1 Ruyú cazuʼ le yuʼu icja ládxiʼdaʼahuaʼ, Xan, en nunbëʼ cazuʼ nedaʼ.

2 Nöz quézinuʼ cateʼ riböʼa, en cateʼ riyasaʼ.

Nö́zinuʼ le rizáʼ ládxaʼa niʼ zuʼ ziʼtuʼ.

3 Ruyú cazuʼ nedaʼ cateʼ bi runaʼ, en cateʼ rasiaʼ,

en nö́zinuʼ yúguʼtë le runaʼ.

4 Zíʼatëlö ca bi didzaʼ ruʼa,

chi nöz quézinuʼ bi inníaʼ, Xan.

5 Röjnöru cazuʼ lahuaʼ, en zaʼ cazuʼ cúdzaʼa,

en naxóaticaʼsö noʼo nedaʼ.

6 Run ga rubánidaʼ tuʼ nöz quézinuʼ Liʼ.

Bitiʼ séquiʼdaʼ tséajniʼidaʼ ca naca.

7 ¿Naruʼ huáca tsejaʼ ga bitiʼ idxín Böʼ quiuʼ?

¿Naruʼ huáca izxúnnajaʼ ga bitiʼ zoa cazuʼ Liʼ?

8 Laʼtuʼ huabenaʼ lúzxiba, niʼ soa cazuʼ Liʼ,

en laʼtuʼ huötjaʼ lataj chul-la, niʼ zoa cazuʼ caʼ.

9 Laʼtuʼ uyijaʼ ga rilén gubidza,

o laʼtuʼ huadödaʼ iaʼtsöláʼalö nísadoʼ,

10 niʼ caz ichëʼu nedaʼ,

ateʼ len noʼo ibëla sön cazuʼ nedaʼ.

11 Laʼtuʼ inníaʼ: “Ucachiʼ nedaʼ le naca chul-la”,

en laʼtuʼ huöáca chul-la beníʼ zóalen nedaʼ,

12 bitiʼ gaca chul-la loʼ Liʼ lë naʼ naca chul-la quiaʼ,

pero chiʼi dzö́ʼölö gaca quiuʼ ca lahuiʼ dza.

Tuz ca nácagaca loʼ Liʼ le naca chul-la, en le naca lahuiʼ dza.

13 Nun cazuʼ Liʼ le zoa icja ládxiʼdaʼahuaʼ.

Benuʼ ga guyáʼ lë́ʼënu xináʼa le naca cazaʼ.

14 Guíaʼ Liʼ: “Xclenuʼ” tuʼ run ga rubánidaʼ ca nun cazuʼ nedaʼ,

ateʼ rádxidaʼ Liʼ tuʼ tun le nunuʼ ga rubánidaʼ,

ateʼ böʼ naca cazaʼ nözi caz naca caní.

15 Bitiʼ bigachiʼ loʼ le naca cazaʼ cateʼ niʼ siʼ galjaʼ,

cateʼ niʼ yuʼa lë́ʼënu xináʼa.

16 Biléʼe quézinuʼ nedaʼ cateʼ niʼ siʼ galjaʼ,

tuʼ chinuzúajgaca lu guichi quiuʼ

yuguʼ dza ral-laʼ soaʼ ibanaʼ,

sal-laʼ bitiʼ ridxini nitú dza naʼ.

17 Nazácaʼtërögaca quiaʼ le rizáʼ ládxuʼu, Dios.

Ziántërö nácagaca lë naʼ rizáʼ ládxuʼu.

18 Laʼtuʼ huáca nu ulaba léguequi,

ilácagaca ziántërö ca nácagaca guiö́j yuzxi.

Cateʼ rubanaʼ, niʼ zóalenaʼ Liʼ.

19 Raca ládxaʼa usunítiuʼ nupa tuáʼ döʼ, Dios.

Que lë ni naʼ, guliʼcuíta ga zoaʼ, núlöliʼ rútiliʼ bönachi.

20 Tuíʼi didzaʼ ziʼ ca nacuʼ Liʼ, Dios,

ateʼ nupa taʼdáʼbagaʼ Liʼ taʼnnë́ liz que Loʼ.

21 ¿Naruʼ cabí riledaʼ nupa taʼlé Liʼ, Xan?

¿Naruʼ cabí ruzóaʼ tsöláʼalö nupa taʼdáʼbagaʼ Liʼ?

22 Idú ládxaʼa bitiʼ riléʼedaʼ léguequi dxiʼa.

Nuzóaʼ léguequi ca nupa taʼdíl-lalen nedaʼ.

23 Buyú nedaʼ, Dios, en gúquibeʼe le zoa icja ládxiʼdaʼahuaʼ.

Guzxíʼ bëʼ nedaʼ, en gúquibeʼe le rizáʼ ládxaʼa.

24 Buyú channö zóalen nedaʼ le naca döʼ,

en buluíʼi nedaʼ nöza tsahuiʼ quiuʼ zóaticaʼsö.