1 Chene wluzh wnii Jesus lo yra mén guin, za Ne Capernaum. 2 Nga nuu te kapitan-Roma; rap men te xmos men ne kesentyent ryaan men; rzhuun mos guin, mer mer guet men. 3 Chene won kapitan ne ruu mén xdiiz Jesus, wxaal men txup tson mén ne rnebééy lo men-Israel, chen tsa men ynab men lo Ne ne tsaneseyaken Ne xmos men. 4 Ne wdxiin mén guin lo Ne, wzelo men kesentyent wnab men lo Ne, re men:

―Rzëël ne gun de xyudar kapitanree, 5 porke ryaan zhaa menlaz be no laa zhaa wkyeen ne wyeep xeydoo be.

6 Lex za Ne yra Ne men; per chene che guex ydxiin Ne ruxyuu kapitan, wxaal kapitan txup tson xmig kapitan ne tsa gue lo Ne:

―Dechey, gunendet lo de, porke rzëëldet noo ne chiid de axtegue ruxyuu noo. 7 Por neguin wyezhdet noo ne ndxidye noo de laa zhal noo. Per nozguestee gukyeen ne gyaken xmos noo, laa ne gyaken men nga. 8 Porke no ke noo rap mén ne rnebééy lo noo, no rap ke noo mén ne rnebééy noo lo. Chene nan noo lo men te men ne tsa men mandad, ra men; chene nan noo lo men ste men ne chiid men lo noo, rdxiid men; chene nan noo lo xmos noo: “Gulaa neree”, rlaa meno.

9 Ne won Jesus ne re xmig kapitan neguin ne re kapitan, wzee wzak Ne, lex wcheree lo Ne wii Ne lo yra mén ne zanal Ne, re Ne lo men:

―Yna noo lo de ne ni Israel gardet ytsëlo noo ni te mén ne rlaleedx noo zegne rlaleedx ménree noo.

10 Le chene wberee yra men guin ne wxaal kapitan, wii men le xmos kapitan che wyaken.

11 Wluzh nga za Jesus te gyëz ne la Naín yra Ne xpén Ne no le ndalyaa mén. 12 Chene wdxiin Ne guex rulgyëz guin, wii Ne le mén zakeedx te mengut, xpee te wnabyud; tendxee men nak mëëd lo wnaa guin. Kesentyent ndalyaa mengyëz zanal men. 13 Chene wii Jesus wnaa guin, wles lextoo Ne men, lex re Ne lo men:

―Goondet de.

14 Lex wbig Ne wtee nya Ne txu gyin ne nuu mengut guin; orguin wzutsë yra mén ne zaneey men, lex re Ne lo mengut guin:

―Zhanmenyu, yna noo lo de: ¡Gutsaxee!

15 Orguin wzobli mén guin, wzelo men wnii men, lex wdekwent Jesus men lo xnaa men. 16 Ne wii yra mén neguin, wdxe men, wzelo men wzaknon men Dëdyuzh, re men:

―Te profet ne kesentyent non wrukaa lad be.

No re men:

―Dëdyuzh zëdgyun xyudar be.

17 Ydendxee lo lyu ne la Judea no le yrandxee gyëz ne nak guex nga waknan mén neguin ne wlaa Jesus.

18 Wuu xpén Xwa diiz lo Xwa yra neree ne wak. Lex wbëz Xwa men txup men, 19 wxaal Xwa men lo Jesus chen ynabdiiz men lo Ne gan pe laa Ne nga nak ne nuu diiz ne chiid o rap Xwa degne ykambë́z Xwa ste mén. 20 Chene wdxiin mén guin ne wxaal Xwa, re men lo Ne:

―Laa Xwa ne rtxobnis wxaal noo zëdnabdiiz noo lo de gan pe laa de nga nak ne nuu diiz ne chiid u rap Xwa degne ykambë́z Xwa ste mén.

21 Orgueguin wneseyaken Ne ndalyaa mengyiz, men ne rzak gyelerzebyoob, men ne nuu menzab lextoo, no wlaa Ne ne wyenii bzalo ndal menngwlëë. 22 Lex wke Ne re Ne lo men:

―Gutsa gue de lo Xwa logne wii de, logne won de. No gu de diiz lo Xwa ne le menngwlëë che rwii, le mennguzh che rzawen, le men ne rzak gyiz ne la lepra che wyaken, le mennkwëët che wyenii gyedyag, le men ne che wet le men che wban, le lo yra menprob che rakzëët xdiznzoon Dëdyuzh. 23 Nzoon men ne ysalzaandet ne rlaleedx men noo.

24 Chene che sya yra men ne wxaal Xwa, wzelo Jesus wzëët Ne xkwent Xwa lo yra mén ne ndxinno Ne, re Ne:

―¿Pagox wa de wii denbidx? ¿Pe te gobkyii ne rlaa mee zere zerotee wa de wii? 25 ¿U pagox wa de wii? ¿Pe te mén ne zhaandxee rnaa xab wa de wii? Laa de yra de nan de ne men ne zhaandxee rnaa xab no men ne mbaale za lo xgyelembán, ruxyuloow rrey ndxin men. 26 Guex neguin, ¿txu wa de wii? ¿Pe te profet wa de wii? Nli we, yna noo lo de, te men ne mazre nondee ke lo te profet wa de wii. 27 Laa men nga rakzëët lo xgyiich Dëdyuzh ledne re:

29 Ne won yra mén neguin yra men men ne rgoob zeg impwest, wyenen men ne xnëz rlaa Dëdyuzh porke che wrobnis men lo Xwa. 30 Per le yra men ne nak farisew no le yra maxter ley ne wrobnisdet lo Xwa, wlaandet men logne rlaa Dëdyuzh por laa men. 31 No re Jesus lo men:

―¿Pagox ynesaglo noo mén ne nuu naaree? ¿Pagox rzaglo men? 32 Rzaglo men minwin ne rkaa wkyit lenlgyeey no ne rkarëzlsaa, nan miin: “Wool noo flawt yra noo, per wyadet de. Nles wolbaan noo, per woondet de.” 33 Porke wdxiid Xwa ne rtxobnis, wudet men yralondxee ne ru mén, ni woodet men bin, no re de yra de ne menzab nuu lextoo men. 34 Orrenaa zëëd Men ne wdxiid wak Mén, ru men, roo men, no re de, laa men kesentyent ru rootee, laa men rtsëlsaa mendol no laa men rtsëlsaa men ne rgoob zeg impwest. 35 Per xgyelenyenii Dëdyuzh raknyoo we por yra mén ne nak xpén Ne.

36 Wbëz te men ne nak farisew Jesus ne tsa Ne gwdu ruxyuu men; lex wdee Ne lenxyuu men wzob Ne lo mezh. 37 Gyëz ke guin nuu te wnaa ne kesentyent zeeb dol. Ne waknan men ne le Ne za gwdu ruxyuu farisew, wdxinneey men te bot alabastro, yzaa we perfum. 38 Roon men, wzob men guex ledne zu nii Ne; wgaz men nii Ne kon nis lo men, lex wkwiidx meno kon gyitsxtoo men; wtsëlruu men nii Ne, lex wdxiib men perfum guin led nii Ne. 39 Chene wii farisew guin ne wbëz Ne ne wlaa wnaa guin zenga, nuu lextoo men: “Belne nli profet nak zhanree, nyenen zhaa gan pe klas nak wnaa gwa ne wtee nya led zhaa no gan txu nak men, no nyenen zhaa ne mendol nak men.” 40 Lex re Ne lo farisew guin:

―Simon, rap noo te diiz ne yzëët noo lo de.

Wke men re men:

―Guzëëto, Maxter.

41 Orguin re Ne lo men:

―Zeeb txup mén lo te men ne rbodiin med. Te men zeeb gaaygwyuu denario, le ste men zeeb txupchii we. 42 Per kom rundet men gan gyizh meno, wun mén guin ne rbodiin med men perdon yrup men. Orrenaa, guna gan ¿txu menzhe ntozdee gyaan men guin ne rbodiin med?

43 Wke Simon, re Simon:

―Por noo, men ne nyezhdee zeeb.

Lex re Jesus:

―Zegwa we zeg na de.

44 Orguin wcheree lo Jesus wii Ne lo wnaa guin, lex re Ne lo Simon:

―¿Pe wii de ne wlaa wnaaree? Wdee noo lenxyuu de, no wniizdet de nis ndaa nii noo; le wnaaree wgaz men nii noo kon nis lo men, lex wkwiidx meno kon gyitsxtoo men. 45 Woodet de bzhid gyedkwes noo, per le wnaaree desde ne wdee noo lenxyuu de, rbë́zdet rtsëlruu men nii noo. 46 Wguudet de seyt xtoo noo, per le wnaaree wdxiib men perfum led nii noo. 47 Por neguin yna noo lo de, le yra xdol men che wak perdon, porke kesentyent ryaan men noo; per le mén ne nuu lextoo ne zeebdet men ndal dol, zhi ryaan men noo.

48 Lex re Ne lo wnaa guin:

―Le yra xdol de che wak perdon.

49 Orguin wzelo yra mén ne zobno Ne lo mezh rnabdizlsaa men, re men:

―¿Txu nak ménree ne axtegue xdol mén run men perdon?

50 Zhich guin re Ne lo wnaa guin:

―Por ne wlaleedx de noo, wláá de lo dol. Zhaas gugya.