3
1 Goḻguieṉ gaṉle, stible guieḻmban rap to niina, lëë guieḻmban co bgaa to zeeṉe brieeban Jesús; gacxe waa, goḻtsoxco ygaa to grë guieḻnzaac ne no gbaa, zaatne zob Jesús cue Dios nëz derech. 2 Grë guieḻnzaac ne no gbaa miṉ co goḻconie guic to, led grëd ncuaaṉe no lo guidzliu rii; 3 sac goṉ, rrieequia gutle to lo grë ncuaaṉe no lo guidzliu rii, laa to mbanniele Jesús, zigne racladz Dios. 4 Laa ne rdziaap tib guieḻmban cub niina, sacne nacnie ne Jesús; gaḻ dze ne laa me guiaad stib, laa ne no gdziṉ lo me gban ne zaatne nac lo xquieḻndzon me.
Zha gban zha ne rliladz Jesús
5 Gacxe nana sca, goḻsaan grëtaa guieḻntseeb ne ruṉ miech lo guidzliu rii:
tsoniede to zha ne led tsieelde to,
guṉde to grë ncuaaṉe mbeeguieḻto,
gdeete to diidz gnabey xcuerp to to,
guṉde to ncuaaṉe ndzinlid ne racladz to,
ni gacblëde to lo dimi (sac teḻ scaw, dzigo dimi rsaṉ to xlugar Dios).
6 Grë doḻ rii ruṉ grë zha ne nëd gon xtiidz Dios, lozh ga lëë miṉe tsieguiaḻ zho laa zho ygaa lo guieḻzi ne csiaab Dios. 7 Zig nac to, grë miṉ co beeṉ to glo; 8 saṉgue niina, none csaan tow, ni lalnu:
glëëniedraa to samiech to,
sobzhiandraa to,
guṉdraa to guieḻntseeb,
gneenëdraa to samiech to,
gneedraa to diidzguidz,
9 yquidiedraa to samiech to.
Sac goṉ, nacdraa to zigne nac to glo, laa to brieele lo grëtaa miṉe beeṉ to. 10 Stible nac lo xquieḻmban to niina: tib miech cuble nac to, ni laa to bii nodzëë haxta que ne gac to zigne racladz Dios meṉ ne psaṉ miech, zeeṉa scagaa lozh guṉbey to zha nac me. 11 Zha ne bgaale guieḻmban cub rii, led yedraa zho cue dieṉ cho zha nac zha Israel, dieṉ cho zhagaa nac zha zit; dieṉ cho no bey, dieṉ cho nodgaaw; dieṉ cho ziaad guiedz nroob, dieṉ cho ziaadgaa guiedz win; dieṉ cho rac, cho gacdgaa; dieṉ cho ruṉ xtsiiṉ beṉ, dieṉ chogaa nac zha rnabey. Miṉe rquiinraa niina, nacne grëse zho guieṉ gaṉle Jesús nac meṉ ne mazdraa non, me none gnalo zho.
12 Goḻgaṉ gaṉle, zha nquialadztaa Dios to, ib laa me ble to gac to miech ne ygab xnëz me. Zaacse sca goḻban, ne nlipaa dib zdoo to:
goḻquia zdoo samiech to,
niowse goḻgac lo samiech to,
ndooladz goḻgac lo samiech to,
nguudzladz goḻgac lo samiech to,
guieedniede to samiech to.
13 Guieedniede to samiech to, ni zeeṉe cho zha ruṉ pe tib falt lo to, goḻguṉ zho perdon. Goḻguieṉ gaṉle zha beeṉ Dios to perdon; scaque to, none guṉ to samiech to perdon. 14 Ni miṉe mazdraa none tsoxco to, goḻleynie zha ne nacgrë to zigne racladz Dios, zeeṉa tipse gac to; ni scagaa gleynie to grëraa samiech to. 15 Jesús nac meṉ ne ctiche grëtaa ncuaaṉe ndzinlid ne no zdoo to, zeeṉa niowse gbannie to samiech to. Lëë tib guieḻnzaac co no ygaa to ne laa Dios bredz to, ni scagaa none gban to, zeeṉa tipse gac to grë to. Goḻsoladz goḻdeed xquizh lo me.
16 Niapse miṉe nac Xtiidz Jesús goḻconie guic to, goḻco zdoo to. Goḻquiin grë guieḻbiini ne rneedz me lo to, goḻseed grë zha ne nacgrë to, ni zha ne rxiṉ, goḻnee lo zho zaacse gac zho. Dib zdoo to goḻdeed xquizh lo Dios por grëtaa miṉe ruṉ me, iṉe goḻgooḻnie me grë salm, goḻgooḻnie me grë cant ne rdziooḻnie ne me. 17 Ncuaaṉe guṉtaa to, niicle zeeṉe gnee tow, zeeṉe guṉgaa to tib dziina, goḻguṉa zigne rdziladz Jesús, meṉ ne rnabey ne; ni tibaque goḻdeed xquizh lo Dios meṉ ne nac Pxoz to, niina ne laa to ngable lo Jesús.
18 To ne nac to meṉ wnaa ne ptsieelniale, goḻgon xtiidz tsieel to, sac ible sca nonguieḻ gban miech ne no xnëz Jesús.
19 To ne nac to meṉ bgui ne ptsieelniale, goḻleynie tsieel to; gacnchogde to lo me.
20 To ne nac to mëëd, goḻgon miṉe rnee pxoz to, miṉe rnee xniaa to, sac sca rdziladz Dios.
21 Togaa ne nac to meṉ nguzan, guṉde to ncuaaṉe guṉglëë to xpëëd to, zeeṉa csaṉde to zdoo zho.
22 To ne nac to zha ne lega ruṉ xtsiiṉ beṉ lo guidzliu rii, goḻguṉ grëse miṉe rnabey zho to; guṉde to zeeṉe zose zho lo to dzigose yquiaalo to guṉ to dziin, zeeṉa guiaṉnziuu to lo zho; sinque dib zdoo to goḻguṉ xtsiiṉ zho, goḻguieṉ gaṉle Dios zobwi raṉ me pe ruṉ to. 23 Grëse dziin ne guṉ to, iṉe nguieeḻ goḻgac goḻguṉa, zig nac zeeṉe xtsiiṉzhal Dios noyuṉ to. 24 Beṉque naṉle to, zgaa to miṉe gdeed Dios lo grë zha ne ngab lo me, teḻne gon to diidz; sac goṉ Jesús nac meṉ ne nlipaa rnabey to, ni lo me quia to dziin. 25 Goḻgon diidz sca, sac zha ne gonda, ib tedsod zdeed Jesús miṉe tsieguiaḻ zho; sac goṉ, teḻ me led yed lo me ncuee miech.