1 Dios chia', beslá neda'.

Naka' ka to benne' žiepe' nis.

2 Naka' ka to benne' yoe'e ḻo gona', na' bi žak se'e.

Naken ka yoa'a ḻo nis zil-ḻe'e,

na' nisen' za' wkachen' yichja'.

3 Žejx̱áke'la' dan' scha wnnéḻi'a, na' da' lba'a.

Žatgak yej ḻawa' x̱ak ẕbeza' nich gakḻen Dios neda'.

4 Zej nyanže benne' ka' bi ẕḻé'egekle' neda' chawe'

ka zej nyan yicha' yichja', na' bi be ẕia nbaga'a.

Benne' ka' ẕžá'agake' neda' zej nákḻi'e waḻe.

Benne' ka' žóngake' neda' ẕia, na' bi zoa biẕ chen'.

Žon byéngake' yeyiẕjwa' da' bi wlana'.

5 Dios, nnézkzelo' Le' bena' da' yaḻze,

na' ẕḻe'ekzlo' doḻa' da' bena'.

6 X̱ana' Dios ẕente, bi go'o latje benne' ka' žx̱en ḻáže'gake' Le' yedoé'egekle' ni'a che da' bena'.

Bi go'o latje benne' ka' zá'gake' chio' chíx̱gekle' ni'a chia' neda', Dios chegak benne' Israel ka'.

7 Dan' nži'ila' Le' ẕchíx̱gake' neda',

na' ḻo yeḻa' sto' zoakza'.

8 Naka' ka to benne' zi'to' ḻawgak benne' ljéža'do' ka',

na' bi zej nónbi'e neda'.

9 Žeye ẕla ḻáẕda'wa' dan' žé'ḻi'a wnné yoe che ližo'.

Da' ẕnnégak benne' ka' chio' Le', Dios, naken ka ẕnnégaken' chia' neda'.

10 Wžeža', na' bena' wbás,

na' ben dítjgekle' neda', na' che ḻen ẕchix̱la'.

11 Ḻezka' bwakw kwina' ḻaže' zeche'.

Bḻé'egekle' neda' ka to da' ben dítjgekle'.

12 Benne' yolawe' ka' wnnégake' chia'.

Benne' we'j ka' ben dítjgekle' neda' ḻo da' béḻgake',

13 san neda' bḻiža' Le', X̱ana' Dios, kan žaz ḻažo'o Le'.

Dios, ḻo yeḻa' žeyache' ḻaže' ẕen chio',

na' dan' nakkzo' Benne' weslá cheto', benle chia'.

14 Bebéj neda' ḻo da' zede gan zoa'.

Naken ka yoa'a ḻo gona' gže'. Bi go'o latje chazžan'.

Beslá neda' ḻo na'gak benne' ka' bi ẕḻé'egekle' neda' chawe'.

Naken ka yoa'a ḻo nis zil.

15 Bi go'o latje gata' neda' ka to benne' ẕgache'e ḻo nis zil na',

nich bi gaka' ka to benne' chejchaze' to ḻo yežw gže',

gan choa'a, na' wkachen' neda' to chi'ize.

16 Bechebe chia', X̱ana' Dios, dan' cháwe'ḻe'e nak yeḻa' žeyache' ḻaže' chio'.

Da, gokḻen neda', dan' ẕente nak yeḻa' žeyache' ḻaže' chio'.

17 Bwia kan nak da' žaken chia' neda', wen žin chio'.

Dan' že' zédḻe'ela', ben byene yenlo' chia'.

18 Da ka' gaze ga zoa' ni, na' beslá neda'.

Beslá neda' dan' zej nyanḻe'e benne' ka' bi ẕḻé'egekle' neda' chawe'.

19 Le' nnézkzelo' kan ẕchíx̱gake' neda',

na' kan že' zédḻe'ela', na' kan žon dítjgekle' neda'.

Ẕḻe'ekzlo' yógo'te benne' ka' ẕžá'agake' neda'.

20 Dan' ẕká'ngake' neda' ka'ze žedó ḻaža'a, na' že' zédḻe'ela'.

Wleza' no benne' yeyache' ḻáže'le' neda', san bi wzóa no benne'.

Wleza' no benne' gon choche' neda', san bi wzóa no benne'.

21 Bwáwgake' neda' da' sḻa',

na' kate' wbiḻa', byé'jgake' neda' da' zichj.

22 Ben ga gak lni ka' chegak benne' ka' ka to do yeḻj gan chéjgake',

na' ben ga yeyák yeḻa' ba nez chégake' to gan chejchégwgake'.

23 Ben ga choḻgak yej ḻáwgake' nich biž ḻé'egekle',

na' ben ga ẕízetezegak benne' ka'.

24 Ḻo yeḻa' ẕža'a chio' bžia yi' benne' ka'.

Ḻo yeḻa' yichj ža'a chio' ben ḻégake' zi'.

25 Ben ga bi soa no benne' ḻo ližgak benne' ka',

na' bi soa no benne' ḻo yežlyó chégake'.

26 Wžía ḻáže'gake' bennen' bsaka' zi'o,

na' žẕížegake' dan' ẕzaka' bennen' beno' ḻe' we'.

27 Bḻoe'e ḻaw doḻa' da' zej nbaga' benne' ka',

na' bi go'o ḻégake' latje gákgake' toze ḻen benne' chawe' chio' ka'.

28 Bsoḻe lagak benne' ka' ḻe'e yiche chegak benne' ka' zej nape' yeḻa' nban da' naken li ḻaže',

na' bi wzojo' lágake' gan zej nyejw lagak benne' chawe' ka',

29 san neda' zoa' ḻo da' ẕzáka'ḻi'a, na' že' zédḻe'ela'.

Beslá neda', Dios, na' bechís neda'.

30 Goḻkza' da' wká'n ẕenen La la'y che Dios chia'.

Wká'n ẕena' Ḻe' ḻen da' žoe ḻawa' Ḻe'.

31 Da' ni žaz ḻáže'že Dios ka to bež gota' ḻawe',

o ka to biado' zej žia lozba', na' sógo'ba'.

32 Ḻé'ekzegekle benne' gax̱jw ḻaže' ka' da' ni, na' yebégekle'.

Le biga' ḻaw Dios, na' Ḻe' gon choche' ḻe'e.

33 Ženle X̱anžon' chegak benne' ka' žiážjegekle',

na' bi ẕzoe' cheḻa'ale benne' chie' ka', benne' zej nyejwe' liž ya.

34 ¡Le wká'n ẕene' Ḻe', ḻe'e zoale ya'abá,

35 Dios beslé' benne' ka' nníta'gake' yež Sión,

na' yeyone' yež ka' zej žen' ḻo yežlyó Judá,

na' chejnníta'gake' ga na',

na' gata' chégake' yežlyón'.

36 Ḻezka' žingak ẕa'só benne' chawe' chio' ka',

na' gata' chégake' yežlyón',

na' benne' ka' nží'igekle' La la'y chio' chejnníta'gake' ga na'.