp ngoopdoḻ naca, saṉgue cuerp ne grieebannie ne, miṉ co gac tib cuerp ne gban zigne racladzpaa Dios. Sac zigne znu no cuerp ne rquiin lo guieḻmban rii, scaquegaa no miṉe yquiin stib lo guieḻmban ne gneedz Dios.

45 Goḻsoladz gaṉle, rnee lo Xtiidz Dios Adán goc miech ne glopaa biaaṉ ni Dios nac meṉ ne bdeed guieḻmban lo Adán; saṉgue Jesús, me rap guieḻmban, ni zrieelo gdeed me guieḻmban co lo miech. 46 Scaque nagoṉ, glo rgaa ne cuerp ngoopdoḻ ne rdziaap ne niina, dzigoraa ygaa ne cuerp ne gban zigne racladzpaa Dios. 47 Gotsaa gwi ne gaṉle, zeeṉe biaaṉ Adán yudiese bzaa Dios me; saṉgue Jesús, meṉ gbaa nac me. 48 Grëse ne nac ne miech, cuerp ne rdziaap ne lo guieḻmban rii, zigne gocdaa xcuerp Adán naca; per zha ne gnalo Jesús, zeeṉe laa zho grieeban laa zho gaple tib cuerp zigne nac xcuerp me. 49 Masaque nac ne niina zigne goc Adán, ni scaquegaa zdziṉ dze ne glu ne zigne rlu Jesús. 50 Goḻgacnaṉ sca gaṉle, cuerp ne rdziaap ne lo guidzliu rii, grieelod gdziṉa zaatne rnabey Dios; sac rdziṉ dze ne rnitlow, grieelod gaca tib cuerp ne guete.

51 Wen wen goḻzoobdiag miṉe gne naa lo to nu gaṉle, wlaltaa choot gard gacnaṉa: Grëse ne ne nac ne zha ne rnalo Jesús, gaḻ dze co zigtaa zha ne mbana, zha ne gutlegaaw ible stsëë Dios xcuerp ne. 52 Znuse gac miṉ co zig nacse zeeṉe riab tib belye; lëë miṉ co gac lultm vuelt ne ycuedz xanjl Dios zhitrompet zho. Zeeṉe sedz trompet co, hor co grëse zha gut, laa zho grieebannie tib cuerp ne gdziṉdraa dze nitlo; scagaa grë zha ne bii zomban, hor co laa xcuerp zho gdzëë. ¡Grëse ne dziaap tib cuerp cub! 53 Ible sca none gaca, ib none gdzëë xcuerp ne gaca tib cuerp ne xiṉd, tib cuerp ne gdziṉdraa dze nitlo. 54 Zeeṉe gac miṉ co, ga grieequia miṉe raquiet lo Xtiidz Dios zaatne rnee: “Nasi laa guieḻgut bnitlo, guieḻmbanle nac miṉe rnabey. 55 Ah guieḻguta, ¿yoraa na zeeṉe scataa psacsi luu? ¿Yoraa zeeṉe scataa gocndip xtiidz luu?” 56 Grieelodraa pe guṉ guieḻgut ne hor co, sac led yedraa hor co tso doḻ, led yedraa hor co gnabey ley; sac por doḻ gane rrieelo rsacsi guieḻgut ne niina, ni por ley rlu pe nac xtoḻ ne. 57 ¡Xquizh xquieḻnzaac Dios pxeeḻ me Jesús, sac goṉ por Jesús zrieelo griee ne ladznia guieḻgut!

58 Bets, bzian, ne nac to zha ne rleynie naa, goḻguieṉ sca tibaque dziits goḻso lo Xtiidz Dios; zig zie dze goḻtsoxcoraa goḻguṉ xtsiiṉ me, beṉque naṉle to gaṉle, grëse xtsiiṉ me miṉe rdziuuṉ ne nacda ncuaaṉe zhlëse.