1 Zeel chi badxuꞌn luguiedx Atenas, ad radaantran, ma rayënan yayagbeen xhienaag zaꞌdi, dxel baguieenan xgab bayaꞌn du xtijban ni. 2 Abiꞌ baxhaal dux compniaran Timoteo, bén cayguieennëꞌn xchiin Dios caytieꞌchan xtiidxzaꞌc Jesucrist, din yaguꞌman luxdoodi sudxiꞌchidi loj ni ma rliladxidi, 3 din niꞌqui tijbidi ad zalenyaꞌt por ree guialzi ni cadëdidi, lëjt ragbee guial zian yazaꞌc ree. 4 Chi badxuꞌnëꞌn lëjt, banan guial dád zien loj guialzi yadüüd ree, abiꞌ lëjt ragbee guial laan na̱j ni ma gojc. 5 Zeel ad gudaantran, abiꞌ guxhalan Timoteo din gagbeen xhienaag zinalidi ni rliladxidi, din rdxeban gusquiee xindxab lëjt, abiꞌ achetri sirv nüjn ni baguieenan por lëjt.

6 Per yan ni ma baguiaad Timoteo ni bidganajman lëjt, ma bagojnman dunujn guial zinalidi zagdxe ni rliladxidi Jesucrist në ziꞌc rën lasaꞌdi. Laaman na guial zianczi yuꞌ luxdoodi zagdxe rasaaladxidi dunujn, abiꞌ dád ma rëndi guguiaadi dunujn, ziꞌcgajc rayënan yaguiaan lëjt. 7 Zeel, compniar raliduladx ree Jesucrist, majsi graloj tarbajw në guialzi caydüüdan, per dád nix yuꞌ du luxdoon raguiejnan guial zagdxe zinalidi ni rliladxidi. 8 Abiꞌ yan mazri nix ma bayu du luxdoon guial ma bayagbeen zaꞌdxiꞌchquidi loj ni zinalidi xnejz Dad Jesucrist. 9 Dxel xt niꞌquid radxejltan xhienaag yadëën quixtëë loj Dios por lëjt, guial dád nix yuꞌ du luxdoon lojman por lëjt. 10 Dxej guiaal radiꞌn ranaaban lojman din guneeman mod yudganajn lëjt, abiꞌ lox yanan lojdi ni ryaadx gagbeedi xcwent guial rliladxidi Jesucrist.

11 Dux Dad ree Dios në Dad Jesucrist gagnë dunujn din gac yudganajn lëjt. 12 Abiꞌ Dad Jesucrist gagnë lëjt din gusnuu guiën lasaꞌdi mazri, guiën tëëdi gra lasaꞌ bejndi ziꞌc rayënan lëjt. 13 Laaman gagnë lëjt sudxiꞌchidi loj xnejz Dios din sudi naya sin dol lojman, dxej ni guiꞌt Dad Jesucrist stijb con gra ree xbejnman.