1 Chi gudeed xoop dxi, Jesús güenény Bed, Jacob cun Juany bets Jacob, idapzideb güedeb quia tuby danyroo. 2 Chiy quia danyqui, nez lodeb bchu zec ni ná Jesús. Quesentiand bcuabcháa lony zecpacza ni rcuabcháa gubidx, chiy nguits ne rcuabcháaza guc de xabny. 3 Ax horqui gunádeb Moisés cun Elías cayuenédeb Jesús diidx. 4 Chiy raipy Bed Jesús:

—Dad, ¡xípalza güenza né dunnɨ zuguaan rurén! Belati rcaazbiu idxannɨ chon ranchiin, tubyni par laabiu, stubyni par Moisés chiy stubyni par Elías.

5 Lalzi ni canii Bed ziy, biat tuby zá rcuabcháa ni bcuaa blda quiadeb, chiy láani záqui bíeny rsee tuby ni gunii:

—Bnietré rac llingaana ni lá rcaaza, ne ni quesentiand rzaclaaznía. Gulcuadiag xtiidxbɨ.

6 Chi bindiag de xpɨny Jesús de diidxqui ax guzullibdeb axt lo yiu guzu lodeb, ne quesentiand bdxibdeb. 7 Chiyru gubii Jesús rut zuguaadeb ax bguaaldny laadeb, raipny laadeb:

—Gulchasú, quɨt rdxibtɨ.

8 Chiy chi bldiaslodeb aquɨtru tu gunátideb, tubyzi Jesús azuguaa ruy.

9 Ax lalzi cayiatdeb quia danyqui, raipy Jesús laadeb:

—Quɨt tu chagüenétit diidx ni agunát, axtisy chi agubíi gubány Bniety ni bxiaald Dios.

10 Chiy gunabdiidx de xpɨnnyqui laany:

—¿Xínii rnii de maistrɨ ni nán ley dec nidoote Elías ná par gueed?

11 Jesús cuaibny:

—Didxldíquɨy nidoote Elías gueed ne laab cuexnezbɨ irate. 12 Per nare rniia laat dec Elías abeedbɨ, ax quɨt niumbeetideb laab zec ni ná par niumbeedeb laab, bannédeb laab zectisy ni bcaazdeb. Anre ziytiziac guelzii iteeddeb nare Bniety ni bxiaald Dios.

13 Chiyru gucbee de xpɨnny dec pur Juany Bautistiy caniiny.

14 Chi bdzɨndeb rut zuguaa de bniety ax gubii tuby bniety nguiu lo Jesús, chiy guzullibbɨ lony raipbɨ laany:

15 —Dad, blaslaazbiu llingaana purzi quesentiand guelzii cadeedby racby guelguidx ratiia. Zienzi güelt riabby lo bal o lo nisza. 16 Ruré bedníaby lo de xpɨnbiu, per quɨt chaleeti isiacdeb laaby.

17 Chiyru cuaby Jesús:

—¿Xípalza laat de bɨnduld niy quɨt reldilaaztɨ nare? ¡Xátidxaza rquiiny suguanía laat ne xátidxa güelaaznía laat! Gultané bniinquɨ rurén.

18 Chiyru gudildné Jesús bɨndxabqui, gunabeeny bdiiangui láani bniinqui ax hóracqui biacby.

19 Chi bra de bnietqui brɨɨch, chiyru gunabdiidx de xpɨny Jesús laany:

—¿Xínii quɨt güeleeti nibéen bɨndxabqui láani bniinqui?

20 Chiy raipy Jesús laadeb:

—Te pur laat gullieezy reldilaaztɨ nare. Rguixtiia lot belrulati guldípactɨ reldilaaztɨ ax masquɨ zeczipac tuby biny xte mostaza ná guelreldilaaz xtentɨ, zelee gaiptɨ danyré: “Quegubicá ruc, güesub stuby lat”, ne danyquɨ scuadiagni xtiidxtɨ. Quɨt xi niacti nagán par laat. 21 Per par idiia saa de bɨndxabré ná par icuuantɨ ne inaabtɨ lo Dios.

22 Lalzi ni candzadeb de nez Galilea cun Jesús, laany raipny laadeb:

—Nare Bniety ni bxiaald Dios, zaca entriagu laznaa de bɨny 23 ax sguinxúdeb naa. Per ni rion dxi sbíi ibánia stuby.

Chi bindiag de xpɨnny ziy quesentiand nalas guzacdeb.

24 Chi bdzɨny Jesús cun de xpɨnny guɨdx Capernaum, de ni run cobrɨ impuest xte yudoo güedeb rut zuguaa Bed chiy gunabdiidxdeb laab:

—¿Ta rguilly xmaistru impuest xte yudoo?

25 Bed cuaibbɨ:

—Rguillylab impuest.

Chiy chi biiu Bed laniuu rut zuguaa Jesús, nidoote laany guninény laab, raipny laab:

—¿Xi rniiu Simóny? ¿Tú de rguilly impuest lo de rey xte lo guɨchliuré? ¿Ta de bɨnladxacdeb o de bɨnzít?

26 Chiy cuaby Bed:

—De bɨnzít.

Chiyru gunii Jesús:

—Chiy de bɨnladxdeb quɨt náti par quillydeb impuest. 27 Per par quɨt tu idxiich, güenru güe ruu nis, bcuaa anzuel xtenu. Chiy primer beld ni inaazu ax guléem. Lanruum idxialu tuby mɨly, ne mɨlyqui zaldiy par quilliu impuest xtena ne xtenu. Pur ningui chi aguliiu mɨlyqui, güetilly impuestqui.