1 Re goo wetsʼn ne btan na, reta goo nlebee goo ley. Ne noga ne goo lee ley nabee lo men, beeta leettsa naban men lo yezlyu ree. 2 Leey nak taxal leettsa lee thib ngot mtseya, lo ley ndoblo ngot gon ngot diiz lo tsaal ngot lo dita naban tsaal ngot. Per os gath tsaal ngot, tsaraa tak tseya ngot kon tedib mbyi. 3 Per os lee ngot gak rop ngot kon tedib mbyi leettsa bee nabanka tsaal ngot, ndaa ngot thib falt. Per os lee tsaal ngot ngutha, tak tseya ngot kon tedib mbyi ne nagt kona kuu went.

4 Tataka nake re goo wetsʼn ne btan na, ndala lee ley chaan Diox mnabee loʼaa; per leettsa nguth Jesucrist noga reʼaa nguthaa; tsa nabeet raa ley loʼaa. Lee nal tak nakaa zha Jesucrist kuu mroban, tak tsowaa kuu wen kuu nlaaz Diox. 5 Tak leettsa mbanaa taxal nlaaz kwerpaa, lee ley mtsow masraa ngoo yekaa mtsowaa kuu went kuu nlaaz kwerpaa, ne mndenoy lee lo yalguth. 6 Per lee nal, ngutha lee lo ley kuu mnabee loʼaa ndala, ley kuu mkee zha lo yeets; lee nal ndoblo tsowaa rtsin Diox, kon thib yalnaban kuu kub, ne Mbi Nayon chaan Diox ntsow koree leettsooʼaa.

7 Kona, ¿kwan ntsow goo xgab? ¿Chu ley ntsow ntsowaa kuu went? ¡Nagte tata! Per netʼn naa kwan nak falt os yent ley. Ne thitanax ganetʼn naa kwan nak yaltablaaz, os gakete lo ley: “Tablaazta chaan tabena”. [Ex. 20:17; Dt. 5:21] 8 Per lee falt mtsow masraa ngoo yaltablaaz leettsoon, tak lo ley nzhab wente. Tak os lee zha net zha naa kwan nabee ley, gagt nabee falt lo zha. 9 Ne leettsa ter nen naa kwan nabee ley, ndakʼn wen nakʼn, per leettsa mlebeen ley, tsa myeen na leen nakʼn zha kuu masraa ndab falt, 10 ne ndoblon gathʼn. Diox mndaa ley, tsa por re kuu nabee ley tsowʼn gan yalnaban, per lee ley mloo lon ndoblo gathʼn. 11 Kona lee falt mkwaan mod mkedin lo re kuu nabee ley, kona ndoblo gathʼn.

12 Wen nak ley chaan Diox; ne nali nak re diiz kuu nabee Diox kuu nke lo ley. 13 Per nitʼn lee kuu wen mtsow ndoblo gathʼn. ¡Nagte tata! Sinke lee falt mtsow ngok went re kuu wen, ne mkedi faltʼn, kona ndoblon gathʼn por re falt da. ¡Kona thitanax went nak falt!

14 Neʼa lee Diox nak kuu mndaa ley, per lee na nakʼn thib men yezlyu ree, kona thibka nabee falt lon par tsowʼn kuu went. 15 Netʼn kwan ntsowʼn, tak ntsowtʼn kuu wen kuu nlazʼn, leel re kuu went kuu nayiin nen, kona ntsowʼn. 16 Ne leettsa ntsowʼn re kuu went kuu nlaztʼn tsowʼn, tsa nyeen na lee ley nak kuu wen. 17 Kona nin nagt na kuu ntsow re kuu went, sinke falt kuu nzo lo kwerp da nak kuu ntsowe. 18 Ne nen neeka thib kuu wen yent leen kwerp da, tak kuu lo yezlyu ree nake; nlazʼn tsowʼn kuu wen per gagt tsow nay. 19 Ntsowtʼn kuu wen kuu nlazʼn tsowʼn, leel kuu went kuu nlaztʼn tsowʼn, kona ntsowʼn. 20 Per os leen ntsowʼn re kuu nlaztʼn tsowʼn, nagt na cho ntsowe, sinke re falt kuu nzo lo kwerp da ntsowe.

21 Kona, leettsa nlazʼn tsowʼn kuu wen, leel kuu went ntsowʼn. 22 Leen leettsoon nyow leettsoon ley chaan Diox, 23 per nyeen na, lee leen kwerp da nzo thib kuu ngyo kon re xgab da kuu wen. Ne naliibʼn lo kuu nzo leen kwerp da, taxal thib zha kuu nzo tsib.

24 ¡Probʼn! ¿Cho tak telaan lo re kuu went kuu ntsow kwerp da? Tak koree ntsow ndoblon gathʼn. 25 Kona ndan texkix lo Diox por Jesucrist Zha Nabee loʼaa, tak beeta lee Jesucrist tak telaan lo re kuu went; kona kon xgab da ntsowʼn kuu nabee ley chaan Diox, per lee kwerp da ntsow kuu went.