Salmos.
136.
¡Xclenëʼ Xanruʼ Dios tuʼ náquiëʼ dxiʼa! Zóaticaʼsö yöl-laʼ dxiʼi ladxiʼ queëʼ. 
¡Xclenëʼ Dios nayë́pisëtërëʼ ca yuguʼ dios izáʼa! Zóaticaʼsö yöl-laʼ dxiʼi ladxiʼ queëʼ. 
¡Xclenëʼ Xanruʼ, nayë́pisëtërëʼ ca yuguʼ xángaca bönachi! Zóaticaʼsö yöl-laʼ dxiʼi ladxiʼ queëʼ. 
¡Xclenëʼ Dios, tuzëʼ Lëʼ runëʼ yuguʼ yöl-laʼ huáca zxön! Zóaticaʼsö yöl-laʼ dxiʼi ladxiʼ queëʼ. 
¡Xclenëʼ Dios, len yöl-laʼ rácadaʼ queëʼ benëʼ lúzxiba! Zóaticaʼsö yöl-laʼ dxiʼi ladxiʼ queëʼ. 
¡Xclenëʼ Dios, gudixjëʼ luyú láhuilö nísadoʼ! Zóaticaʼsö yöl-laʼ dxiʼi ladxiʼ queëʼ. 
¡Xclenëʼ Dios, benëʼ gubidza, en beoʼ! Zóaticaʼsö yöl-laʼ dxiʼi ladxiʼ queëʼ. 
¡Benëʼ Dios gubidza para tseníʼ lahuiʼ dza! Zóaticaʼsö yöl-laʼ dxiʼi ladxiʼ queëʼ. 
¡Benëʼ Dios beoʼ, en yuguʼ bölaj para uluʼzeníʼ chiʼi dzö́ʼölö! Zóaticaʼsö yöl-laʼ dxiʼi ladxiʼ queëʼ. 
¡Xclenëʼ Dios, bë́tiëʼ yuguʼ biʼi bönniʼ lo quégaca bönachi Egipto! Zóaticaʼsö yöl-laʼ dxiʼi ladxiʼ queëʼ. 
¡Bubéajëʼ bönachi Israel ladaj bönachi Egipto naʼ! Zóaticaʼsö yöl-laʼ dxiʼi ladxiʼ queëʼ. 
¡Len yöl-laʼ huáca zxön queëʼ, en lu yöl-laʼ nadxíʼi queëʼ benëʼ caní! Zóaticaʼsö yöl-laʼ dxiʼi ladxiʼ queëʼ. 
¡Xclenëʼ Dios, bubéajëʼ choplö Nísadoʼ Xiná! Zóaticaʼsö yöl-laʼ dxiʼi ladxiʼ queëʼ. 
¡Benëʼ ga gulaʼdödi bönachi Israel gatsaj láhuiʼlö nísadoʼ naʼ! Zóaticaʼsö yöl-laʼ dxiʼi ladxiʼ queëʼ. 
¡Lu nísadoʼ naʼ busunítiëʼ Faraón, en bönniʼ queëʼ röjáquiëʼ gudil-la! Zóaticaʼsö yöl-laʼ dxiʼi ladxiʼ queëʼ. 
¡Xclenëʼ Dios, guchë́ʼë bönachi queëʼ laʼ guixiʼ ga niʼ naca yu bidxi! Zóaticaʼsö yöl-laʼ dxiʼi ladxiʼ queëʼ. 
¡Xclenëʼ Dios, bë́tiëʼ bönniʼ gulaʼnná bëʼë, guláquiëʼ nal-la! Zóaticaʼsö yöl-laʼ dxiʼi ladxiʼ queëʼ. 
¡Bë́tiëʼ bönniʼ gulaʼnná bëʼë, dëdaʼ lu náʼagaquiëʼ yöl-laʼ unná bëʼ! Zóaticaʼsö yöl-laʼ dxiʼi ladxiʼ queëʼ. 
¡Bë́tiëʼ Sehón, bönniʼ gunná béʼenëʼ bönachi Amorreo! Zóaticaʼsö yöl-laʼ dxiʼi ladxiʼ queëʼ. 
¡Bë́tiëʼ Og, bönniʼ gunná béʼenëʼ bönachi Basán! Zóaticaʼsö yöl-laʼ dxiʼi ladxiʼ queëʼ. 
¡Budödëʼ xiyúgaquiëʼ lu náʼagaca bönachi queëʼ! Zóaticaʼsö yöl-laʼ dxiʼi ladxiʼ queëʼ. 
¡Budödëʼ le lu náʼagaca bönachi Israel, bönachi tun xichinëʼ! Zóaticaʼsö yöl-laʼ dxiʼi ladxiʼ queëʼ. 
¡Yöjnenëʼ rëʼu cateʼ niʼ bugáʼanaruʼ cáʼasö! Zóaticaʼsö yöl-laʼ dxiʼi ladxiʼ queëʼ. 
¡Busölë́ʼ rëʼu lu náʼagaca nupa gulaʼdíl-lalen rëʼu! Zóaticaʼsö yöl-laʼ dxiʼi ladxiʼ queëʼ. 
¡Rugahuëʼ yúguʼtë bönachi! Zóaticaʼsö yöl-laʼ dxiʼi ladxiʼ queëʼ. 
¡Xclenëʼ Dios, zoa cazëʼ yehuaʼ yubá! Zóaticaʼsö yöl-laʼ dxiʼi ladxiʼ queëʼ.