1 Chi bdzɨndeb stuby lad nisqui, lo liu xte de bɨny Gadara, 2 zectisy ni bdiia Jesús láani barcu, as güechalo tuby nguiu ni nuu tuby bɨndxab láani lazdooni laany. Nguiuqui láani campiony bdiiab. 3 Te pur cuntisy glay de baa nuub ne quɨt tu releeti ildiiby laab niclɨ cun caden. 4 Zienzi güelt abldiiby de bniety de naab ne de niib cun de caden, per rtiuugacbɨ de cadenqui. Quɨt tu releeti su lob. 5 Cuntispac candzab rdxi ne guxin nez lo guiix ne glay de baa, rbɨxtiab ne rguilguidxbɨ laab cun guia. 6 Per chi gunáb Jesús desdɨ zit, chiy blluuinbɨ güechalobny, ax guzullibbɨ lony. 7 Ne quesentiand diip gurɨxtiab:

—¿Xínii riutétibiu cun nare, Jesús Lliin Dios ni rbez llayabaa? Rguiin rnaaba lobiu quɨt isacsitibiu nare.

8 Laab guniib ziy te pur Jesús acaniiny:

—¡Bɨndxab, bdiia láani lazdoo bnietquɨ!

9 Chiyru gunabdiidx Jesús laab:

—¿Tú lóo?

Laab cuaibbɨ:

—Nare lá Legión te pur zieny nan.

10 Ax gunaabbɨ lony par quɨt cuéeny de bɨndxabqui nezqui. 11 Ne cun lo tuby dany nezqui nuu zieny de cuch cayodem 12 parzi banlas de bɨndxabqui lo Jesús, raipdey laany:

—Bxiaaldbiu dunnɨ rut zuguaa de cuchre par idxúun láandem.

13 Chiyru bsaan Jesús par bdiia de bɨndxabqui láani bnietqui ax biiudengui láani de cuchqui. De cuchqui zecti tiop mily nádem. Chiy guzulo rlluuindem ax güeyabdem ruu tuby barranc axtquɨ lo nis rut guaapy nis quiadem ax gutydem.

14 Chiy de bniety ni cacualo de cuchqui, blluuindeb güetixteedeb lo bɨnguɨdx ne iduibte de nezqui. Parzi zieny bniety güeguiaa ni guc. 15 Chi bdzɨndeb rut zuguaa Jesús, gunádeb dec anazaac nguiu ni guu de bɨndxabqui láanni anacubɨ de xabbɨ, ax bdxibdeb. 16 Chiy de bniety ni guná xa guc cun nguiu ni guu de bɨndxabqui láanni ne cun de cuch, laadeb ruenédeb iraru de bnietqui diidx xa guc. 17 Parzi guzulo runlasdeb lo Jesús par idiiany ladxdeb.

18 Deni zeyiiu Jesús láani barcu, bniety nguiu ni guu de bɨndxabqui láanni runlasbɨ lony par chanény laab. 19 Per Jesús quɨt guzigueldtiny sino que raipny laab:

—Quebia lizu. Güena de xfamiliu. Chiy gudixtee lodeb irate ni baany Dios cun liú, ne xa xquel blaslaazny liú.

20 Chiyru zégac bnietqui, guzulo rguixteeb lo de ni rbez nez Decápolis irate de ni baany Jesús cun laab, ax rdxalo iratedeb.

21 Deni biecqui Jesús láani barcuqui par stuby lad dets nisqui, zieny bniety bdxasaa ruy, parzi ruxchu nistisqui biianny. 22 Chiy bdzɨny tuby bniety ni rnabee láani tuby yudoo xte de bniety Israel, laab láb Jairo. Chi gunáb Jesús guzullibbɨ lony 23 ne quesentiand banlasbɨ lony, raipbɨ laany:

—A llindxaapa acayaty. Dazubnaabiu quiaby par yacby ax ibányby.

24 Chiyru zéne Jesús laab, ne zieny de bniety guzanald laany axtpacza rtaagudebny. 25 Chiy lo de bnietqui, nuuch tuby bniety gunaa ni racxú, aguc tsɨbtiop iz quɨt rbezti racbɨ guelguzan. 26 Quesentiand guelzii agudeedbɨ, lo zienzi doctor agüeb ax abra de xixtenbɨ rtóob. Per quɨt xi baanti de rmɨdyqui sino que lalza mazru guzulluub. 27 Ningui, chi bindiagbɨ pur Jesús, chiy güebiib nez detsny glay de bnietqui ax bguaaldbɨ xabny. 28 Te pur laab baanbɨ xgab cun iguaaldbɨ xabny abiacacbɨ. 29 Ne hóracqui gulez guelguzanqui ax bziienbɨ dec abiacbɨ. 30 Chiy Jesús gucbeegacny dec nuu ni absiacny cun guelrnabee xtenny, ax bziecquilony lo de bnietqui. Chiy gunabdiidxny laadeb:

—¿Túngui bguaald xaba?

31 Ax gunii de xpɨnny:

—Laabiu rguiaabiu dec zieny bniety rtaagu laabiu. Chiy rnabdiidxzacbiu: “¿Túngui bguaald xabbiu?”

32 Per Jesús iranezte bguiaany par iniány ni bguaald xabny. 33 Parzi racdxaaich gunaaqui rdxibbɨ pur ni nánbɨ xa guc. Chiyru gubiib lo Jesús ax guzullibbɨ ne bziruub irate. 34 Chiyru raipy Jesús laab:

—Llindxaapa, pur ni güeldilaazu nare ningui abiacu. Quegüe. Quɨtru rdxibiu, abiacu xte guelguidx ni gucu.

35 Zeczi canii Jesús ziy, chi bdzɨny de bniety ni nuu liz Jairo, chiy raipdeb Jairo:

—A llindxaapbiu aguty, quɨtru runbiu storbɨ Maistrɨ.

36 Per Jesús chi bindiagny ni caniideb, chiy raipny Jairo:

—Quɨt idxibtibiu. Cuntisy güeldilaazbiu nare.

37 Per quɨt bsaantiny nianény irate de bnietqui sino que Bedzi, cun Jacob ne Juany bets Jacob. 38 Chi bdzɨndeb liz Jairoqui, guná Jesús scand ni cayac ruy pur de ni rbɨxtia ne de ni ruun. 39 Chiyru biiuny liz Jairo ax guniiny:

—¿Xínii cuenzi runtɨ scand ne ruuntɨ? Dxapeenquɨ quɨtllɨ gutytiby, raaissiby.

40 Parzi rlliznédeb laany. Chiyru gunabeeny bdiia irate de bɨnqui. Ax güenény xtadby, xnanby cun de xpɨnny rut nágaaby. 41 Chiy gunaazny naaby raipny laaby:

—Talita, cumi —zelo diidxqui: Dxapeen, liú caniia quegüeste.

42 Hóracqui güeste dxapeenqui guzulo rzaby. Laaby nuuby tsɨbtiop iz. Ax irate de bnietqui quesentiand bdxalodeb. 43 Per Jesús gunabeeny dec quɨt tu chagüenétideb diidx pur ni gucqui, ne gunabeezacny ideeddeb xi iquiiny dxapeenqui.