1 Chi baza Jesús Capernaum, dxel wejman niz Judea në stiblad roꞌ guiiw Jordán. Abiꞌ lod zaꞌman bidoꞌp ree bejn zatijb, dxel guzuloj culüüman laa reeman ziꞌc goc xcostumbraman. 2 Yuꞌ ree bénfarisew gubig lod zaꞌman. Abiꞌ par güün reeman laaman prueb, gunabdiidx reeman lojman rëb reeman:

―¿Zajc yalaꞌ xinguiaaw lacheelix ya?

3 Badxiꞌman laan rëbaman:

―¿Xhie gunabee Moisejs güündi?

4 Abiꞌ rëb reeman:

―Cwëjb Moisejs yalaꞌ xinguiaaw lacheelix, per gudëëdix guiꞌch tiaꞌman guial ma balaꞌ reex.

5 Dxel rëb Jesús:

―Rëb Moisejs gac zian guial nadidi. 6 Per guiaꞌxchej chi guleꞌcchaaw Dios guidxliuj, “beenman xinguiaaw con béngunaa”. 7 “Zeel xinguiaaw gusaꞌn xdad xniaax din guibannë lacheelix, 8 dxel grop reex ma gac ziꞌc tijbzi bejn.” Zianan zeel ad najtri reex tioꞌp, ma na̱j reex tijbzi. 9 Zeel, bénguidxliuj ad rayalt yalaꞌman lasaꞌ ni ma bachajg Dios.

10 Chi bayu reeman lënü, gunabdiidx ree xbejnman lojman zatijb, xcwent ni guneeman. 11 Abiꞌ rëbaman loj reeman:

―Xin ralaꞌ lacheel, abiꞌ rtiaꞌx ben ren dolan cayüjnx, 12 ziangajc bal tijb béngunaa yalaꞌ lacheelaman abiꞌ tiaꞌ xin ren laaman, dolan cayüjnman.

13 Binë ree bejn xindoo ree lod zaꞌ Jesús din gudxiib yaaman guijc reex. Per ree xbejnman guzuloj cadilë reeman bén binë ree laa reex. 14 Chi baguiaa Jesús zian, balenman zeel rëbaman:

―Gol badëëd mod guiꞌt reex lon, ad bal rudxoondi. Din lod rniabee Dios na̱j par ree bén na̱j ziꞌc laa reex. 15 Diidxliczi rnin, bén ad rliladxt xguialrniabee Dios ziꞌc tijb xindoo, ad zileꞌt chuꞌman lod rniabee Dios.

16 Dxel gudiidx Jesús laa reex, badxiib yaaman guijc reex, beenleꞌman laa reex.

17 Chi ma gusnuu xnejz Jesús, ruxüün tijb xinguiaaw bidxinx abiꞌ bazuxibix lojman, dxel gunabdiidxix rëbix:

―Mextr zaꞌc, ¿xhie rayal günan din gaꞌpan guialnaban tiblayaa con Dios?

18 Badxiꞌ Jesús laan rëbaman:

―¿Chexc zeel nal lon benzaꞌc? Achut na̱j benzaꞌc, tijbzi Dios. 19 Lüj rajc ree mandamient, “Ad gugüjtil bejn, ad sunël béngunaa ren, ad cwanl, ad cwëël xtiidx bejn ad gusquiee tëël, gojp respejt xdad xniaal.”

20 Dxel rëbix loj Jesús:

―Mextr, gra ree ni guin cayünan diizd xindoon.

21 Baguiaa Jesús lojx, bayaman laax, rëbaman:

―Per yuꞌ zatijb ni riaadx güünl: bigtoꞌ gra ni rajpil, badëëd milia guin loj ree bénprob, zian gapil guialnazaꞌc xanyabaa dxel guidnalil naj majsi xhietëëz saquil.

22 Chi biguiejn xin guin zian, ad nixt guyu luxdoox abiꞌ dád yuꞌnayax ziax guial dád xinrijcwan.

23 Dxel baguiaa Jesús loj gra reeman, abiꞌ rëbaman loj ree xbejnman:

―¡Dád nawëëg na̱j chuꞌ benrijcw loj xguialrniabee Dios!

24 Dád badxa loj ree xbejnman ni rëbaman. Per rëbaman loj reeman zatijb:

―Xiꞌn, ¡bén yuꞌguijc mazri ni rajpaman, dád nawëëg na̱j chuꞌman loj xguialrniabee Dios! 25 Adli nawëëgt tëd tijb camell xan gagux guial chuꞌ tijb benrijcw loj xguialrniabee Dios.

26 Chi biguien reeman diidx guin ree, mazri badxa loj reeman, dxel rniabddiidx loj lasaꞌ reeman, rëb reeman:

―¿Chu zajc laa loj xcasti Dios?

27 Baguiaa Jesús loj reeman, abiꞌ rëbaman:

―Par bejn nawëëgan, per par Dios ad nawëëgtan din par Dios graczan zileꞌ gac.

28 Dxel guzuloj rëb Bëd loj Jesús:

―Dunujn basaꞌnan graczi ni rayaꞌpan persi zudnaalan lüj.

29 Badxiꞌ Jesúsan rëbaman:

―Diidxliczi ganin lëjt, chutëëz bén rusaꞌn lidx, o bijch, o bizan, o xdad xniaa, o lacheel o xiꞌn, o guidxliuj ree por naj në por xtiidxzaꞌc Dios, 30 loj guidxliuj guie tiaꞌman tibgayuu volt mazri guial loj ni basaꞌnman, bal najn lidxaman, bijchaman, bizanman, xniaaman, xiꞌnman, në xguidxliujman, majsi guidib wazagdiaj, abiꞌ guidxin dxej gapaman guialnaban tiblayaa con Dios. 31 Per dád zien ree bén na̱j bén yaloj yan, gac reeman bén bigra, guiáad ree bén na̱j bén bigra yan, gac reeman bén yaloj.

32 Chi zë reeman Jerusalén, ned Jesús loj ree xbejnman, abiꞌ dád radxaloj reeman guial zëman Jerusalén, guiáad ree bén nal laaman rdxeb reeman. Dxel gurejdx guidxiptioꞌp ree xbejnman lood ren, zianz guzuloj rëbaman ni sacaman:

33 ―Rëbaman loj reeman: Lëjt ragbee guial ziyoꞌ ree Jerusalén, abiꞌ naj najn Bén guxhaal Dios, yayü reeman naj loj ree bixhioz rniabee ree bixhioz, në loj ree mextr rajc ley. Abiꞌ nabee reeman guiëtan, yayü tëë reeman naj loj ree bén ad najt bén Israel. 34 Guzeꞌ reeman naj, gucojp xhiejn reeman lon, quin reeman gugüjt tëë reeman naj, per yayon dxej yabanan.

35 Dxel Jacob con Waj xiꞌn Zebedeo, gubig reeman loj Jesús rëb reeman:

―Mextr, rayënan güünl tijb favor ni yanaaban lojl.

36 Abiꞌ gunabdiidxaman rëbaman:

―¿Xhie rëndi günan?

37 Badxiꞌ reeman laan rëb reeman:

―Rayënan guial chi ma canabeel, yadxuꞌn cwëꞌl, tijb dunujn yadxuꞌ xladbeel, zatijb dunujn yadxuꞌ xladruvejsil.

38 Badxiꞌman laan rëbaman:

―Niꞌquid ragbeetidi xhie ni guin rniabidi. ¿Wen zajc sagdiajdi ziꞌc gazaagdiajn ya? ¿Zajc guiëtidi ziꞌc guiëtan ya?

39 Badxiꞌ reeman laan rëb reeman:

―Zayajcan.

Dxel rëb Jesús:

―Waliquidi sagdiajdi ziꞌc naj guiët tëëdi ziꞌc naj, 40 per guial cwedi da ladbeen o da ladruvejsan, ad najt rayal gune laan, din ma najn par ree bén rayal laan.

41 Chi biguien zachii xbejn Jesús ni rëb reeman, dád balen reeman Jacob con Waj, 42 per gurejdx Jesús laa reeman rëbaman:

―Lëjt ragbee guial ree bén rniabee loj guidxliuj guie, rniabee reeman bejn ree ziꞌctzi rën reeman, guiáad ree bén zojbloj rüjnnë reeman bejn ree ziꞌctzi rën reeman por guialrniabee ni rajp reeman. 43 Per con lëjt ad rayalt gac zian. Din bal chu rën gac bén rniabee lojdi, rayal güünman sirv lojdi, 44 guiáad bén rën gac bén zojbloj, rayal güünman sirv loj gradi ziꞌc bén nadoꞌ. 45 Din niꞌqui naj najn Bén guxhaal Dios, ad zialtan loj guidxliuj par güün ree bejn sirv lon, zialan din günan laa reeman sirv, abiꞌ con da guialnabanan gaguixan por xtol zien ree bénguidxliuj.

46 Bidxin reeman guiedx Jericó, abiꞌ chi ma cayrii Jesús luguiedx guin, con ree xbejnman në ree benzien. Tijb xin ad ranit loj lax Bartimeo, xiꞌn bén la Timeo, zojbix cwëꞌ nejz rniabix carda. 47 Chi biguiejnx cadëd Jesús bén Nazaret niz yagaj, guzuloj cabidxaꞌx rëbix:

―¡Jesús, xdiaa Davi, baya naj!

48 Dád zien ree bejn ridilë laax din yacwëëz roꞌx. Per mazri rejs rbidxaꞌx rëbix:

―¡Xdiaa Davi, baya naj!

49 Dxel guzudxe Jesús rëbaman:

―Gol gurejdxix.

Dxel gurejdx reeman laax, rëb reeman:

―Baguꞌ luxdool, bisu, lüj caneeman.

50 Dxel laa badxeꞌbi gajc xin guin lajd najcwix luya, xt gutiajsix guzulix bibiguix loj Jesús. 51 Gunabdiidx Jesús lojx rëbaman:

―¿Xhie rënl günan por lüj?

Badxiꞌxan rëbix:

―Mextr, rënan yani lon.

52 Dxel rëb Jesús:

―Ma zajc yaguiajl, ma bayajquil guial bililadxil naj.

Loj hor zii gajc bani lojx dxel zinalix Jesús niz yagaj.