1 Yuguꞌ dza niꞌz guludúb ga zoëꞌ Jesús bunách zian. Le cudë́ le lahuëꞌ, Jesús bulidzëꞌ bönniꞌ usë́d queëꞌ len bë́ꞌlenëꞌ lequëꞌ didzaꞌ. 2 Gudxëꞌ lequëꞌ:

―Ruhuechiꞌ ladxaꞌa bunách zian ni le chnac tsonn dza nacuáꞌlenëꞌ nedaꞌ ni len cutu dë le lahuëꞌ. 3 Chquiꞌ usölaꞌa lequëꞌ lidxquëꞌ taꞌdunzëꞌ caꞌ, hualaꞌcuídiꞌnëꞌ laꞌ nöz, le zaꞌquëꞌ ziꞌtuꞌ laꞌquëꞌ.

4 Gulubiꞌë didzaꞌ bönniꞌ usë́d queëꞌ, tëꞌ Lëꞌ:

―¿Bizxa ugágutsaruꞌ bunách guizx yu ni, ga ni nac latj caꞌz?

5 Gnabnëꞌ lequëꞌ Jesús, rnëꞌ:

―¿Balx yöt xtil dë queëliꞌ?

Tëꞌ Lëꞌ:

―Gadxz.

6 Niꞌr gna béꞌinëꞌ bunách zian naꞌ Jesús laꞌbö́ꞌ lyu. Gdel‑lëꞌë gadx yöt xtil naꞌ atiꞌ gudxëꞌ Dios: “Xclenuꞌ.” Niꞌr buzxuzxjëꞌ leygac len bëꞌë quequëꞌ bönniꞌ usë́d queëꞌ quië laꞌguisiëꞌ laugac bunách zian naꞌ. 7 Gutaꞌ caꞌ quequëꞌ tu chopbaꞌ böl cuidiꞌ. Jesús gudxëꞌ Dios: “Xclenuꞌ”, atiꞌ gna béꞌinëꞌ lequëꞌ laꞌguisiëꞌ lecbaꞌ caꞌ laugac bunách. 8 Glahuëꞌ yúguꞌtë bönniꞌ naꞌ len guluhuöljnëꞌ. Niꞌr gulutubëꞌ le bizxj nagaꞌngac, atiꞌ guladzáꞌ gdu gadx bdöꞌa. 9 Bönniꞌ naꞌ glahuëꞌ glaquëꞌ gdu ca choaꞌ gayuꞌë. Jesús busölëꞌë lequëꞌ lidxquëꞌ 10 atiꞌ grenëꞌ lëꞌi bárcodauꞌ tsazxö́n len yuguꞌ bönniꞌ usë́d queëꞌ, guladxinëꞌ lu xyugac bunách Dalmanuta.

11 Niꞌr guladxinëꞌ ga zoëꞌ Jesús bönniꞌ gdauꞌ fariseo len gulazú lauquëꞌ taꞌdíl‑lenëꞌ Lëꞌ didzaꞌ. Glëꞌnnëꞌ laꞌzíꞌ bëꞌë Jesús. Qui lë ni naꞌ gulanabnëꞌ Lëꞌ gunëꞌ tu le nac bëꞌ zaꞌ yehuaꞌ yubá. 12 Gnëtsca ladxëꞌë Jesús, rnëꞌ:

―¿Bizx quië taꞌnábitsa nedaꞌ bunách ni gunaꞌ tu le nac bëꞌ zaꞌ yehuaꞌ yubá? Le nactë rëpaꞌ lbiꞌiliꞌ, cutu caꞌ gléꞌiliꞌ nitú le nac bëꞌ zaꞌ yehuaꞌ yubá.

13 Niꞌr buláꞌalenëꞌ lequëꞌ, bubenëꞌ lëꞌi bárcodauꞌ len zijëꞌ yetsláꞌa nis zxön.

14 Glal ládxiꞌquëꞌ bönniꞌ usë́d queëꞌ Jesús luꞌë bi lahuëꞌ atiꞌ tuz yöt xtil dë lëꞌi bárcodauꞌ naꞌ. 15 Niꞌr buzéjniꞌnëꞌ lequëꞌ Jesús, rnëꞌ:

―Gul‑sácaꞌtscaꞌ queëliꞌ. Gul‑gún chiꞌi cuinliꞌ cui siꞌliꞌ le nac ca xnëꞌi yöt xtil quequëꞌ bönniꞌ gdauꞌ fariseo len queëꞌ Herodes.

16 Gulazú lauquëꞌ tuꞌë didzaꞌ bönniꞌ usë́d queëꞌ laꞌ légaczëꞌ, taꞌnë́ꞌ:

―Gnëꞌ cni le cudë́ yöt xtil gáguruꞌ.

17 Ráquibeꞌinëꞌ Jesús le taꞌnë́ꞌ, atiꞌ rëꞌ lequëꞌ:

―¿Bizx quië ruiꞌliꞌ cni didzaꞌ le cudë́ yöt xtil gáguruꞌ? ¿Naruꞌ cu réjniꞌtsaliꞌ len cu ráquibeꞌitsaliꞌ? ¿Ni nactsa zid icj ládxiꞌdauꞌliꞌ? 18 ¿Zoatsa yöj lauliꞌ len cutu rléꞌiliꞌ, len zoatsa guid nagliꞌ len cutu ryö́niliꞌ? ¿Naruꞌ cu rajnéytsaliꞌ? 19 Catiꞌ niꞌ buzxuzxjaꞌ gayuꞌ yöt xtil atiꞌ glahuëꞌ chiʉ́n gayuꞌë bönniꞌ, ¿balx bdöꞌa budzaꞌliꞌ le bizxj butubliꞌ?

Gulanë́ꞌ:

―Chinnu.

20 Gnëꞌ caꞌ Jesús:

―Catiꞌ niꞌ buzxuzxjaꞌ gadx yöt xtil atiꞌ glagu choaꞌ gayuáꞌ bunách, ¿balx bdöꞌa budzaꞌliꞌ le bizxj butubliꞌ?

Gulanë́ꞌ:

―Gadx.

21 Niꞌr Jesús gudxëꞌ lequëꞌ:

―¿Naruꞌ cu réjniꞌtsaliꞌ naꞌa, bëꞌa didzaꞌ qui le tuꞌsëdnëꞌ bönniꞌ naꞌ?

22 Catiꞌ guladxinëꞌ yödz Betsaida Jesús len bönniꞌ daꞌquëꞌ Lëꞌ, guladxín ga zoëꞌ Jesús nup djuaꞌgac queëꞌ tu bönniꞌ nachúl lahuëꞌ, táꞌtaꞌyuëꞌ lahuëꞌ canëꞌ bönniꞌ naꞌ. 23 Jesús gdel‑lëꞌë nëꞌë bönniꞌ naꞌ nachúl lahuëꞌ, atiꞌ bchëꞌë lëꞌ niꞌl raꞌ yödz. Niꞌ bdxiëꞌ zxönaꞌ yöj lahuëꞌ len bxoa nëꞌë lëꞌ. Niꞌr gnabnëꞌ lëꞌ, rnëꞌ:

―¿Ba rléꞌinuꞌ latiꞌ?

24 Buyúëꞌ bönniꞌ naꞌ nachúl lahuëꞌ, rnëꞌ:

―Rléꞌigacdaꞌ bunách, nalaꞌgac ca yuguꞌ yag, san taꞌdá bunách naꞌ.

25 Leyúbl bxoa nëꞌë yöj lahuëꞌ Jesús, atiꞌ buyutsquëꞌ bönniꞌ naꞌ nachúl lahuëꞌ atiꞌ böactë dxíꞌadauꞌ yöj lahuëꞌ. Naꞌa rléꞌinëꞌ dxíꞌadauꞌ yúguꞌtë. 26 Niꞌr Jesús busölëꞌë lëꞌ lidxëꞌ, rnëꞌ:

―Cutu tsajdöduꞌ lahuiꞌ yödz, len nutu nu guiꞌu caꞌ lu yödz ni.

27 Gdöd naꞌ, guluzë́ꞌë niꞌ Jesús len yuguꞌ bönniꞌ usë́d queëꞌ, guladödëꞌ yödzdauꞌ nababgac Cesarea, ga naꞌ rna bëꞌë Filipo. Tsal niꞌ yuꞌuquëꞌ nöz, Jesús gnabi yudxëꞌ bönniꞌ usë́d queëꞌ, rnëꞌ:

―¿Bizxa taꞌná quiaꞌ bunách nu nacaꞌ?

28 Gulubiꞌë didzaꞌ, taꞌnë́ꞌ:

―Taꞌná laꞌgac bunách nacuꞌ Juan, bönniꞌ buquilëꞌ bunách nis. Taꞌná yelaꞌgac nacuꞌ Elías, bönniꞌ niꞌ bëꞌë didzaꞌ uláz queëꞌ Dios. Taꞌná yelaꞌgac nacuꞌ yetúëꞌ bönniꞌ bëꞌë didzaꞌ uláz queëꞌ Dios dza niꞌtë.

29 Niꞌr gnabnëꞌ lequëꞌ Jesús, rnëꞌ:

―Nazx lbiꞌiliꞌ, ¿bizxa rnaliꞌ quiaꞌ nu nacaꞌ?

Bubiꞌë didzaꞌ Pedro, rnëꞌ:

―Liꞌ nacuꞌ Cristo.

30 Niꞌr gna béꞌinëꞌ lequëꞌ Jesús nutu nu laꞌguíxjöiꞌnëꞌ nu naquëꞌ.

31 Niꞌr gzu lahuëꞌ Jesús rusëdnëꞌ bönniꞌ daꞌquëꞌ Lëꞌ, rnëꞌ:

―Run bayúdx sacaꞌ quiꞌa nedaꞌ, Bönniꞌ Nuhuöaquëꞌ Gdu Bunách. Luzóëꞌ nedaꞌ tslaꞌl bönniꞌ gul tuꞌzejniꞌi len yuguꞌ bxuz uná bëꞌ len bönniꞌ gdauꞌ tuꞌsëdi. Ludöddëꞌ nedaꞌ, san catiꞌ gac tsonn dza ubanaꞌ.

32 Yalj lulu bë́ꞌlenëꞌ lequëꞌ didzaꞌ ni. Niꞌr bchëꞌë Jesús tslaꞌl Pedro len gzu lahuëꞌ rdil‑lëꞌ Lëꞌ didzaꞌ. 33 Bueycjëꞌ Jesús, buyúëꞌ yezícaꞌrëꞌ bönniꞌ usë́d queëꞌ, atiꞌ buzeynëꞌ bach Pedro, rnëꞌ:

―Bcuit ga zoaꞌ. Nacuꞌ ca Satanás, tuꞌ xöhuiꞌ. Le rzaꞌ ladxuꞌu cutu nac queëꞌ Dios, san ca taꞌzáꞌ ládxiꞌgac bunách nac.

34 Niꞌr Jesús bulidzëꞌ yuguꞌ bönniꞌ usë́d queëꞌ lencaꞌ bunách nacuáꞌ niꞌ, len gudxëꞌ lequëꞌ:

―Chquiꞌ rëꞌnnëꞌ tëꞌë nedaꞌ bönniꞌ, ral‑laꞌ uzóëꞌ tslaꞌl le rëꞌncznëꞌ bönniꞌ naꞌ, len gaquëꞌ ca bönniꞌ zijëꞌ zajtë́ꞌë lëꞌi yag cruz, atiꞌ niꞌr huac tëꞌë nedaꞌ. 35 Nu bönniꞌ ruiꞌtsca ladxëꞌë yöl‑laꞌ naꞌbán queëꞌ, unitiëꞌ lei, san nu bönniꞌ unitiëꞌ yöl‑laꞌ naꞌbán queëꞌ le dëꞌë nedaꞌ o le dëꞌë didzaꞌ dxiꞌa quiaꞌ, uguel‑lëꞌë bönniꞌ ni yöl‑laꞌ naꞌbán queëꞌ. 36 ¿Naruꞌ uziꞌtsëꞌ xbey bönniꞌ chquiꞌ utubëꞌ yúguꞌtë le dë yödzlyú ni, san unít cuinëꞌ? 37 Cutu bi gac unödzjëꞌ bönniꞌ le huöaꞌui cuinëꞌ. 38 Chquiꞌ zoëꞌ bönniꞌ rutuiꞌnëꞌ nedaꞌ len xtidzaꞌa laugac bunách ni nucaꞌngac Dios len tun dul‑laꞌ, lëzcaꞌ cni nedaꞌ, Bönniꞌ Nuhuöaquëꞌ Gdu Bunách, utuiꞌdaꞌ bönniꞌ naꞌ catiꞌ guídlenaꞌ yöl‑laꞌ yeníꞌ queëꞌ Xuzaꞌ, dzagquëꞌ nedaꞌ gbaz laꞌy.