1 Chiyru gunabee Pilat idaaz Jesús. 2 Ax banchuuza de suldadqui tuby curon guɨ́ch guluudeb quiany. Ne bguacudebny tuby lady murad 3 Chiy gubigaxdeb nez lony rniigadeb:

—¡Su ibány Rey xte Israel!

Ax régadeb lony.

4 Pilat gubíi bdiiab, ax raipbɨ de bniety Israelqui:

—Gulguiaa, acuiiab te par gacbeet dec quɨt xi xfaltib rdxiala.

5 Chiyru bdiia Jesús cun curon guɨ́chqui quiany ne cun lady murad ni bguacudebny. Ax gunii Pilat:

—¡Ab rén!

6 Chiy de bxoz ni rnabee de bxoz cun de ni rcualo yudoroo xte Jerusalén, chi gunádebny guzulo rbɨxtiadeb:

—¡Bcuaabiub lo cruzy! ¡Bcuaabiub lo cruzy!

Chiy raipy Pilat laadeb:

—Laat gulchanéb dxa ne gulcuaab lo cruzy, te nare quɨt xi xfaltib rdxiala.

7 Per de bniety Israelqui cuaibdeb:

—Dunnɨ rdxapnɨ tuby ley, ne pur leyqui laab rquiiny gatybɨ pur ni rniib náb Lliin Dios.

8 Deni bindiag Pilat ziy quesentiand bdxibbɨ. 9 Chiy biiub láani palacy stuby ax gunabdiidxbɨ Jesús:

—¿Calíll zoo?

Per Jesús xíteete quɨt nicaibtiny.

10 Chiy raipy Pilat laany:

—¿Ta quɨt icabiu luaa? ¿Ta quɨt gannu dec nare napa guelrnabee par inabiia icoo lo cruzy, o par ildázaca liú?

11 Chiyru cuaby Jesús:

—Xíteete guelrnabeeti quɨt niaptibiu luaa, belati quɨt ninɨɨdx Diosni laabiu. Pur ningui, ni baany entriagu nare lobiu, mazru napbɨ duld que laabiu.

12 Parzi desde horqui guzulo rguíily Pilat nez par íldab Jesús. Per de bniety Israelqui gurɨxtiadeb:

—¡Belati ildábiub gati xmiguti rey César laabiu! ¡Te pur tutix ni rnii ná Rey, contrɨ rey Césariy runbɨ!

13 Chi bindiag Pilat ziy, gubíi guléeb Jesús. Ax gurib lo xquiallilbɨ tuby lat rut lá Gabata cun diidx hebreo, zelo diidxqui lo pati ni aguczaac. 14 Ne dxiqui ná visprɨ laní pascu, ax anste laidxi raipy Pilat de bniety Israelqui:

—¡A Rey xtentɨ rén!

15 Per laadeb gurɨxtiadeb:

—¡Su gatybɨ! ¡Su gatybɨ! ¡Bcuaabiub lo cruzy!

Chiy raipy Pilat laadeb:

—Per, ¿ta icuáa rey xtentɨ lo cruzy?

De bxoz ni rnabee cuaibdeb:

—Quɨtllɨru tu Reyti rdxambeen. Tubyzi rey César rdxapnɨ.

16 Chiyru gunabee Pilat icany lo cruzy.

17 Ax bdianédeb Jesús, nuaany cruzy, par zénedebny rut lá Calver ne cun diidx hebreo ax lá ruy Gólgota. 18 Ruy bcuaadebny lo cruzy, cun stiop bniety, tubygadeb tuby lad chiy Jesús glay. 19 Pilat gunabeeb bcuaadeb quia xcruzyny: JESÚS DE NAZARET, REY XTE DE BNIETY ISRAEL. 20 Zieny bniety Israel biildy letrerqui, te pur gax Jerusalén bcuaadeb Jesús lo cruzy. Ne cun letrerqui bcuaadebni cun diidx hebreo, cun diidx griego ne cun diidx latín. 21 Parzi ax raipy de bxozroo xte Israel Pilat:

—¿Xínii bcuaabiu: “Rey xte de bniety Israel?” Güenru bcuaabiu: “Ni rnii ná Rey xte de bniety Israel.”

22 Per Pilat cuaibbɨ lodeb:

—Ni a cá, a cá, ziy aríianni.

23 Chi gulull bcuaa de suldadqui Jesús lo cruzy, ax cuáadeb xabny baandeb tap ldaa par bgaaizni lodeb. Per stuby xabny ni lá túnica, cun quɨt calí diibtini 24 parzi raipy de suldadqui saadeb:

—Quɨt idillaatinni. Güenru idzɨtnɨ dád quiani par dún tú yáldni.

Ziy xquel guzub zec ni cá lo xquiits Dios rut rnii: “Gudiizdeb xaba, ne guzɨtdeb dád quia túnica xtena.” Ziguiy ná ni baany de suldadqui.

25 Ne gax rut bcuaadeb Jesús lo cruzy zuguaa xnanny cun beldbɨ ne néza María chial Cleofas cun María Magdalena. 26 Chi guná Jesús xnanny zuguaab cuee xpɨnny ni quesentiand rcaazny, ax raipny xnanny:

—Xnana, a llingaanbiu ruc.

27 Chiyru raipny xpɨnnyqui:

—A xnanu ruc.

Desde horqui biian xnan Jesús laznaa xpɨnnyqui ax zíaneb laab lizbɨ.

28 Chi gulull gunii Jesús ziy, ne cun laany nánny dec aguc irate zec ni ná par gac, chiy par guzub zec ni rnii lo xquiits Dios, ax guniiny:

—Rdxaa nis.

29 Ne ruy zuguaa tuby ni dxaa vinagrɨ. Chiy bguadxdeb tuby spong lo vinagrɨqui ax bcuaadebɨy quia tuby yag ni lá hisopo par bquiiddebɨy ruuny. 30 Deni bquiiny Jesús vinagrɨqui, ax guniiny:

—Abialo guc irate zec ni ná par gac.

Chiy bsabquiany, ax gutyny.

31 Dxiqui ná visprɨ laní pascu, dxi ni rundeb irate par laníqui, ax quɨt rcaazti de bniety Israel yáan de cuerpɨqui lo cruzy néru dxi ni rzilaazdeb, te pur dxiqui ná mazru dxidá par laadeb. Pur ningui, raipdeb Pilat inabeeb gaachy nii de ni cá lo cruzy par gatydeb te chalee yiatdeb lo cruzyqui. 32 Chiyru güe de suldad, ax nidoote nii tubybɨ gudiichdeb chiyru nii stubybɨ. 33 Per chi gubiideb nii xcruzy Jesús, gunádeb dec agutyny. Pur ningui quɨt niguiichtideb niiny.

34 Per tuby suldadqui deni bquizbɨ lans cueláanny, chiy bdiia rɨny ne nis. 35 Ni cacuaa de cosré gunábslob xa guc ax didxldí ná ni rniib. Laab nánbɨ dec didxldí ná ni rniib, te par chaldilaaztɨny. 36 Ne Jesús gudeedny ziy par guzub zec ni cá lo xquiits Dios rut rnii: “Nic tuby latny quɨt quiichtideb.” 37 Ne ziyza rnii stuby lat lo xquiits Dios: “Sniádeb ni bguiz lans.”

38 Chi gudeed guc ziy, Gusé ni zá rut lá Arimatea, guléeb didxbee lo Pilat par chanéb xcuerpɨ Jesús. Guséqui tuby xpɨny Jesús laab, per xgaats pur rdxibbɨ de ni rnabee Israel. Pilat guzigueldbɨ, chiyru zégac Gusé par zéneb xcuerpɨny. 39 Ne néza Nicodemo ni güeniné Jesús tuby guxin, bdzɨnnéb zecti treint kily mirra ni nuuch áloe ni rldianaxy. 40 Ziy xquel guc, Gusé cun Nicodemo cuáadeb xcuerpɨ Jesús ax btuuibdebny cun de vend ne cun de ni rldianaxyqui, zec ni ná xcostumbrɨ de bniety Israel chi rcuaatsdeb tuby bniety. 41 Gax rut bcuaadeb Jesús lo cruzy ná tuby huert, ne láani huertqui ná tuby baa cuby rut gady tu igaatsti. 42 Láani baaqui bcuaatsdeb Jesús, te pur ruytisy ná gax par bcuaatsdebny pur ni apac sulo dxi ni rzilaaz de bniety Israel.