Salmos.
67.
Xantuʼ Dios, buzáʼ ladxiʼ queë́tuʼ, en ben ga gaca dxiʼa queë́tuʼ. Lu yöl-laʼ dxiʼi ladxiʼ quiuʼ buyú netuʼ, 
para gaca bëʼ le rë́ʼënuʼ guntuʼ yödzölió ni, en para ilaʼnözi bönachi yúguʼtë yödzö ca naca yöl-laʼ rusölá quiuʼ. 
Ral-laʼ ilaʼgúʼu bönachi Liʼ yöl-laʼ ba, Dios. Yúguʼtë bönachi ral-laʼ ilaʼgúʼu Liʼ yöl-laʼ ba. 
Ral-laʼ uluʼdzeja bönachi yúguʼtë yödzö, en ilúl-la lu yöl-laʼ rudzeja quéguequi. Tuʼ uchiʼa usörö́uʼ bönachi ca naca le naca tsahuiʼ, 
ral-laʼ ilaʼgúʼu Liʼ yöl-laʼ ba bönachi, Dios. Yúguʼtë bönachi ral-laʼ ilaʼgúʼu Liʼ yöl-laʼ ba. 
Yödxi yanaʼ runödzaj luyú ni. Dios queë́ruʼ runëʼ ga raca dxiʼa queë́ruʼ. 
Runëʼ Dios ga raca dxiʼa queë́ruʼ, para iladxi Lëʼ yúguʼtë nupa nacuáʼ yödzölió.