1 Nazrí'ida' Lue', Xran.

Lue' dxuzé̱ chuchu' neda'.

2 Lue', Xran, nacu' ca tu xiaj naga ze̱ chúchua',

ne ca tu xu'u zren naga xu'u chawa', na' nacu' weselá chia'.

Dios chia', Lue' dxuzé̱ chuchu' neda', na' guxrén lazra' Lue'.

Dxucu'uju' neda', ne dxuseláu' neda', ne dxucache chawu' neda'.

3 Wanné̱queza' Xránadxu Dios,

Le̱' guselé̱' neda' lu na' benne' ca' dxeledábague̱' neda'.

4 Guzúa' lu da ste̱be chee̱ xel-la' gute,

na' guca da cale̱la ca tu xe̱gu nisa da bchebe na neda'.

5 Guzúa' lu da ste̱be chu'a lataj ba xa'

lawe' da zua' lu da ste̱be chee̱ xel-la' gute.

6 Lu da zi' da xa' bláwizra' Xrana' Dios, ne gunné̱queza' Dios chia'.

Le̱' benne̱' chi'a naga zue̱' lataj lá'azxa chee̱',

7 Nadxa guzrú' lu xe̱zr la xu nigá.

Gulezrize lane xi'a ca'.

Gulezrízele̱'e̱ na lawe' da bzra'a Le'.

8 Bdxuaj zren chee̱ xi' lu zrine̱',

ne bdxuaj xi' lu dxu'e̱ da bzezxe na da de̱ lawe̱',

9 Bzéxruje̱' da zria zran xabáa, na' bétaje̱',

na' guzúa da chul-la zran ni'e̱.

10 Gudée̱' lu be' zrie̱' tu da nazí le na querubín.

Chadí gudée̱' lu be' bdunu'.

11 Gúcue̱' da chul-la, da bcache na Le̱',

da na' naca na beuj bza da xuzru na nisa.

12 Lu da dxácatite legala chee̱' da xu'u lu beuj bza,

na' beledxúaj bau dxelala, ne xiaj bezxe'.

13 Zran xabáa gunné̱ guziu' chee̱ chi'i Xránadxu,

na' ben chi'i Dios szrente̱ ládujla bau dxelala ca',

14 Bsane̱' xaga nalá xéche'ze chee̱' ca',

na' be̱se dínnaje̱' benne' ca' dxeledábague̱' neda'.

Bsane̱' xesa guziu' ca', ne bzria xi'e̱ benne' ca'.

15 Nadxa belelá' da zaj de̱ lu situj chee̱ nísadau',

ne ble'e lau lane xe̱zr la xu da zua na zran nísadau',

gate na' gudil-lu' benne' ca' dxeledábague̱' neda', Xran,

ne lu xel-la' dxezrá'a chiu' bzagu' benne' ca'.

16 Bétaje̱' lu da sibe, ne bequé̱'e̱ neda'.

Bebéaje̱' neda' lu da naca ca tu nisa zila.

17 Bselé̱' neda' lu na' benne' wal-la dxeledábague̱' neda',

ne lu na' benne' ca' dxelecuídene̱' neda',

benne' zaj nácadxe̱' wál-la ca neda'.

18 Buluzague̱' neda' gate na' zua' lu da sté̱bele̱'e̱,

san Xrana' Dios gúcale̱ne̱' neda'.

19 Bebéaje̱' neda' naga xu'a, ne bzue̱' neda' tu lataj zren.

Bselé̱' neda' lawe' da bezaca ba lazre̱' chia'.

20 Xránadxu Dios bexunne̱' chia' cáte̱ze naca

Cáte̱ze naca da xrlátaje da nuna' bexunne̱' chia'

21 lawe' da dxuna' ca da dxuse̱de Xrana' neda',

ne quebe guleaj xíchaja' Dios chia'.

22 Dxuna' ca naca da dxenná bé'ene̱' neda',

ne quebe bsana' da ca' nadxíxruj be'e̱.

23 Guca' li lazre' lau Le̱',

ne bxue cuina' chee̱ quebe guna' da cale̱la.

24 Chee̱ le̱ na' bexunna Xránadxu Dios chia'

cáte̱ze naca da xrlátaje da be̱na',

cáte̱ze naca da xrlátaje da nuna' lau Le̱'.

25 Dxexache lazru' chee̱ benne' dxexache lazre̱' le sa' ljwezre̱',

ne nacu' li lazre' nen benne' naque̱' li lazre'.

26 Dxunu' da naca chawe' chee̱ benne' naque̱' chawe',

na' gacu' snia nen benne' we̱n da cale̱la.

27 Guseláu' benne' zaj zue̱' lu da zi' da xa',

san guzéxruju' benne' dxulucá'ana szren cuine̱'.

28 Lué'queze guzalju' xi' chia'.

Xrana' Dios, guzani'u chia' naga zua' lu da chul-la.

29 Nen xel-la' waca chiu' guzría xi'a benne' zante̱

Che Lue', Dios, súale̱nu' neda'

waca guchínnaja' ze'e da zaj naxechaj xe̱zre ca'.

30 Li lazre' zaj naca da dxun Dios, na' du lazre' naca xrtizre̱'.

Dxucu'uje̱' xúgute̱ benne' ca' dxelebeza lazre̱' Le̱'.

31 Tuze Xránadxu naque̱' Dios.

Tuze Dios chee̱dxu naque̱' Benne' dxucu'uje̱' dxi'u.

32 Dios naque̱' Bénnea' dxune̱' neda' benne' wal-la,

ne Benne' dxune̱' li lazre' da dxuna' neda'.

33 Dxune̱' ni'a ca zaj naca ni'a bzrina' xixre'

ne dxuzúa chúchue̱' neda' lu xi'a Sión chee̱'.

34 Dxusé̱dene̱' neda' chee̱ gaca cha'a lu wedil-la,

ne̱ chee̱ gaca guchíneda' xaga nalá xéche'ze

35 Lu xel-la' weselá chiu' bcu'uju' neda',

ne nen na'u xabe̱la gúcale̱nu' neda'.

Xel-la' zri'i lazre' chiu' ba nucá'ana szren na neda'.

36 Be̱n chawu' neza naga tea',

chee̱ quebe cuila' lu neza na'.

37 Blaga' benne' dxeledábague̱' neda', na' xeajzrena' le̱',

na' quebe bebi'a cadxa bé̱tetea' benne' ca'.

38 Be̱na' benne' ca' we̱', na' quebe guca xelexase̱'.

Xeajlecházie̱' zran ni'a.

39 Btipu' lazra' chee̱ cha'a lu wedil-la.

Bzéxruju' benne' dxeledábague̱' neda' zran ni'a.

40 Be̱nu' buluzrunnuj benne' dxeledábague̱' neda' lawa',

chee̱ bzria xi'a benne' ca' dxelecuídene̱' neda'.

41 Gulenné̱' nu benne' gácale̱ne̱' le̱' san quebe nu chilá'.

Gulenné̱' Xránadxu Dios, san quebe benne̱' chee̱'.

42 Bzúzruja' benne' ca' ca bxrte xu da dxua be'.

Bléaja' le̱' ca dxuléaja' guna' la neza ca'.

43 Bseláu' neda' lu na' benne' ca' dxeledábague̱',

na' be̱nu' neda' benne' xíchaje̱ xe̱zr la xu ca',

na' benne' ca' quebe núnbe'a dxelune̱' zrin chia'.

44 Gate belenne̱' chia', na' buluzúe̱' xrtizra'.

Benne' zaj zra' xe̱zr la xu ca' belune̱' ca gunná be'eda'.

45 Benne' zitu' ca' gulate ni'a ne̱'e̱,

na' beledxúaje̱' dxelezrízie̱' lu xe̱zre zrentau' chee̱' ca'.

46 Gaca ba lá'azxa Xránadxu Dios.

Gaca ba Bénnea' dxucu'uje̱' neda'.

Xegá'ana szrénqueze Dios, Bénnea' dxuselé̱' neda'.

47 Naca Dios Bénnea' dxebéaj lazre̱' benne' dxeledábague̱' neda',

ne dxuzúe̱' benne' ca' zran ni'a.

48 Naque̱' Bénnea' dxuselé̱' neda' lu na' benne' ca'

Dxune̱' dxenná be'eda' benne' ca' guledábague̱' neda'.

Bselé̱' neda' lu na' benne' xichaj zra'a ca'.

49 Chee̱ le̱ na' xeche̱ba' chiu', Xran, lau benne' xe̱zr la xu ca',

na' gúl-laqueza' chee̱ Lau' Lue'.

50 Dxun Dios dxenná bea bénnea' waláz chee̱',

ne dxexache lazre̱' bénnea' guqué̱'e̱, bénnea' naque̱' David,

ne zri'ine zre sue̱' chadía chacanna.