Salmos.
119.
Ba neza zrente̱ naca na chee̱ benne' ca' tu dxelúnzqueze̱' da naca du lazre', benne' ca' tu dxelúnzqueze̱' ca dxenná da bdxixruj bea Xránadxu Dios. 
Ba neza zrente̱ naca na chee̱ benne' ca' tu dxelúnzqueze̱' ca dxuse̱de dizra' chee̱' dxi'u, na' dute̱ xichaj lázrdawe̱' dxuluzúe̱' dizra' chee̱'. 
Benne' caní québequeze dxelune̱' da zrinnaj, benne' ca' tu dxelúnzqueze̱' ca dxenná Dios dxal-la' xelune̱'. 
Lue', Xran, bsízrenu' netu' chee̱ gun xánnentu' ca zaj naca da bdxixruj be'u Lue'. 
Dxaca lázrele̱'a tu gúnzqueza' ca zaj naca xrba chiu'. 
Nadxa québequeze xedué'eda', na' cue'a gunne xue guna' xúgute̱ da bdxixruj be'u. 
Dute̱ xel-la' li lazre' chia' güe lá'ana' Lue' gate ba nusé̱dia' da ca' nuchi'u chee̱ntu', da zaj naca na xrlátaje. 
Tu gúnzqueza' ca da dxenná be'u. Québequeze cueaj xíchaju' neda'. 
¿Ájala gun benne' cuide' gunbe' da naca na xrlátaje? Dxal-la' tu gúnzquezebe' ca dxenná xrtizru'. 
Dute̱ xichaj lázrdawa' dxuna' ba xuzre guna' da dxennáu' Lue'. Quebe gu'u lataj guzúa' chalá'ala ca da bdxixruj be'u. 
Lu xichaj lázrdawa' tu dxúnzqueza' ca da dxennáu' Lue' chee̱ quebe guna' dul-la tábaga' Lue'. 
Ba lá'azxa nacu' Lue', Xrana' Dios. Bsé̱de neda' da ca' dxenná be'u. 
Nen dxú'aqueza' ba bzenda' bénneache ca zaj naca da ca' nuchi'u chee̱ntu'. 
Dxebéle̱'e̱dxeda' tu dxúnzqueza' ca dxuse̱de dizra' chiu' netu', quez ca dxelebé benne' ca' dé̱le̱'e̱ xel-la' gunní'a chee̱'. 
Gulaba lazra' ca zaj naca da bdxixruj be'u Lue', ne nna' xánnia' ca dxennáu' dxal-la' guntu'. 
Béle̱'e̱da' guna' ca da dxenná be'u, ne quebe gal-la lazra' ca zaj naca xrtizru'. 
Be̱n gaca chawe' chia' neda', we̱n zrin chiu', na' gaca bana', ne tu gúnzqueza' ca naca xrtizru'. 
Gusalaj xiaj lawa' chee̱ nna'a da zrente̱ ca' da zaj zua na lu da bdxixruj be'u. 
Naca' ca tu benne' dxedaze̱' lu xe̱zr la xu nigá. Be̱n chéajni'ida' da dxenná da bdxixruj be'u. 
Dxedú lazra' lawe' da tu chí'izqueze dxezá lazra' guna' da ca' nuchi'u chee̱ntu'. 
Gudil-lu' benne' ca' dxulucá'ana szren cuine̱', benne' we̱n da cale̱la ca', benne' ca' dxuluzúe̱' chalá'ala da bdxixruj be'u. 
Quebe gu'u lataj nu benne' nne̱' schanni' chia', na' quegá gucá'ana dítaje̱' neda' lawe' da tu dxúnzqueza' ca dxusé̱denu' netu'. 
Cá'anqueze benne' dxelenná bea ca' gulenné̱' chia'. Neda', we̱n zrin chiu', blaba lazra' ca zaj naca xrba chiu'. 
Dxezaca ba lázrele̱na' da dxuse̱de dizra' chiu' netu'. Dxuluzéajni'i na neda'. 
Zua bénne'du xu'a lu da ste̱be chee̱ xel-la' gute. Be̱n dipa xichaj lázrdawa' nen xrtizru'. 
Ble'eda' Lue' ca zaj naca da dxuna', na' bezi'u neda'. Bse̱de neda' ca zaj naca xrba chiu'. 
Be̱n chéajni'ida' ca gaca guna' ca bdxixruj be'u chee̱ gulaba lazra' ca zaj naca da zrente̱ ca' da be̱nu'. 
Dxedú lazra' lawe' da dxewí'ine lázrele̱'a. Be̱xru chacha neda' ne̱ chee̱ xrtizru'. 
Quebe gu'u lataj guna' da naca na we̱n lazre'. Lu xel-la' dxexache lazre' chiu' bse̱de neda' da bdxixruj be'u. 
Bechugu lazra' guna' da naca li lazre', na' dxe'a gunne xue guna' da ca' nuchi'u chee̱ntu'. 
Tu dxúnzqueza' ca dxuse̱de dizra' chiu' netu'. Xran, quebe guzú' neda' lu xel-la' stu'. 
Tu gúnzqueza' ca bdxixruj be'u, gate guzéajni'idxenu' neda'. 
Xran, bse̱de neda' chee̱ guna' ca naca xrba chiu', na' tu gúnzqueza' ca naca na ca zrindxa zra cheajsé̱ chia'. 
Bzéajni'i neda', na' tu gúnzqueza' da bdxixruj be'u, na' dute̱ lázrdawa' guna' ca naca na. 
Ble'e neda' chee̱ guna' da bdxixruj be'u, lawe' da dxaca lázrequeza' guna' ca dxenná na. 
Be̱n sa lazra' guna' ca dxuse̱de dizra' chiu' netu', chee̱ quebe gaca' benne' wecude. 
Quebe gu'u lataj gucá'ana szrena' bedáu' xia xaga ca'. Be̱n dipa xichaj lázrdawa' chee̱ guna' ca dxenná xrtizru'. 
Be̱n ca dxenná xrtizru' da guche̱be lazru' chia' neda', we̱n zrin chiu', chee̱ zreba' Lue'. 
Bde chalá'ala dizra' schanni' da dxelenné̱' chia', da na' dxezreba', lawe' da xrlátaje zaj naca xrba chiu'. 
Dxezá lazra' guna' da bdxixruj be'u. Be̱n dipa xichaj lázrdawa' nen da xrlátaje chiu'. 
Gudá xexache lazru' neda', Xrana' Dios. Gudá guseláu' neda', ca ba guche̱be lazru' gunu'. 
Beche̱ba' lau bénnea' dxusi'e̱ neda' xel-la' stu', gunnía': Dxuxrén lazra' xrtizra' Xrana' Dios. 
Be̱n tu séquezda' guchálaja' dizra' li lazre' chiu', lawe' da dxebeza lazra' da ca' dxuchi'u chee̱ntu'. 
Tu gúnzqueza' ca dxenná da bdxixruj be'u. Guna' na tu chí'izqueze, ne chadía chacanna. 
Láqueza' neda' lawe' da dxe'a gunne xue guna' ca bdxixruj be'u. 
Guchálajqueza' ca dxuse̱de dizra' chiu' netu' lau benne' wenná bea ca', na' québequeze xedué'eda'. 
Wabéle̱'e̱quezda' guna' ca bdxixruj be'u, da ca' nazrí'ile̱'e̱da'. 
Dxeche̱be lazra' guna' ca bdxixruj be'u, da nazrí'ida', na' gulaba lazra' ca naca xrba chiu'. 
Bsa lazre' da guche̱be lazru' chia' neda', we̱n zrin chiu', da na' be̱nu' dxebeza lazra'. 
Gate na' guzaca zi'a, guzúa tu da bexúe zren na neda' lawe' da be̱n dipa xrtizru' xichaj lázrdawa'. 
Benne' dxulucá'ana szren cuine̱' belún lale̱' chia' neda', san québequeze gusana' da dxenná da bdxixruj be'u. 
Xeajsá lazra' da bchi'u chee̱ntu' nédxudaute̱, Xran, na' bexaca zrena'. 
Nen dute̱ xel-la' dxezrá'a guzúa' lu da ste̱be ne̱ chee̱ benne' ca' dxelune̱' da zrinnaj, benne' ca' dxuluzúe̱' chalá'ala da bdxixruj be'u. 
Xrba chiu' ca' gulaca na chia' ca tu da dxul-la' gate na' zua' tu xe̱zr la xu zitu'. 
Chizrela xeajsá lazra' lau' Lue', Xrana' Dios, na' tu bénzqueza' ca dxenná da bdxixruj be'u. 
Lu da ba neza caní guzúa' lawe' da tu bé̱nzqueza' ca zaj naca da bdxixruj be'u. 
Da dxezá lazra' nácaquezu' Lue', Xrana' Dios. Ba gunnía' tu gúnzqueza' ca naca xrtizru'. 
Dute̱ lázrdawa' dxenaba' Lue' xidu' gácale̱nu' neda'. Bexache lazre' neda' ca ba gunnáu' gunu'. 
Gunná' xannia' ca zaj naca da dxuna', na' xecha lasa dxuna' ca dxuse̱de dizra' chiu' netu'. 
Be̱na' ba xuzre, ne quebe guzreda' chee̱ tu gúnzqueza' ca bdxixruj be'u. 
Xralaj chee̱ benne' ca' dxelune̱' da cale̱la zaj nuchele̱ na neda', san quebe ne gal-la lazra' ca dxenná da bdxixruj be'u. 
Dxe̱la dxasa' chee̱ güe lá'ana' Lue' lawe' da xrlátaje zaj naca da ca' dxuchi'u chee̱ntu'. 
Naca' tuze nen xúgute̱ benne' ca' dxelezrebe̱' Lue', benne' ca' tu dxelúnzqueze̱' da bdxixruj be'u. 
Xrana' Dios, dxezrín dute̱ xe̱zr la xu xel-la' dxexache lazre' chiu'. Bse̱de neda' chee̱ guna' ca dxenná xrba chiu'. 
Ba be̱nu' guca chawe' chia' neda', we̱n zrin chiu'. Xran, be̱nu' na cáte̱ze dxenná xrtizru'. 
Bse̱de neda' chee̱ gueque be'eda' da naca xrlátaje, ne chee̱ chéajni'ida' lawe' da dxéajle̱'a da bdxixruj be'u. 
Nédxula ca bzéxruju' neda' gudéa' chalá'ala, na' na'a tu dxúnzqueza' ca dxenná xrtizru'. 
Nacu' xrlátaje, ne dxunu' gaca chawe' chee̱ntu'. Bse̱de neda' guna' ca naca xrba chiu'. 
Benne' dxulucá'ana szren cuine̱' gulenné̱' chia' da we̱n lazre' san dute̱ lázrdawa' tu gúnzqueza' ca bdxixruj be'u. 
Quebe xu'u xel-la' dxéajni'i lázrdau benne' ca'. Neda' dxezaca ba lázrele̱na' da dxenná da bdxixruj be'u. 
Chawe' naca bzéxruju' neda' chee̱ gusé̱dia' guna' ca naca xrba chiu'. 
Cháwedxa naca da bdxixruj be'u chia' neda' quez ca gaxúa gaxúane dumí oro, ne plata. 
Nen ná'quezu' be̱nu' neda' cáte̱ze naca'. Bzéajni'i neda' chee̱ gusé̱dia' guna' ca bdxixruj be'u. 
Benne' dxelezrebe̱' Lue' xelelé'ene̱' neda'. Xelebene̱' lawe' da dxebeza lazra' gaca ca dxenná xrtizru'. 
Xran, ba nézquezda' xrlátaje naca da dxuchi'u chee̱ntu', na' lu dute̱ xel-la' li lazre' chiu' bsaca zi'u neda'. 
Lu dute̱ xel-la' dxexache lazre' chiu' bexúe zren neda' cáte̱ze dxenná da guche̱be lazru' chia' neda', we̱n zrin chiu'. 
Bexache lazre' neda' chee̱ gaca bana' lawe' da dxezaca ba lázrele̱na' da bdxixruj be'u. 
Be̱n xelexedué'e benne' ca' dxulucá'ana szren cuina lawe' da gulenné̱' schanni' chia', ne quebe bi bena' chee̱'. Neda' gulaba lazra' ca da bdxixruj be'u. 
Be̱n xelexelá' benne' ca' dxelezrebe̱' Lue', chee̱ xelenne̱' chia', na' xulusé̱die̱' da dxuse̱de dizra' chiu' netu'. 
Be̱n gaca' du lazre' ca naca xrba chiu' chee̱ québequeze xedué'eda'. 
Zua bénne'du xu'a lu da ste̱be lawe' da dxebeza' xidu' guseláu' neda', na' dxebeza lazra' gaca ca dxenná xrtizru'. 
Dxezé̱ bxrinne xiaj lawa' lawe' da dxezá lazra' xrtizru', dxennia': ¿Bátaqueze xexúe zrenu' neda'? 
Dxebizra' ca tu buzude xide ze̱ na lu zren, san quebe dxal-la lazra' guna' ca dxenná xrba chiu'. 
¿Bal-la zra gaca bana' neda', we̱n zrin chiu'? ¿Bátaqueze gudéu' lu da ba xa' benne' ca' dxeláu zi' xuzre̱' neda'? 
Benne' dxulucá'ana szren cuine̱' gule̱ne̱' tu xe̱dxu naga cheajcházia'. Québequeze dxelune̱' ca dxenná da bdxixruj be'u. 
Da líqueze zaj naca xúgute̱ da bdxixruj be'u. Gúcale̱ neda' lawe' da dxeláu zi' xuzre̱' neda', ne quebe bi nuna' chee̱'. 
Xeláteze la belutie̱' neda', san quebe ne gusana' guna' ca bdxixruj be'u. 
Lu xel-la' dxexache lazre' chiu' be̱n dipa xichaj lázrdawa', chee̱ tu gúnzqueza' ca dxuse̱de dizra' chiu' netu'. 
Xrana' Dios, tu chí'izqueze zua xrtizru' xabáa na'la. 
Xel-la' li lazre' chiu' sua na chee̱ xúgute̱ bénneache. Lue' bzua chúchuquezu' xe̱zr la xu, na' zúaqueze na. 
Ne̱ chee̱ da gunnáquezu' zaj nnita xúgute̱ da de̱, na' xúgute̱ da ca' dxelún na zrin chiu'. 
La quebe bezaca ba lázrele̱na' da bdxixruj be'u bache benítia' lu da guzaca zi'a. 
Cabátaqueze gal-la lazra' da bdxixruj be'u lawe' da ne̱ chee̱ da ca' ba btipu' lazra'. 
Chiu' Lue' naca' neda'. Bselá neda', lawe' da dxuna' ba xuzre guna' ca bdxixruj be'u. 
Benne' dxelebéaj xichaj Dios gulenné̱'e̱ neda' chee̱ xuluzría xi'e̱ neda', san neda' dxulaba lazra' ca dxuse̱de dizra' chiu'. 
Dxelé'equezda' dxeajsé̱ chee̱ xúgute̱ da de̱ lu xe̱zr la xu, san da bdxixruj be'u Lue' québequeze cheajsé̱ chee̱ na. 
Dios, nazrí'ile̱'e̱da' da bdxixruj be'u. Du zra dxulaba lazra' ca naca na. 
Ne̱ chee̱ da bdxixruj be'u nunu' nácadxa' sina ca benne' ca' dxeledábague̱' neda' lawe' da tu zúale̱zqueze da bdxixruj be'u neda'. 
Dxéajni'idxeda' ca benne' ca' dxulusé̱dene̱' neda' lawe' da dxulaba lazra' ca dxuse̱de dizra' chiu' neda'. 
Ba guxéajni'idxeda' ca benne' gula ca' lawe' da tu dxúnzqueza' ca dxenná da bdxixruj be'u. 
Be̱na' ba xuzre quebe bi da cale̱la guna' chee̱ tu gúnzqueza' ca dxenná xrtizru'. 
Quebe bsana' dxuna' da ca' nuchi'u chee̱ntu' lawe' da Lué'queze bsé̱denu' neda'. 
Xrtizru' naca na ca tu da zíxrele̱'e̱ lu dxu'a. Nácadxa na zixre ca bzrína'dau' lu dxu'a. 
Ne̱ chee̱ da bdxixruj be'u naca' benne' sina. Chee̱ le̱ na' dxecuídeda' xúgute̱ da we̱n lazre'. 
Ca tu xi' naca xrtizru' naga dxedá', da dxusení na neza xu'a. 
Bzétaja' Dios, ne guche̱be lazra' tu gúnzqueza' ca nuchi'u chee̱ntu' da naca na xrlátaje. 
Dxezaca zí'le̱'a. Xrana' Dios, btipa lazra' cáte̱ze guche̱be lazru' gunu'. 
Xrana' Dios, dxata' xueda' Lue' si'u da dxue lá'ana' Lue', ne gusé̱denu' neda' guna' ca nuchi'u chee̱ntu'. 
Tu zúazqueza' lu da ste̱be chee̱ xel-la' gute, san québequeze ne gal-la lazra' guna' ca bdxixruj be'u. 
Benne' dxelebéaj xichaj Dios buluzale̱' xralaj da que̱la na neda' san neda' quebe bsana' dxuna' ca bdxixruj be'u. 
Ba gucá'a da dxuse̱de xrtizru' neda' chee̱ gaca na da gápaqueza' chadía chacanna lawe' da zaj naca xrtizru' da dxezaca ba lázrele̱'a. 
Zúate̱queze lázrdawa' guna' ca zaj naca xrba chiu' tu chí'izqueze, ca zrindxa zra cheajsé̱ chia'. 
Dxecuídeda' benne' ca' dxelune̱' láweze da xrlátaje, san nazrí'ida' da dxenná da bdxixruj be'u. 
Nacu' Lue' ca tu xu'u naga zua chawa', ne ca tu da dxucu'uj na neda', lawe' da dxebeza lazra' gaca na ca dxenná xrtizru'. 
Le gucuasa naga zua', le'e, benne' we̱n da cale̱la, lawe' da tu gúnzqueza' ca bdxixruj bea Dios chia'. 
Bze̱ chacha neda' cáte̱ze dxenná xrtizru', na' gaca bana', ne quebe xedué'eda' chee̱ da na' dxebeza lazra'. 
Bze̱ chacha neda', na' la', ne tu xezaca ba lázrezqueza' ca naca xrba chiu'. 
Bchuchu bléaju' xúgute̱ benne' ca' bulusane̱' ca naca xrba chiu' lawe' da we̱n lazre' naca xel-la' sina chee̱ benne' ca'. 
Ca be̱be bzria xi'u xúgute̱ benne' ca' dxelebéaj xíchaje̱' Lue' lu xe̱zr la xu nigá. Chee̱ le̱ na' nazrí'ida' da dxuse̱de dizra' chiu' netu'. 
Dxezrize be̱la' dxen chia' lawe' da dxezreba' Lue', ne dxezreba' da dxuchi'u chee̱ntu' da naca na xrlátaje. 
Ba be̱na' ca da nuchi'u chee̱ntu', ne ca naca da xrlátaje. Quebe gudéu' neda' lu na' benne' ca' dxuluchínene̱' neda'. 
Guche̱be lazre' chia' gunu' gaca chawe' chia'. Quebe gu'u lataj benne' ca' dxulucá'ana szren cuine̱' xuluchínene̱' neda' xadía. 
Guzé̱ bxrinne xiaj lawa' lawe' da dxebeza' xidu' guseláu' neda', ne guchi'u chee̱ntu' ca dxenná xrtizru'. 
Dute̱ xel-la' dxexache lazre' chiu' be̱n gaca chawe' chia' neda', we̱n zrin chiu', ne bse̱de neda' guna' ca naca xrba chiu'. 
Naca' we̱n zrin chiu'. Bzéajni'i neda' chee̱ gúnbe'a da dxuse̱de dizra' chiu' netu'. 
Xrana' Dios, ba bzrin zra bi gunu', lawe' da ba buluzúe̱' chalá'ala da bdxixruj be'u. 
Chee̱ le̱ na' neda' nazrí'idxeda' da bdxixruj be'u Lue' quézcala oro, ne quézcala galega oro. 
Chee̱ le̱ na' dxéqueda' zaj nácadxa li lazre' da bdxixruj be'u ca xúgute̱ da de̱, na' dxecuídeda' xúgute̱ da zaj naca na da we̱n lazre'. 
Dxebánentu' ca dxuse̱de dizra' chiu' netu'. Chee̱ le̱ na' du lazra' tu dxúnzqueza' ca dxenná na. 
Gate nu dxuzájla'a ca naca xrtizru', dxusaní na. Dxun na dxeléajni'i benne' dxexruj lazre' ca'. 
Guxá dxu'a, ne gucá'a lazra' lawe' da dxezá lazra' gúnbe'a da bdxixruj be'u. 
Gunná' neda', ne bexache lazre' neda', ca tu dxúnzquezu' chee̱ benne' ca' zaj nazrí'ine̱' Lue'. 
Be̱n tu gúnzqueza' ca dxenná xrtizru', ne quebe gu'u lataj da zrinnaj nna be'e na neda'. 
Bselá neda' lu na' benne' xichaj zra'a ca', na' tu gúnzqueza' ca dxenná da bdxixruj be'u. 
Be̱n gaca chawe' chia' neda', we̱n zrin chiu', ne bse̱de neda' guna' ca zaj naca xrba chiu' ca'. 
Nisa gudxezra' guca na ca tu xe̱gu nisa lawe' da quebe dxelún bénneache ca bdxixruj be'u. 
Xrana' Dios, xrlátaje nacu' Lue', ne li lazre' naca ca dxuchi'u chee̱ntu'. 
Da dxuse̱de dizra' chiu' netu', da na' bzu' lu na'ntu', naca na da li, ne da li lazre'. 
Dxedú lazra' lawe' da dxé'le̱'a gunne xue lawe' da gulal-la lazre' benne' ca' dxeledábague̱' neda' ca zaj naca xrtizru'. 
Du lázrele̱'e̱ naca xrtizru', na' nazrí'ida' neda' na, naca' we̱n zrin chiu'. 
Dxexruj lazre' naca', na' dxuluzúe̱' neda' chalá'ala, na' quebe ne gal-la lazra' da bdxixruj be'u. 
Tu chí'izqueze zua da dxuchi'u chee̱ntu', na' da li naca da bdxixruj be'u. 
Da dxezaca zi'a, ne da ste̱be zua' zaj nuchuchuj na neda', san dxezaca ba lázrele̱na' da bdxixruj be'u. 
Tu chí'izqueze naca li lazre' da dxuse̱de dizra' chiu'. Bzéajni'i neda', na' gaca bana'. 
Dute̱ lázrdawa' dxuláwizra' Lue', Xrana' Dios. Be̱n gaca chawe' chia', na' tu gúnzqueza' ca dxenná xrba chiu'. 
Dxuláwizra' Lue'. Bselá neda', na' tu gúnzqueza' ca dxuse̱de dizra' chiu' netu'. 
Bálala dxasa', na' dxuláwizra' Lue'. Dxebeza lazra' gaca ca dxenná xrtizru'. 
Dxenná'aza' bedú xe̱la, chee̱ gulaba lazra' da bdxixruj be'u. 
Dute̱ xel-la' dxexache lazre' chiu' bene chi'a. Xrana' Dios, da bchi'u chee̱ntu' btipa lazra'. 
Benne' dxeláu zi' xuzre̱' neda' ba zaj zre̱'e̱ xelune̱' chia' da cale̱la. Zaj nusane̱' da dxenná da bdxixruj be'u. 
Xrana' Dios, zu' Lue' gagu naga zua', ne da li zaj naca xúgute̱ da bdxixruj be'u. 
Gate nate ba núnbe'a da dxuse̱de dizra' chiu' netu', da na' nuzú' chee̱ntu' tu chí'izqueze. 
Gunná' xque ca dxezaca zi'a, ne bselá neda' lawe' da quebe ne gal-la lazra' da dxenná da bdxixruj be'u. 
Beche̱be waláz chia', ne bexa'u neda'. Btipa lazra' nen xrtizru'. 
Sté̱bele̱'e̱ naca xelelá benne' ca' dxelebéaj xíchaje̱' Lue', Dios, lawe' da quebe dxelebé'e̱ gunne xue xelune̱' ca naca xrba chiu'. 
Xrana' Dios, dxexache lázrele̱'u bénneache chiu'. Btipa lazra' cáte̱ze dxenná xrtizru' gunu'. 
Zánete̱ zaj naca benne' ca' zaj nau zi' xuzre̱' neda', ne benne' ca' dxeledábague̱' neda', san quebe ne gusana' dxuna' ca dxuse̱de dizra' chiu' netu'. 
Ble'eda' benne' ca' dxelún lazre̱', na' dxegúteda' benne' ca' lawe' da quebe dxelune̱' ca dxenná xrtizru'. 
Gunná'xque, Xran, ca nazrí'ida' da bdxixruj be'u. Dute̱ xel-la' dxexache lazre' chiu', btipa lazra'. 
Da líqueze zaj naca xúgute̱ xrtizru', ne tu chí'izqueze zaj naca da dxuchi'u chee̱ntu' lu da xrlátaje chiu'. 
Benne' ca' dxelenná be'e̱ dxeláu zi' xuzre̱' neda' na' quebe bi nuna' chee̱'. Dute̱ lázrdawa' dxezreba' ca zaj naca xrtizru'. 
Dxebéle̱'e̱da' lu da dxenná xrtizru' ca dxebé bénnea' dxezrél-lene̱' tu xel-la' gunní'a zrente̱. 
Dxecuídeda', ne dxegúteda' da we̱n lazre'. Nazrí'ida' da dxenná da bdxixruj be'u. 
Gazre lasa tu zra dxue lá'ana' Lue' lawe' da xrlátaje naca ca dxuchi'u chee̱ntu'. 
Dxelebeza zri lázrele̱'e̱ benne' ca' zaj nazrí'ine̱' da bdxixruj be'u, na' quebe bi de̱ da gun na cheajlecházie̱'. 
Xrana' Dios, dxebeza' Lue' xidu' guseláu' neda', ne tu dxúnzqueza' ca naca da bdxixruj be'u. 
Dute̱ lázrdawa' tu dxúnzqueza' da dxuse̱de dizra' chiu' netu', ne nazrí'ile̱'e̱da' ca naca na. 
Tu dxúnzqueza' ca naca da bdxixruj be'u, ne ca dxuse̱de dizra' chiu' netu' lawe' da dxelé'equeznu' xúgute̱ da dxuna'. 
Xrana' Dios, bene da dxuláwizra' Lue'. Bzéajni'i neda' ca dxenná xrtizru' gunu'. 
Bene da dxenaba' lau Lue'. Bselá neda' ca dxenná xrtizru' gunu'. 
Tu güe lá'anazqueza' Lue', Xran, gate ba nusé̱denu' neda' guna' ca naca xrba chiu'. 
Tu guchálajzqueza' ca naca xrtizru' lawe' da xrlátaje naca ca dxenná be'enu' netu'. 
Guzúate̱queze gácale̱nu' neda' lawe' da dxuna' ba xuzre guna' ca bdxixruj be'u. 
Dxezá lazra' guseláu' neda', Xrana' Dios. Dxezaca ba lázrele̱na' da bdxixruj be'u. 
Be̱n gaca bana', na' güe lá'ana' Lue', na' da dxuchi'u chia' xelácale̱ na neda'. 
Gudéa' chalá'ala ca dxedá tu zrila' naníteba'. Bexilaj neda', we̱n zrin chiu', lawe' da quebe ne gal-la lazra' da bdxixruj be'u.