4
Been xindxab Jesús prueb
(Mt. 4:1‑11; Mr. 1:12‑13)
1 Yuꞌ xSprijt Dios luxdoo Jesús guidiblagaa. Chi bazaman guiiwroꞌ Jordán dxel binë xSprijt Dios laaman lod na̱j yujbidx. 2 Ni guzuman tiuu dxej tiuu guiaal, abiꞌ been xindxab laaman prueb. Achetczi gudawaman dxej zii ree, zianz gulaanman. 3 Dxel rëb xindxab guin lojman:
―Bal wali najl Xiꞌn Dios, gunabee yayajc guiaj guie guiadxtil.
4 Badxiꞌ Jesús laan rëbaman:
―Loj xtiidx Dios rëb: “Ad ganaxtizi guiadxtil guiban bejn, nëgajc gra diidx rniee Dios.”
5 Dxel binë xindxab guin laaman tijb guijc guiaꞌ ya daꞌt, lod balüüx laaman gra ree nacion rigaꞌ loj guidxliuj. 6 Abiꞌ rëb xindxab guin lojman:
―Gunen graczi guialrniabee në guialnazaꞌc ni yuꞌ loj ree nacion guie. Din naj caꞌ laa reen, zajc gudëdan laa reen loj chutëëz bén rënan. 7 Bal guzuxibil lon abiꞌ guiën daꞌtil naj, graczan gac xieenl.
8 Badxiꞌ Jesús laan, rëbaman:
―Loj xtiidx Dios rëb: “Tijbzi loj xDadil Dios guzuxibil guiën tëël laaman, abiꞌ tijbzi laaman been sirv.”
9 Dxel binë xindxab guin laaman Jerusalén, abiꞌ gulëꞌpix laaman guijc yadooroꞌ zojb luguiedx guin. Zianz rëbix lojman:
―Bal wali najl Xiꞌn Dios, gudidyaꞌ diizd guie xt luyuj, 10 din loj xtiidx Dios rëb:
Dios guixhiaal ree xianjlaman din guinia reeman lüj.
11 Yales reeman lüj con yaa reeman,
chitëë quiilguijdx guiaj guiaꞌl.
12 Badxiꞌ Jesús laan rëbaman:
―Rëb tëë loj xtiidx Dios: “Ad güünl prueb xDadil Dios.”
13 Chi ad badxejltri xhienaag güün xindxab guin Jesús prueb, dxel biquiedix tibladëd.
Rzuloj Jesús rulüüman bejn ree niz Galilea
(Mt. 4:12‑17; Mr. 1:14‑15)
14 Badxin Jesús niz Galilea, yuꞌ xSprijt Dios luxdooman guidiblagaa, abiꞌ guidibczi niz yagaj bireꞌch xtiidxaman. 15 Rulüüman bejn ree lën ree yadoo guidib niz yagaj, abiꞌ graczi reeman ruzaꞌt laaman zagdxe.
Radxin Jesús Nazaret
(Mt. 13:53‑58; Mr. 6:1‑6)
16 Badxin Jesús Nazaret luguiedx lod guniꞌsaman. Abiꞌ dxej raziiladx ree bejn guyuman lën yadoo ziꞌc na̱j xcostumbraman. Dxel guzuliman persi biilaman xtiidx Dios. 17 Badëëd reeman guiꞌch ni bacaa Isaías bén badëë xtiidx Dios loj ree bejn. Chi bachijlaman loj guiꞌch guin, badxejlaman lod rëb:
18 XSprijt dux Dad ree Dios zaꞌnë naj,
din laaman ma beenleꞌ naj din ganen xtiidxzaꞌcaman loj ree bénprob.
Guxhaalaman naj din gugojnan bejn ree xhienaag laa reeman loj ni rzajc reeman,
yaxhal tëën loj ree bénlutiaꞌp.
Gün tëën yudar bén rusagzi reeman,
19 din gugojnan guial ma bidxin dxej zaꞌcdxoon ni güünleꞌ Dios bejn ree.
20 Dxel batüüb Jesús guiꞌch guin bayüman laan loj bén rüjn yudar lën yadoo guin, zianz gurejman. Graczi ree bén rigaꞌ yagaj ruguiaadxijch laaman. 21 Dxel guzuloj caneenëman laa reeman, rëbaman:
―Yan dxej gajc ma gojc cumplid ziꞌc ca loj xtiidx Dios ni ma biguiejndi.
22 Graczi reeman cuzaꞌt laaman zagdxe caydxa tëë loj reeman diidxzaꞌcdxoon ni caneeman. Dxel canabdiidx loj lasaꞌ reeman rëb reeman:
―¿Nid laaman na̱j xiꞌn Xiëb ya?
23 Dxel rëb Jesús loj reeman:
―Ma ragbeen guial nadi tijb diidx ni rëb: “Doctor, bayüjn lüj gajc”, na tëëdi: “Ni ma baguiejnan beenl Capernaum nëgajc guie beenan najn ladxil.”
24 Rëb tëë Jesús:
―Diidxliczi rnin, niꞌczi tijb bén rudëë xtiidx Dios loj ree bejn, ad rënt reeman laaman ladx gajcaman. 25 Gol basaaladx dád zien ree béngunaa bizëjb zojb Israel lën ree dxej guban Elías bén badëë xtiidx Dios loj ree bejn, chi ad golt guia choon ijz garol, abiꞌ guyu gubijn guidibczi. 26 Per ad guxhaalt Dios Elías guin loj tijb ree bén bizëjb zojb Israel, guxhaalaman laaman loj tijb bén bizëjb zojb guiedx la Sarepta, gajxh Sidón. 27 Në lën ree dxej guban Eliseo bén badëë xtiidx Dios loj ree bejn, dád zien ree bejn rajc guialguijdx la lepra, per niꞌczi tijb reeman ad bayüjntaman, tijbzi bén Siria bayüjnman laman Naamán.
28 Chi biguiejn gra ree bén yuꞌ lën yadoo guin ni rëb Jesús, dád balen reeman. 29 Bisu reeman babëë reeman Jesús luguiedx guin, dxel binë reeman laaman roꞌ tijb balaꞌ ya guial na̱j guiedx guin guijc tijb guiaꞌ, din gutediaꞌ reeman laaman. 30 Per gudëd Jesús galay reeman, ziataman.
Rabëë Jesús xindxab luxdoo tijb bejn
(Mr. 1:21‑28)
31 Wej Jesús guiedx Capernaum ni rigaꞌ niz Galilea, yagaj rulüüman bejn ree dxej ni raziiladx reeman. 32 Abiꞌ dád badxaloj reeman ni rulüüman guial rnieenëman laa reeman con guialrniabee.
33 Lën yadoo guin yuꞌ tijb xin yuꞌ xindxab luxdoo, abiꞌ guridxaꞌ xindxab guin rëbix:
34 ―Basaꞌn dunujn, ¿xhie rënl con dunujn, Jesús bén Nazaret? ¿Zëëdil ya zidganijtil dunujn? Nünbeen lüj, naya nalil najl xiꞌn Dios.
35 Dxel gudilë Jesús xindxab guin, rëbaman lojx:
―¡Bacwëëz roꞌl, barii luxdoo xin guin!
Zianz badxeꞌbi xindxab guin xin guin luyuj guidib niz loj reeman, bariitix luxdoox achetczi goquix. 36 Graczi reeman badxaloj, rëb loj lasaꞌ reeman:
―¿Xhie ree diidx guin rnieeman? ¡Con guialrniabee ni rajpaman, rniabeeman rarii ree xindxab luxdoo ree bejn!
37 Abiꞌ guidibczi niz yagaj bireꞌch xtiidxaman.
Rayüjn Jesús xnasuegr Bëd
(Mt. 8:14‑15; Mr. 1:29‑31)
38 Dxel barii Jesús lën yadoo guin, abiꞌ wejman lidx Simón. Ragxuu xnasuegr Simón guin yuꞌman xliaadoxh zeel guzajc reeman Jesús liaadx din yayüjnman laaman. 39 Zianz basajb loj Jesús lod nagaꞌman gunabeeman yarii xliaa guin, abiꞌ bariin. Loj hor ziigajc bixcheman guzuloj cudëëman ni gaw reeman.
Rayüjn Jesús zien ree bénragxuu
(Mt. 8:16‑17; Mr. 1:32‑34)
40 Chi ma wëëz gubijdx, graczi ree bén rajp bénragxuu bén rajc ree gadxagayaa guialguijdx binë reeman laa reeman loj Jesús, persi badxiib yaaman guijc tijb gaj reeman, bayüjnman laa reeman. 41 Në zien ree bénragxuu guin rarii xindxab luxdoo, rbidxaꞌ reex rëb reex:
―¡Lüj na̱j Xiꞌn Dios!
Per gudilëman xindxab guin ree, ad cwëjbtaman niniee reex, guial ragbee reex laaman na̱j Cristo.
Rulüü Jesús xtiidx Dios niz Galilea
(Mr. 1:35‑39)
42 Chi bareguiaal, barii Jesús luguiedx guin zëman lod achut bejn zojb. Per raguiil ree bénguiedx guin laaman, bidxin reeman lod zaꞌman abiꞌ rëb reeman lojman din yayaꞌnnëman laa reeman. 43 Per rëbaman loj reeman:
―Në ree luguiedx ren rayal chinëꞌn xtiidxzaꞌc Dios guial xhienaag na̱j xguialrniabeeman, din par zian guxhaalaman naj.
44 Zian basnuu guneeman xtiidx Dios lën ree yadoo niz Galilea.