Salmos.
98.
¡Guliʼgul-la queëʼ Xanruʼ tu le cubi, tuʼ nunëʼ le tun ga rubániruʼ! Len yöl-laʼ unná bëʼ zxön queëʼ, en yöl-laʼ huáca láʼayi queëʼ nadéliʼnëʼ lu gudil-la. 
Nunëʼ Xanruʼ ga naca bëʼ le nadéliʼnëʼ. Nuluíʼinëʼ bönachi yúguʼtë yödzö náquiëʼ tsahuiʼ. 
Len yöl-laʼ dxiʼi ladxiʼ queëʼ, en yöl-laʼ li ladxiʼ queëʼ benëʼ ca rnna xtídzëʼë le guzxíʼ lu nëʼë gunëʼ quégaca bönachi Israel. Bilaʼléʼe bönachi idútë yödzölió ca busölë́ʼ rëʼu Dios queë́ruʼ. 
¡Lu yöl-laʼ rudzeja queë́liʼ guliʼgul-la queëʼ Xanruʼ, yúguʼtëliʼ zóaliʼ yödzölió! ¡Idú ládxiʼliʼ guliʼcuʼë yöl-laʼ ba, en guliʼgul-la queëʼ le naca láʼayi! 
¡Guliʼgul-la queëʼ Xanruʼ yuguʼ salmo, en guliʼquinnaj yuguʼ bihuël-la! ¡Guliʼquinnaj lë́ʼegaca arpa, en guliʼgul-la yöl-laʼ ba queëʼ! 
¡Guliʼcödxi lúzugacabaʼ chivo, en lúzugacabaʼ bëdxi lahuëʼ Xanruʼ Dios, Nu rinná bëʼ! 
¡Buliʼlidza zidzaj, nísadoʼ, en yúguʼtë le nacuáʼ nisa naʼ! ¡Guliʼgul-la yödzölió, en yúguʼtë nupa nacuáʼ niʼ! 
¡Guliʼcapaʼ náʼaliʼ, yuguʼ yegu, ateʼ lu yöl-laʼ rudzeja queë́liʼ guliʼgul-la lahuëʼ Xanruʼ, libíʼiliʼ, guíʼadoʼ, 
tuʼ zëʼë duchiʼa dusörö́ëʼ quégaca bönachi yödzölió! Ca naca le naca tsahuiʼ uchiʼa usörö́ëʼ quéguequi, en ca naca le naca dxiʼa tsahuiʼ inná béʼenëʼ yúguʼtë bönachi.